Kwamamaza

Umuhango wo gushyingura Dr Niyomugabo (Amafoto)

Yanditswe kuya 8-08-2016 saa 21:29' na Ntakirutimana Deus


Ubwo yashyingurwaga, Dr Niyomugabo Jean Fidèle, wari Umuyobozi w’ibitaro bya Kinazi mu karere ka Ruhango, wazize urupfu rutunguranye, yaraswe ubutwari bwamuranze bwo kwita ku buzima bw’Abanyarwanda kugera ku munota wa nyuma w’ubuzima bwe.

Tariki ya 6 Kanama 2016, nibwo inkuru y’incamugongo yuko Dr Niyomugabo yasanzwe yapfiriye muri Motel yitwa Nice Garden iherereye mu karere ka Gicumbi yumvikanye.

Niyomugabo uvuka mu karere ka Ruhango, yashyinguwe ku wa Mbere tariki ya 8 Kanama 2016, mu karere ka Bugesera aho yasengeraga mu idini y’Abadivantisiti b’umunsi wa Karindwi.

Mu marira menshi Dr Niyomugabo yashyinguwe n’imbaga y’abantu barimo abo mu muryango we, abo mu muryango yendaga gushakamo, abakoresha be, abo babanye, abo biganye n’abo bamenyanye.

Igihugu cyari kizi Dr Niyomugabo nk’umukozi mwiza witangira akazi nkuko byagarutsweho n’Umunyamabanga Uhoraho muri Minisiteri y’Ubuzima, Dr Nyemazi Jean Pierre.

Yavuze ko mu minsi yashize yari kumwe na Dr Niyomugabo yaje kubonana na Minisitiri w’Ubuzima, akamubaza impamvu atarajya mu kiruhuko nk’umuntu witeguraga kurongora.

Ati “Si kenshi umukoresha asaba umukozi kujya mu kiruhuko, ariko yarivugiye ati “oya reka mbanze ngende nkemure ibintu nka bibiri cyangwa bitatu byari bisigaye nzagaruka mbasabe ikiruhuko.”

Yakomeje avuga ko yakundaga akazi kandi yagatunganyaga uko bisabwa, ku buryo igihugu gihombye umugabo.

Yongeyeho ati “Yakundaga akazi si umuhamagaro wa buri wese , yaranzwe n’ibikorwa byiza[...].Dushimiye umuryango we wamudutije mu gihe kingana n’icyo yamaze mu rwego rw’ubuzima, twihanganishe umukunzi we n’abandi...”

Ubutwari bwe kandi bwagarutsweho na Dr Alfred Rutagengwa yavuze ko Dr Niyomugabo yari umukozi w’indashyikirwa mu gihe yamaze mu bitaro ayobora.

Jenoside yabaye Dr Niyomugabo afite imyaka 12, itwara ababyeyi be ndetse n’abavandimwe be, ku buryo ari we wenyine wari usigayeho.

Yiteguraga gusezerana imbere y’amategeko ku wa Gatanu w’iki cyumweru, naho gusezerana imbere y’Imana byari biteganyijwe tariki ya 19 Kanama 2016.

Urujijo ku rupfu rwe

Dr Niyomugabo yasanzwe muri Motel Nice yapfuye, bamwe bahereyeho bavuga ko ashobora kuba yiyahuye, ariko uburyo basanze umurambo we woroshe, ngo ntibishoboka ko umuntu yapfa adasambye ku buryo yatera imigeri, ibyo yari yiyoroshe bigaterwa hirya.

Aho niho bamwe bahera bakeka ko ashobora kuba yarishwe n’abantu bamusanze mu cyumba yari yarayemo, polisi ikaba ikiri mu iperereza, umuryango we na wo utegereje ikizavamo.

Dr Niyomugabo yavutse tariki ya 14Ugushyingo 1982, yize amashuri abanza i Kabuga, akomeza mu yisumbuye muri College Ingenzi y’i Rutongo ayasozereza muri Groupe Scolaire Saint Aloys Rwamagana.

Yakomeje muri kaminuza y’u Rwanda aho yize ubuvuzi abusoza muri 2012, atangira gukora mu bitaro bya ADEPR Bugesera, muri 2014 yoherejwe mu butumwa bw’akazi muri Sudani y’Epfo, muri 2015 agaruka mu bitaro bya Nyamata. Muri Gashyantare 2016 yagize umuyobozi w’agateganyo w’ibitaro bya Kinazi.

Buri wese yifuzaga gusigarana urwibutso rw'aho aruhukiye
Byari amarira n'agahinda ku mukunzi wa Dr Niyomugabo
Ababanye nawe bari barenzwe n'agahinda
Abareze Dr Niyomugabo bafite indabo
abarezwe na Dr Niyomugabo muri Kaminuza Nkuru y'u Rwanda
Abari bahagarariye itorero ry'Abadivantisiti mu Rwanda
Abayobozi ba AERG na GAERG bunamira Dr Niyomugabo
Amasengesho asoza umuhango wo gushyingura
Uwo biteguraga kurushingana kwihangana byamunaniye

Amafoto Ntakirutimana Deus


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved