Umujyi wa Kigali wahwituye imirenge ikiri inyuma mu isuku n’umutekano

Yanditswe na David Eugène Marshall
Kuya 6 Gicurasi 2018 saa 09:00
Yasuwe :
0 0

Umujyi wa Kigali wasabye imirenge iwugize ikigaragaza intege mu isuku n’umutekano kongeramo imbaraga kugira ngo umujyi ukomeza kuza ku isonga.

Kigali ni umujyi ukunze gutangarirwa cyane n’abanyamahanga kubera isuku n’umutekano biharangwa. Isuku ya Kigali umwaka ushize yahesheje Perezida Paul Kagame igihembo cyizwi nka ‘Super Prix/Grand Batisseur.

Mu kiganiro Ubuyobozi bw’Umujyi wa Kigali na Polisi bagiranye n’abanyamakuru ku wa Gatanu, hagaragajwe ko hari Imirenge imaze kwigaragaza cyane mu kubungabunga isuku n’umutekano basaba n’itarabigeraho kwikubita agashyi.

Umuyobozi wungirije ushinzwe imibereho myiza y’abaturage mu mujyi wa Kigali, Patricia Muhongerwa, yavuze ko ubukangurambaga ku isuku n’umutekano bwatangiye muri Mutarama bukazageza muri Kamena 2018.

Mu isuzuma ryakozwe mu mezi atatu ya mbere rireba uko iyo mihigo iri gushyirwa mu bikorwa, bigaragara ko Imirenge ya Jali, Nyarugunga, Remera, Kagarama, Nyamirambo, Gatenga, Jabana na Gahanga ikomeje kuza imbere, naho Gisozi, Masaka, Kigarama, Gatsata, Kimirongo, Niboye, Ndera na Kicukiro ikaza mu cyiciro cya kabiri cy’iri kugerageza gukora neza.

Muhongerwa yavuze ko iri genzura ryabahaye umwanya wo gusuzuma aho Imirenge igeze ishyira mu bikorwa ingamba yihaye, basaba iri gukora neza kurushaho ndetse no gushishikariza abakiri inyuma gushyiramo ingufu.

Umuyobozi w’Ishami rya Polisi y’u Rwanda rishinzwe ubufatanye n’abaturage (Community Policing), ACP Damas Gatare, yavuze ko nta na kimwe cyagerwaho isuku n’umutekano bidahari.

Yagize ati “Inzego zose zigomba gufatanyiriza hamwe kureba isuku n’icyahungabanya umutekano mu Mujyi wa Kigali, cyane hanibandwa mu kureba ahari ibyobo bya ruhurura bishobora gutwara amagara y’abantu. Hari inzu zituzuye zabaye indiri y’abakoresha ibiyobyabwenge ndetse no kugenzura neza niba buri kimwe cyose mu Mujyi wa Kigali kiba kiri mu mwanya wacyo nk’uko bisabwa n’amategeko”.

Muhongerwa yavuze ko Umujyi wa Kigali uri mu biganiro n’abashoramari, bareba ko ikimoteri cya Nduba cyakunze kwinubirwa n’abaturage cyabyazwa umusaruro, umwanda uhajyanwa ukaba wakoreshwa mu bindi bikorwa bibyara inyungu.

Ubukangurambaga bw’isuku n’umutekano buzakurikirwa n’ibihembo aho Umurenge uzahiga indi uzahabwa imodoka. Muri Kamena uyu mwaka nibwo ibihembo bizatangwa.

ACP Damas Gatare yasabye abayobozi n'abaturage gufatanyiriza hamwe mu gutanga amakuru y'icyahungabanya umutekano icyo aricyo cyose ndetse hitabwa no ku isuku
Umuyobozi wungirije ushinzwe imibereho myiza y’abaturage mu mujyi wa Kigali, Patricia Muhongerwa, yavuze ko ubukangurambaga ku isuku n’umutekano bwatangiye muri Mutarama bukazageza muri Kamena 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza