Kwamamaza

Umugenzuzi w’Imari ya Leta yasabye Abadepite gufasha RBC kwifasha

Yanditswe kuya 27-09-2016 saa 09:50' na Philbert Hagengimana


Kuba Ikigo cy’Igihugu cy’Ubuzima mu Rwanda, RBC, cyarashinzwe mu buryo busa n’ubuhutiyeho, bikomeje gutuma gihora mu rusobe rw’ibibazo ahanini bishingiye ku icungamutungo wacyo, imiyoborere ndetse n’imikoranire, ari na byo Umugenzuzi Mukuru w’Imari ya Leta yahereyeho asabira icyo kigo gufashwa kwifasha.

Ubwo RBC yitabaga Komisiyo y’Inteko Ishinga Amategeko, ishinzwe kugenzura imikoreshereze y’umutungo n’imari ya Leta (PAC) kuri uyu wa 26 Nzeri 2016, Umugenzuzi Mukuru w’Imari ya Leta, Obadiah Biraro, yasabye ko icyo kigo cyafashwa kwifasha, gusa ngo n’Imana ifasha uwifashije.

Yagize ati “Nagira ngo mbasabe,PAC,Inteko,mufashe RBC kwifasha, n’aho twahera mu kuyisobanura, hari ibibazo, […] Sinzi ko ijya kwitwa RBC babanje kwicara ngo barebe icyo ari cyo. RBC irebana n’ubuzima bw’abantu. RBC nta kindi kigo nka yo kireba ubuzima bw’abanyarwanda bagera kuri miliyoni 12. Nihatabanza kurebwa uburemere bw’akazi bafite tuzahora dufite ibibazo.”

Umugenzuzi mukuru w’Imari ya Leta yakomeje avuga ko ibibazo biri muri RBC ari urukurikirane rw’imiyoborere mibi, aho usanga abayobozi bariho ariko ngo batazi inshingano zabo.

Ati “Tugomba kuba ‘serious’ ku bintu by’ubuzima bw’abantu, wumvise ibivugwa muri RBC usanga hari uruhererekane rw’ibibazo mu buyobozi bwabanje. Igihe bazaba baticaye ngo baganire ku nshingano za buri wese, bizahora ari ibibazo gusa.”

Usta Kaitesi,Umuyobozi Wungirije w’Inama y’Ubutegetsi ya RBC mu nyunganizi ku bisobanuro by’Umuyobozi wa RBC, Prof.Condo Jeanine na James Kamanzi, Umwungirije, yashimiraga Leta y’u Rwanda ko nibura icyo kigo ubu ari bwo gifite abantu ku myanya hafi ya yose, na Guverinoma ikaba yarabasezeranyije ko bidatinze iza kubuzuriza inama y’ubutegetsi.

Kayitesi yagize ati “Itegeko rishyiraho RBC ryasohotse ku Itariki ya 7 Werurwe 2011, rishyiraho inzibacyuho y’umwaka umwe. Inama y’ubutegetsi yashyizweho ku itariki ya 4 Ugushyingo 2011, urumva ko inzibacyuho yendaga kurangira,[…] Ubuyobozi bwashyizweho nka nyuma y’amezi atatu, ariko nta muyobozi mukuru wari urimo, hashyizweho abayobozi batatu bungirije, ubwabo bakaba ari bo bitoramo ukora nk’umuyobozi.”

Yakomeje agaragaza ko iyo urebye mu mateka ya RBC uburyo yagiye iyoborwa, nta gihe yigeze igira ikipe yuzuye ngo itangirire hamwe guhangana n’imbogamizi zari ziriho, ati “Ubwo twazaga hano umwaka ushize na bwo inama y’ubutegetsi ntiyari yuzuye, […]. Umurage ntiwari woroshye n’abaragwa ntibashyizweho ngo baragwe mu buryo bwa nyabwo. Ni ubwa mbere tugize biro nyobozi yuzuye muri RBC…”

Yaboneyeho gusaba ko mu gihe cyo guhuza ibigo, byajya biba byiza kubikora mu ntangiriro z’umwaka w’ingengo y’Imari, kuko iyo bitabaye bityo biha icyuho abigomeka, bagakomeza gukora nk’aho ikigo kitashinzwe kuko baba bafite ingengo y’imari baba bagomba kubanza kurangiza, ubuyobozi bwaza bugahita buhura n’iyo mbogamizi.

Ibibazo biri muri RBC imaze itanu ishinzwe bifite imizi mu buryo yashinzwemo, ariko byagiye bitanga icyuho cy’amakosa yagiye yirukanisha abakozi bamwe agafungisha abandi.

Mu mwaka w’ingengo y’imari 2014/2015, nta mutungo wanyerejwe muri icyo kigo nk’uko Umugenzuzi w’Imari ya Leta yabigaragaje, kuko ibyakabaye bishyirwa muri icyo cyiciro bikubiye mu byo RBC yisobanuyeho imbere ya PAC.

Uretse ibibazo bishingiye ku miyoborere n’imikoranire y’amashami agize icyo kigo, Abayobozi basabwe ibisobanuro ku mafaranga y’u Rwanda 3,652,086,795 yagaragaye nk’ayakoreshejwe, ariko ntihagaragazwe inyandiko zigaragaza icyo yakoreshejwe n’uburyo yakoreshejwemo.

Nk’uko byasobanuriwe PAC, 70% by’ayo mafaranga ni ayishyuwe imisoro ya RRA kandi ngo inyandiko zayo zirahari n’ubwo zabonetse nyuma y’igenzura, bikaba byaratewe no kuba icyo kigo kitaramenye ko bazazisabwa bundi bushya kuko bari barazerekanye mu igenzura rya mbere ryakozwe n’Ikigega Global Fund.

Andi 30% yayo, ngo ni ayishyuwe ibigo bitandukanye bya Leta nka Polisi, nyuma ya serivisi zitandukanye RBC yagiye ihabwa muri gahunda zitandukanye zigamije kunoza serivisi z’ubuzima. Aya yo ngo inyandiko zimwe RBC yarazerekanye, izindi ntizigeze ziboneka ko abo yahawe bari batarazitanga, cyangwa bamwe bakaba bari batararangiza kuyakoresha.

Umugenzuzi Mukuru w'Imari ya Leta, Obadiah Biraro(ibiryo) yasabye Abadepite gufasha RBC gusohoka mu bibazo ifite

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 4 Ugushyingo 2016
Copyright © 2009 -2014 - IGIHE Ltd - All Rights Reserved