Kwamamaza

Umugore uhozwa ku nkeke n’umugabo wamuharitse batatu yatakambiye abayobozi

Yanditswe kuya 30-09-2016 saa 12:18' na Thamimu Hakizimana


Umubyeyi w’abana bane, utuye mu Murenge wa Gataraga, Akarere ka Musanze, yasobanuriye abagize Inteko Ishinga Amategeko, Umutwe wa Sena ubuzima abayemo bwo guhozwa ku nkeke n’umugabo we wamuharitse abandi bagore batatu, uhora amutoteza ashaka kumwirukana.

Uyu mubyeyi wo mu Kagari ka Mudakama mu Murenge wa Gataraga, Akarere ka Musanze ho mu Ntara y’Amajyaruguru, avuga ko abangamiwe cyane n’uburyo umugabo we bamaranye imyaka irindwi babana mu buryo bwemewe n’amategeko,asigaye yirirwa amukubita amusaba gusubira iwabo.

Ibi yabitangaje kuwa Gatandatu nyuma y’umuganda ngarukakwezi, wahuje abaturage bo mu Murenge wa Gataraga, abayobozi mu nzego z’ibanze, abashinzwe umutekano, abayobozi b’Akarere ka Musanze ndetse n’Abasenateri.

Uyu mugore w’imyaka 25 yavuze ko umugabo we amukubita amusaba kuva mu nzu ye kugira ngo abone uko yizanira undi mugore.

Yagize ati “ Mbabazwa n’uburyo twashakanye ankunda cyane akaba yaranzaniyeho abandi bagore batatu none akaba ashaka kunyirukana ngo azane undi wa gatanu ngo abe ariwe underera abana kandi bakiri bato kuko umukuru afite imyaka irindwi.”

Yakomeje avuga ko atiyumvisha uburyo umugabo we amaze igihe yaramutanye n’abana bane mu nzu, nta mafaranga na make abasigiye, none akaba yaragarutse ashaka kumwirukana.

Ati “ Mpangayikishijwe n’ubuzima bw’abana banjye gusa nyuma y’aho se yari agarutse avuye mu bandi bagore be yakodeshereje, yaje ashaka kuntema ngo kubera ko ntashaka kuva mu nzu ye ngo azane undi wa Gatanu ngo abe ariwe urera aba bana."

Yakomeje avuga ko ubuyobozi butamufasha gukemura ikibazo afitanye n’umugabo we ndetse ngo bumubuze kurongora abagore benshi kandi nta n’imitungo afite yo kubatunga.

Yagize ati “Nonese ko ari bibi ubuyobozi bukaba butabimubuza ubu koko ejo bundi nitugirana ibibazo bishingiye ku mitungo na bariya bagore be bandi ko n’umuryango we wamaze kubamenya, abayobozi bazavuga ko batari babizi?”

Yakomeje asaba ubuyobozi ko bwabuza umugabo we kumwirukana kuko basezeranye byemewe n’amategeko ndetse bukanamwumvisha ko afite uburenganzira bwo kurera abana be mu gihe bakiri bato aho gushaka ko barerwa n’abandi bagore.

Nyuma yo kuvuga ikibazo cye, ndetse anagaragaza ibikomere by’inkoni ahora akubitwa n’umugabo we, Abasenateri basabye inzego z’ibanze gukurikirana iki kibazo.

Umunyamabanga Nshingwabikorwa w’Umurenge wa Gataraga, Ruberwa Roger we yabwiye IGIHE ko iki kibazo atari akizi ariko nyuma yo kucyumva agiye kugikurikirana afatanyije na Polisi kugira ngo bahite bagikemura.

Ubuharike si umwihariko w’urugo rw’uyu mugore kuko iyi ngeso mu Murenge wa Gataraga ifitwe n’abagabo benshi, aho usanga hari n’abafite abagore bane n’abana bagera kuri 17 cyangwa 20.

Abasenateri basabye inzego zibanze gukurikirana ikibazo cya Mukanoheri Jeanne d’Arc nyuma yo kumva ubuzima abayemo
Umunyamabanga Nshingwabikorwa w’Umurenge wa Gataraga, Ruberwa Roger atangaza ko ikibazo cy'uyu mubyeyi kigiye gushakirwa umuti

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved