Umubare w’imfungwa n’abagororwa wiyongereyeho abarenga 1300 mu mezi atatu ashize

Yanditswe na Habimana James
Kuya 2 Ukuboza 2019 saa 12:44
Yasuwe :
0 0

Urwego rw’Igihugu rushinzwe imfungwa n’abagororwa mu Rwanda (RCS), rwatangaje ko mu mezi atatu ashize umubare w’abagororwa wiyongereho 1313, urubyiruko rukaba ari rwo ruri ku isonga mu binjira muri gereza bakurikiranyweho ibyaha bijyanye n’ibiyobyabwenge n’ubujura.

Umuvugizi w’uru rwego, SSP Sengabo Hillary, yabwiye IGIHE ko kugeza ubu gereza zifite abagororwa benshi ari iya Rwamagana, Nyarugenge na Huye.

Yagize ati “Iyo tureba ikorwa ry’ibyaha tubona ko ariryo nyirabayazana w’ubucucike buvugwa muri za gereza, mu ngamba zafashwe ni uko hari gereza zivugururwa izindi zikagurwa. Akenshi urubyiruko ruza ku isonga mu binjira muri gereza bakurikiranyweho ibyaha bijyanye n’ibiyobyabwenge n’ubujura.”

Sengabo yavuze ko kugeza ubu imfungwa n’abagororwa bari mu gihugu hose ari 72,799.

Ku bijyanye no gucunga umutekano w’aba bagororwa kugira ngo badatoroka, SSP Sengabo avuga ko kugeza ubu hari gereza zifite Camera zifasha mu kureba uko umutekano ucungwa neza, izindi zikaba ziriho uruzitiro rwa senyenge.

Ati “Gereza zimwe nk’iya Nyarugenge na Nyanza ubu ziriho Camera ariko n’izindi zifite senyenge, hari n’ibikoresho byaguzwe n’umubare w’abacungagereza kuko ubu abo dufite ni 2383 ariko intego ni uko nibura bagera ku bihumbi bitanu, gusa ibyo bijyana n’ingano y’ingengo y’imari.”

RCS ivuga ko ubu ingengo y’imari ikoreshwa igera kuri miliyari 17 z’amafaranga, igice kinini cyayo kikaba kigenda ku biribwa n’indi mibereho y’imfugwa n’abagororwa.

Uru rwego rwavuze ko gereza zirimo kwagurwa no kuvugururwa, harimo iya Rwamagana, Musanze, Ngoma, Nyamagabe, Huye na Nyarugenge.

Mu mezi atatu ashize imfungwa n'abagororwa biyongereyeho abarenga 1300

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza