Umubano w’u Rwanda na São Tomé et Príncipe mu isura idasanzwe

Yanditswe na Cyprien Niyomwungeri
Kuya 10 Mutarama 2017 saa 01:15
Yasuwe :
0 0

Umwaka wa 2016 ntuzibagirana mu mateka y’Abanyarwanda kuko uretse kwakira abashyitsi badasanzwe bitabiriye inama mpuzamahanga zabereye mu rw’imisozi igihumbi, rwanakiriye abarajwe ishinga no kugirana narwo umubano n’ubufatanye bwihariye mu ngeri nyinshi, cyane cyane izo rukomeje kubamo intangarugero ku ruhando mpuzamahanga.

Abakuru b’ibihugu bitandukanye mu mpande zose z’Isi, basimburanye mu Rwanda bashaka ubufanye mu bukungu, politiki, ubucuruzi, ishoramari n’ibindi bikorwa by’iterambere bigamije kuzamura impande zombi, no guhana ubunararibonye buganisha ku iterambere.

Umushyitsi wasoreje abandi umwaka ushize ni Minisitiri w’Intebe wa São Tomé et Príncipe, Emery Travoada, wazanye n’umuryango we bagasura ahantu hatandukanye mu Rwanda ndetse akakirwa n’Umukuru w’igihugu bakaganira uburyo bwo gushyiraho ubufatanye hagati y’ibihugu byombi.

Burya ngo akebo kajya iwa mugarura kuko bidatinze itsinda ry’Abanyarwanda riyobowe na Minisitiri w’ububanyi n’amahanga n’ubutwererane, Louise Mushikiwabo, bagiriye uruzinduko muri São Tomé et Príncipe ikirwa giherereye mu kigobe cya Guinea mu Nyanja ya Atlantic, bagirana ibiganiro na bagenzi babo, bigamije guteza imbere umubano w’ibihugu byombi

Ni ibiganiro byibanze ku gusuzuma umubano usanzwe hagati y’ibihugu byombi yaba mu bya politiki ubukungu no gushyiraho uburyo bw’ubufatanye mu bya dipolomasi, politiki n’amategeko. Ingingo ijyanye n’ubufatanye mu ishoramari n’ubukerarugendo yibanzweho, impande zombi zemeza ko buzashingira ku gutangiza ibikorwa bya Sosiyete Nyarwanda y’indege, RwandAir muri São Tomé et Príncipe.

Hemejwe imishinga y’ishoramari rihuriweho nk’ iy’ubuhinzi no gutunganya ikawa muri São Tomé et Príncipe, aho hazahingwa ikawa yo mu misozi ku buso bwa hegitari 500 ndetse mu myaka iri imbere u Rwanda rukazagirana ishoramari na São Tomé et Príncipe mu bijyanye na Peteroli na Gaz.

U Rwanda ruri mu bihugu bike byoroheje imigenderanire ku Banyafurika, impande zombi zemeranyijwe guhana ubunararibonye mu bijyanye na Viza, uburyo bwo gucunga imipaka, guhuza impapuro z’inzira na Viza, guhana amakuru, kubakirana ubushobozi n’ibindi.

Uruzinduko rw’iminsi itatu kuva kuwa 5 kugeza kuwa 7 Mutarama 2017, rwasize Minisitiri Mushikiwabo na mugenzi we Urbino Botelho, basinyanye amasezerano mu bijyanye no kwagura ubufatanye no guhana ubujyanama mu bya dipolomasi na politiki.

Mushikiwabo yatangaje ko uru ruzinduko rugamije gushyiraho uburyo bw’ubufatanye hagati y’ibihugu byombi nkuko Perezida Kagame na Minisitiri w’intebe wa kiriya gihugu babiganiriye mu ruzinduko aheruka kugirira mu Rwanda.

Yavuze ko ibihugu byombi bigomba gutangira gukorana, gusangira ubunararibonye no gufashanya.

Ati “ Ndi hano ngo dushyire mu bikorwa icyifuzo cy’abayobozi b’ibihugu byacu cyo gutangira ubufatanye buhamye hagati y’ibihugu byacu mu nzego zitandukanye. Ni icyemezo gisobanutse cyo gutuma ibihugu byombi bikorera hamwe. U Rwanda na Sao Tome bisangiye icyerekezo cyo kuba ibihugu biteye imbere, bifatanyije n’abaturanyi babyo n’Isi muri rusange.”

Itsinda ry’Abanyarwanda ryanaganiriye na Minisitiri w’intebe, Patrick Emery Trovoada ku bijyanye n’umutekano, agaragaza ahakeneye imikoranire. Yatanze urugero ku Rwanda, yemeza ko yiboneye ko ingabo zishobora gutanga umusanzu ukomeye mu iterambere ry’ubukungu n’imibereho myiza by’abaturage.

Yanemeje ko itsinda ryo muri São Tomé et Príncipe rizasura u Rwanda bitarenze igihembwe cya mbere cya 2017, ngo bigire hamwe aho ibihugu byombi byafatanya.

Minisitiri w’Intebe wa São Tomé et Príncipe, Patrice Emery Trovoada n’umufasha we Nana Travoada ubwo bakirwaga na Perezida Kagame na Madamu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza