Kwamamaza

Igisubizo cya Musenyeri Smaragde ku bakwinjiza ingengabitekerezo ya Jenoside mu Kiliziya

Yanditswe kuya 19-09-2016 saa 14:53' na Cyprien Niyomwungeri


Umushumba wa Diyosezi Gatolika ya Kabgayi, Musenyeri Smaragde Mbonyintege, asanga aho u Rwanda rugeze nta Munyarwanda wakwifuza gukora Jenoside kereka umurwayi cyangwa utagira ubwenge.

Ibipimo by’Ubumwe n’Ubwiyunge mu Rwanda bigaragaza ko Abanyarwanda bumva kandi bibonamo ko biyunze bangana na 92.5% bavuye kuri 82.3% mu mwaka wa 2010.

Icyakora kinagaragaza ko 28.9% basanga hakongera gukorwa Jenoside hatagize igikorwa ngo habungabungwe ibyagezweho mu bumwe n’ubwiyunge, abangana na 27.9% bakibona mu ndorerwamo y’amoko naho 25.8% bakabona hakiri ingengabitekerezo ya Jenoside.

Mu gikorwa cyo kumurikira abanyamadini ibyavuye mu bushakashatsi ku bumwe n’ubwiyunge, Musenyeri Mbonyintege yavuze ko imibare y’ubushakashatsi itanga icyizere mu mibereho no mu mibanire y’Abanyarwanda.

Asanga nta muntu ukiriho wifuza gukora Jenoside, kuko uwabyifuza yaba ari umurwayi nta bwenge afite.

Yagize ati“Abantu bakireba kuriya mu Rwanda mu ivangurakoko,irondakoko, ingengabitekerezo ya Jenoside... uretse ko numva nta muntu ukiriho ukifuza kuba yakora Jenoside kuko yaba ari umurwayi cyangwa yaba nta bwenge butekereza afite.”

Musenyeri Mbonyintege avuga ko abagifite ingengabitekerezo ya Jenoside cyangwa abacyibona mu ndorerwamo y’amoko, ari akoba k’amateka kagenda kabizirikaho kandi kazashira kuko amadini n’igihugu muri rusange bagafitiye umuti wo kukavura.

Akarere ka Musanze kaza ku isonga mu kugira abantu bakibona mu ndorerwamo z’amoko n’abagifite ingengabitekerezo ya Jenoside, gakurikirwa na Rubavu, Gasabo, Nyarugenge, Ruhango, Nyanza na Nyagatare.

Ntawajyana ingengabitekerezo mu Kiliziya

Musenyeri Mbonyintege yemeza ko nta muntu ushobora kwinjiza ingengabitekerezo ya Jenoside mu Kiliziya cyangwa mu itorero, ko abayifite bayikorera hanze.

Yagize ati“Ingengabitekerezo ntabwo umuntu ashobora kuyikuzanira mu itorero ayikorera hanze kuko itorero ubwaryo rihangana n’ingengabitekerezo ya Jenoside. Kuvuga kwica, niba hari icyaha kiruta ibindi kibaho ni icyo ngicyo, nta muntu waza mu Kiliziya ayitwaje cyangwa ashaka kuyikoresha. Iyo bibaye,aba ari umuntu witaje abandi akabikorera hanze, agakinira hanze y’ikibuga.”

Guverinoma y’u Rwanda yiyemeje ko mu 2017, Abanyarwanda bangana na 95% bazaba bumva cyangwa bibonamo ubumwe n’ubwiyunge. Komisiyo y’Ubumwe n’Ubwiyunge yemeza ko bizagerwaho bikanarenga ariko icy’ingenzi ari ugukomeza gusigasira ibimaze kugerwaho kugirango hatagira icyongera gucamo Abanyarwanda ibice.

Gukomeza kwimakaza gahunda ya Ndi Umunyarwanda no gukomeza kwigisha Abanyarwanda kurandura ingengabitekerezo ya Jenoside bigishijwe igihe kirekire, byitezweho gutanga umusanzu ukomeye mu kubunga no kubabanisha amahoro.

Umushumba wa Diyosezi Gatolika ya Kabgayi, Musenyeri Smaragde Mbonyintege

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved