Umujyi wa Kigali ugiye gutangira gufatira ibibanza bitabyazwa umusaruro birimo n’ibya Leta

Yanditswe na Evariste Nsengimana
Kuya 11 Ugushyingo 2019 saa 12:31
Yasuwe :
0 0

Ubuyobozi bw’Umujyi wa Kigali bwatangaje ko bwatangiye gufatira ibibanza yaba ibya leta n’iby’abantu ku giti cyabo bitabyazwa umusaruro n’inyubako zadindiye none zikaba zarahindutse indiri y’ibisambo n’abajura.

Hirya no hino mu gihugu, cyane cyane mu mijyi nka Kigali usanga hari ubutaka n’ibibanza byagenewe kubakwamo inzu zo guturamo cyangwa iz’ubucuruzi bimaze imyaka bitabyazwa umusaruro uko bikwiye.

Uretse ibyo bibanza, usanga hari inzu zatangiye kubakwa ariko zikadindira zitarangiye, hagashira igihe zitaruzura, ugasanga biteye umwanda mu mujyi cyangwa bigahinduka indiri y’ibisambo n’inyamaswa.

Mu kiganiro Ubuyobozi bw’Umujyi wa Kigali kuri uyu wa 11 Ugushyingo 2019 bwahaye itangazamakuru, bwasobanuye ko ibyo bibanza bigiye kwamburwa bene byo muri gahunda yo kunoza isuku no gushyira mu bikorwa ibiteganywa n’itegeko.

Ingingo ya 58 y’iryo tegeko ivuga ko ‘Ubutaka bushobora kwamburwa nyirabwo’ ari uburi mu mbago z’umujyi aho igishushanyo cy’ikatwa ry’ibibanza cyemejwe n’inzego bireba ariko bukaba bumaze imyaka itatu ikurikiranye budakoreshwa.

Ku nzu zadindiye, itegeko rivuga ko iyo imaze imyaka ibiri itubakwa, nyirayo atagaragara ifatwa nk’aho yayitaye kandi ikagira uruhare mu guteza umutekano mucye.

Umuyobozi wungirije w’Umujyi wa Kigali ushinzwe imiturire n’ibikorwa remezo, Dr Nsabimana Ernest, yavuze ko ibyo bigiye gukurikizwa mu rwego rwo kugira Umujyi ucyeye.

Yavuze ko iyi gahunda yamaze gutangira ndetse hari ibikorwa by’ibanze biganisha ku gufatira ibyo benebyo baburiwe ntibagire icyo bakora, aho ikigamijwe nyamukuru ari ukugira ngo ababifite bihutire kubikoresha.

Nsabimana yavuze ko hari ibibanza bimaze igihe bifite benebyo batabibyaza umusaruro bisa n’aho babitaye. Yasobanuye ko iki cyemezo kireba n’ibibanza bya Leta mu gihe biherereye aho iri tegeko rireba.

Ati “Hari ingamba zari zisanzwe zihari ariko Umujyi wa Kigali ushaka kuzikaza kugira ngo benebyo babyubake kandi bakurikije igishushanyo cy’Umujyi wa Kigali, abo byananiye cyangwa abadashaka kubyubaka hagafatwa izindi ngamba biciye mu murongo w’ibyo amategeko ateganya.”

Umuyobozi w’ishami ry’imiturire n’imitunganyirize y’Umujyi wa Kigali, Eng Mugisha Fred, yavuze ko hafashwe umwanzuro wo gutera intambwe yo gushyira mu bikorwa ibiteganywa n’itegeko ku bibanza n’ubutaka bitabyazwa umusaruro.

Ati “Ni ukubwisubiza iyo nyirabwo yinangiye kububyaza umusaruro. Niyo gahunda uyu munsi umujyi ufite nyuma y’uko ubasabye kububyaza umusaruro bamwe bakabikora abandi ntibabikore.”

Yavuze ko n’abandi babifite nubwo byaba bitarageze kuri ya myaka itatu bagomba kwihutira kubibyaza umusaruro kugira ngo igihe kitazabagereraho bakabyamburwa.

Abazaherwaho mu kubambura ubutaka n’ibibanza bitabyazwa umusaruro ni abafite ibirengeje igihe giteganywa n’itegeko kandi baburiwe inshuro nyinshi ntibagire icyo bakora.

Ubuyobozi bwavuze ko uretse ibibanza hari n’inkuta n’ingo zubakishije senyenge cyangwa amabati bitajyanye n’igihe, benezo basabwa kuzivugurura kugira ngo zirusheho gusa neza, batabikora bagafatirwa imyanzuro.

Umujyi wa Kigali ugaragaza ko muri rusange ubarura ibibanza bisaga 50 bitabyazwa umusaruro birimo 20 biri mu murongo utukura. Ni ukuvuga ko aribyo bizatangirirwaho byamburwa benebyo.

Itegeko ry’Ubutaka riteganya ko ubutaka butamburwa nyirabwo igihe bigaragara ko hari impamvu yumvikana ituma budakoreshwa.

Dr Nsabimana(ibumoso) na Eng Mugisha bari kuganira n'itangazamakuru

Amafoto: Munyarugerero Gift

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza