Umugabane wacu ukeneye byihutirwa kongera umubare w’abahanga mu by’ubumenyi-Kagame

Yanditswe na Philbert Girinema
Kuya 14 Ugushyingo 2016 saa 03:35
Yasuwe : XX
0

Perezida Paul Kagame yagaragaje ko ubushakashatsi mu by’ubumenyi ari ingenzi kugira ngo ibihugu bibashe kugira iterambere rirambye ndetse bibone ibisubizo by’ibibazo biri guhura nabyo, nubwo hari aho ishoramari muri urwo rwego rikiri hasi cyane.

Perezida Kagame yabigarutseho kuri uyu wa Mbere ubwo yatangizaga inama ngarukamwaka ya 27 y’ikigo Mpuzamahanga giteza imbere Ubumenyi, The World Academy of Sciences (TWAS), ihurije hamwe intumwa z’ibihugu bigera kuri 52.

TWAS yashinzwe mu 1983 n’itsinda ry’abahanga mu bya siyansi barangajwe imbere n’Umunya-Pakistan, Abdus Salam, wegukanye igihembo cyitiriwe Nobel, bari basangiye igitekerezo ko mu bihugu biri mu nzira y’amajyambere, guteza imbere ubumenyi byafasha mu kurenga imbogamizi zihari zirimo inzara, ibyorezo n’ubukene.

Kuri ubu ibihugu biri kwifashisha ubumenyi n’ikoranabuhanga mu guteza imbere inzego z’ubuhinzi, ndetse ikoranabuhanga rimaze kuba ku izingiro ry’iterambere ry’ibihugu bitandukanye.

Perezida Kagame yavuze ko kuva kera abantu bagiye bifashisha ubumenyi kugira ngo bagere ku bisubizo by’ibibazo babaga bafite, ndetse “ku bihugu biri mu nzira y’amajyambere by’umwihariko, ubumenyi bugira uruhare rukomeye mu guhindura imibereho y’abaturage n’ubukungu, binyuze mu gufasha mu kuziba icyuho hagati yacu n’ibihugu biteye imbere kuturusha.’’

Ibyo ngo ni nabyo byatumye u Rwanda rwita cyane ku bumenyi n’ikoranabuhanga mu myaka 20 ishize.

Perezida Kagame kandi yavuze ko kugira ngo icyerekezo cy’igihugu icyo aricyo cyose kigerweho bisaba ishoramari mu nzego n’ibikorwaremezo by’uburezi, ubufatanye hagati y’abahanga mu bumenyi n’inzego zifata ibyemezo n’abashakashatsi nubwo hari aho bitaratezwa imbere.

Ati “Ishoramari mu bushakashatsi n’iterambere muri Afurika n’ibindi bice bigitera imbere riracyari hasi cyane. Mu bihugu byinshi, munsi y’umwe mu bashakashatsi batatu mu bumenyi, ni abagore. Umugabane wacu ukeneye byihutirwa kongera umubare w’abahanga mu by’ubumenyi.”

“Niyo mpamvu gahunda y’ubufatanye mu bumenyi n’ikoranabuhanga mu guhugura abashakashatsi 10 000 bari ku rwego rwa PhD, no kongera umubare w’abanyeshuri mu bumenyi n’ikoranabuhanga ari ingenzi cyane.’’

Perezida Kagame yavuze ko kugera kuri ibyo byose bisaba ubushobozi bwihariye, bityo Guverinoma zigomba gukora ibyo zisabwa kandi zigafasha n’inzego z’abikorera kubigiramo uruhare.

Yakomeje agira ati “Imitekerereze ya gihanga ituma tuba abantu beza mu buryo twumva ibintu n’uko tubikora. Imikorere ya gihanga ntiyita ku macakubiri no kurebera abandi mu ndererwamo zinyuranye aribyo bidindiza iterambere. Agaciro dusangiye nk’ikiremwamuntu gakwiye kwitabwaho kandi ntawe ukwiye guhezwa mu rwego rw’ubumenyi n’ubushakashatsi.”

Perezida wa TWAS, Umushinwa Bai Chunli, yashimye imiyoborere ya Perezida, nyuma ya Jenoside yo mu 1994 yahitanye abatutsi basaga miliyoni imwe, ibikorwa remezo by’u burezi bigasenyuka, abarimu bamwe bagahunga abandi bakicwa, ariko nyuma y’ibyo bihe u Rwanda rurongera ruba icyitegererezo muri Afurika.

Yavuze ko abanyafurika bari kwifashisha ubumenyi mu kwikemurira ibibazo nko mu kongera ibiribwa no gusuzuma ihindagurika ry’ikirere.

Minisitiri w’Uburezi, Dr Musafili Papias, yavuze ko u Rwanda rushimishijwe no kwakira inama ya 27 ya TWAS, izatanga umwanya mwiza wo kugaragaza intwambwe iterwa mu guteza imbere ubumenyi.

Ni ubwa kane iyi nama ikomeye ibereye muri Afurika yo munsi y’ubutayu bwa Sahara, nyuma y’iyabereye muri Nigeria mu 1995, muri Senegal mu 1999 no muri Afurika y’Epfo mu 2009.

Muri iyi nama y’iki kigo kikaba kigamijwe guteza imbere ubumenyi n’ubushakashatsi hagamijwe iterambere rirambye mu bihugu biri mu nzira y’amajyambere, Perezida Kagame yahawe igihembo cyo guharanira iterambere rishingiye ku bumenyi n’ikoranabuhanga mu Rwanda no muri Afurika, n’umwarimu muri Kaminuza y’u Rwanda, Prof Jean Bosco Gahutu, ahabwa umudali wa TWAS kubera ubushakashatsi ku mirire.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza