Kwamamaza

Umukandida w’umugore mu matora ya Perezida mu 2017?

Yanditswe kuya 26-08-2016 saa 09:33' na Ntakirutimana Deus


Harabura amezi 11 kugira ngo buri wese wujuje ibisabwa mu Rwanda anyure mu bwihugiko bw’icyumba cy’itora guhitamo uwo yifuza ko yakomeza kuyobora igihugu.

Mu bihugu byose ku isi, yaba ibikize cyangwa ibikennye ariko bigendera ku mahame ya demokarasi, umwaka w’itora ry’Umukuru w’Igihugu uba udasanzwe mu buryo bwinshi kuko igihe kiba kigeze ngo abaturage bafate icyemezo gikomeye gishobora kuzagira ingaruka nziza cyangwa mbi kuri ejo hazaza h’igihugu cyabo bitewe no guhitamo kwabo.

Iki ni igihe gikomeye cyo gushishoza no guhitamo neza, bitari nk’ibya babandi bahisemo "Yego" muri Brexit, bwacya kabiri bagasanga baribeshye bikomeye bakicuza.

Abanyarwanda basaga miliyoni esheshatu nibo bazitabira igikorwa cy’amatora y’Umukuru w’Igihugu, muri bo abasaga miliyoni enye basabye ko Itegeko Nshinga rivugururwa kugirango Perezida Paul Kagame yemererwe n’amategeko kuba yakwiyamamaza.

Ibi ntibibuza bamwe mu banyapolitiki bagambirira kwiyamamariza uriya umwanya utoroshye kuwicaramo na mba, ku buryo mu minsi iri imbere dushobora kugenda dutungurwa na kandidatire za bamwe.

Duherutse kuganira na Mukabunane Christine, umugore uyobora PS Imberakuri akaba n’umwe mu bagore batanu bayobora amashyaka mu Rwanda, dutera icyumvirizo mu ishyaka abereye umuyobozi ku cyo 2017 ihishe.

Nta kujijinganya yagize ati “Uretse nanjye, dufitemo n’abandi bagore bashobora kwiyamamamariza kuyobora igihugu, mu ishyaka haba harimo abantu benshi.”

Muri PS Imberakuri, ishyaka ryakunze kurangwa n’ubushyamirane hagati ya Mukabunani Me Ntaganda Bernard, usanga Mukabunane ari we wenyine ugaragara cyane mu bikorwa bya politiki, dore ko amaze gutorerwa kabiri kuba Umuvugizi w’Ihuriro nyunguranabitekerezo ry’imitwe ya politiki yemewe mu Rwanda.

Nubwo nta mwanzuro w’icyakwitegwa kuri PS Imberakuri muri 2017, Mukabunani asa nuwaciye amarenga ko nibiba ngombwa ko batanga umukandida azashyigikirwa.

Ati “ Umwanzuro uzafatwa na kongere, niba twemeje ko tuzatanga umukandida, uwo twakwemeza yatanga kandidatire tukamushyigikira.”

Abajijwe niba yiyumvamo ubushobozi bwo kuyobora Abanyarwanda hafi miliyoni 12 yasubije ati “ Kubera iki se nta bushobozi mfite bwo kuyobora igihugu? Ubushobozi se abantu benshi ntibabufite? Abantu benshi barabufite. Kubera ko n’abatanga kandidatire baba biyumvamo ubushobozi utabwiyumvamo ntiwayitanga [kandidatire].”

Yakomeje agira ati “Ishyaka niryo rikugena rikavuga riti turabona runaka yatubera umukandida, turabona ufite ubushobozi, uremera ukakira icyo cyizere baba bakugiriye.”

Mukabunani avuga ko ibyo usabwa kuyobora u Rwanda agomba kuba yujuje n’abagore babifite. Ati “Ni ubishoboye, ushobora gukomeza amajyambere twagezeho, akayongera, ushoboye kumva abaturage. Tuzareba abazatanga kandidatire duhitemo.”

Mu bagore babayeho mu Rwanda, Mukabaramba Alvera ni we wenyine wateye intambwe yo kwiyamamazira kuba Umukuru w’Igihugu, ubwo yatangwaga n’ishyaka rya PPC abereye umuyobozi mu matora ya 2003 na 2010.

Mukabunane Christine uyobora PS Imberakuri

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved