Kwamamaza

Umugore n’umugabo barwanye rubura gica hitabazwa polisi

Yanditswe kuya 25-10-2016 saa 17:10' na Thamimu Hakizimana


Umugabo w’imyaka 52 n’umugore we uri mu kigero cy’imyaka 35 batuye mu Kagari ka Munanira mu Murenge wa Nyakabanda, barwanye rubura gica bashinjanya gucana inyuma n’isindwe, hitabazwa Polisi kugira ngo ihoshe iyo mirwano.

Ahagana saa tatu z’ijoro ryo kuri uyu wa Mbere, tariki ya 24 Ukwakira 2016, nibwo uyu mugabo yakubise umugore we, bari bamaranye amezi atanu babana amuziza ko yatashye bwije, avuga ko yagiye atamusabye uruhushya.

Imirwano hagati y’uyu muryango yatangiye nyuma y’uko, umugore ajugunye telefone y’umugabo we hejuru y’amabati y’inzu y’abaturanyi kugira ngo atamwumvisha amajwi yari yamufashe arimo kuganira n’abagabo.

Nyuma yo kumva urusaku muri uru rugo, abaturanyi bahuruye, bitabaza inkeragutabara, bagerageza gukiza aba bombi ariko birananirana, bahita bitabaza Polisi aba ari yo ihosha izo mvururu.

Umugore n’umugabo bitana ba mwana ku mpamvu ihembera umwuka mubi mu muryango

Umugore yabwiye IGIHE ko umugabo we ahora amukubita, ndetse rimwe na rimwe akanamuciraho imyenda kubera kumufuhira kandi ahora amusaba ko babyarana akabyanga.

Yagize ati “ Njye rwose ndifuza ko ubuyobozi bundenganura kuko siniyumvisha ukuntu ahora ankubita, buri gihe iyo abasore bansuhuje cyangwa se bakampagara kuri telefoni arankubita ku buryo yewe n’iyo n’isazi inkozeho aba ari kuvuga ko iri kunyagaza kubera gufuha gusa."

Yakomeje avuga ko abangamirwa cyane n’uburyo uwo mugabo yanze ko babyarana ndetse akanamubwira ko yifungishije burundu amubeshya kandi yaramukunze azi ko bazabyarana.

Umugabo we avuga ko amaze kurambirwa imyitwarire y’umugore we bitewe n’uko amaze kumufata inshuro zirenze eshatu aryamanye n’abandi bagabo ku buriri bwe.

Yagize ati “Sinababeshya ko ari umugore wanjye kuko uyu ni ihabara ryanjye, tumaranye amezi atanu, kandi nabwo twabanye nabuze uko ngira nyuma y’ikibazo nari nagiranye n’umugore wanjye w’isezerano tunafitanye abana bane, mfata uyu kugira ngo wenda ndebe ko yangabanyiriza ibitekerezo nari mfite ariko ndabona agiye kunsaza.”

Yakomeje avuga ko amaze kumurambirwa bitewe n’uko imico ye myinshi itandukanye n’iy’umugore yifuza kubana na we.

Yagize ati “Ni umusinzi, murebe uburyo ameze kandi n’ibi ari gukora ni inzoga zabimugize mu gihe njye ntanywa inzoga. Icyiyongeraho ni uko yari yanditse urwandiko imbere y’umuyobozi w’ahantu twabaga mbere yo kwimukira aha avuga ko atazongera kunca inyuma kuko nari maze kumufata inshuro nyinshi aryamanye n’abagabo.”

Nyuma y’izi mvururu zahuruje inzego z’umutekano nyuma yo kunanirwa gukemura ikibazo hagati y’umugabo n’umugore, aba bombi bavuze ko badashaka kongera kubana mu rugo rumwe.

Umugabo yahise atabwa muri yombi ajya gufungirwa kuri Sitasiyo ya Polisi ya Nyamirambo aho akurikiranyweho icyaha cyo kwihanira.

Inkeragutabara zahageze ku ikubitiro, zisanga umugore n'umugabo bari kurwana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved