Kwamamaza

‘Ukuticuza n’ubushotoranyi bw’u Bufaransa ntabwo bicyihanganirwa muri iki gihugu’

Yanditswe kuya 10-11-2016 saa 17:34' na Philbert Girinema


Minisitiri w’Ububanyi n’Amahanga, Louise Mushikiwabo, yatangaje ko u Rwanda rurambiwe kwihanganira ubushotoranyi bw’u Bufaransa ndetse ko mu gihe kiri imbere ruzashyira ahagaragara amakuru agaragaza uruhare rw’abayobozi b’iki gihugu muri Jenoside yakorewe Abatutsi.

Mu kiganiro yagiranye n’Abanyamakuru kuri uyu wa Kane tariki ya 10 Ugushyingo 2016, Mushikiwabo yavuze ntako u Rwanda rutagize ngo ruzahure umubano w’ibihugu byombi ariko ko u Bufaransa bwahoraga buwusubiza irudubi.

Gusa ngo ni ibintu byatewe n’uruhare iki gihugu cyagize muri Jenoside yakorewe Abatutsi muri Mata 1994 igasiga inzirakarengane zisaga miliyoni zishwe.

Ati “Umubano hagati y’u Rwanda n’u Bufaransa wagizweho ingaruka mbi n’ibikorwa hamwe n’uruhare rw’u Bufaransa nk’igihugu ndetse by’umwihariko n’abantu bamwe mu buyobozi bw’u Bufaransa yaba abasirikare n’abanyapolitiki muri Jenoside yabaye muri iki gihugu mu 1994.”

“Ntabwo ari ibanga, u Bufaransa bwagize uruhare mu gufasha leta yishe miliyoni y’abaturage bayo, byakozweho ubushakashatsi ku Isi hose yaba mu Bufaransa, mu Rwanda no mu bindi bice by’Isi. Iri ntabwo ari ibanga.”

Minisitiri Mushikiwabo yakomeje avuga ko bitewe n’ibi bikorwa by’u Bufaransa, u Rwanda rwari rubizi neza ko bitazoroha kugirana umubano mwiza n’ibikorwa byiza hamwe n’u Bufaransa.

Ibyo ngo byatumye rufata umwanzuro wo kuzahura umubano ukagera ku buryo bw’imikoranire isanzwe hagati y’ibihugu, gusa rwageze aho rubona ko u Bufaransa butabifitemo ubushake, budashaka kugirana umubano mwiza n’u Rwanda.

Ati “U Rwanda nk’igihugu tugeze aho tuvuga tuti ibikorwa,imyitwarire, ukuticuza, ubushotoranyi n’ibikorwa by’u Bufaransa ntabwo bicyihanganirwa muri iki gihugu. Twagerageje mu bihe bikomeye byashize gukoresha uburyo dutekereza ko aribwo bukwiye mu kubaka umubano ariko buri ntambwe yose twateye, u Bufaransa bwasubiraga inyuma.”

Mushikiwabo yavuze ko u Rwanda rutagishobora kwihanganira ubushotoranyi bw'u Bufaransa

Ku iperereza ku ihanurwa ry’indege…

Mushikiwabo yakomoje no ku iperereza inzego z’ubutabera zavuze ko zigiye gusubukura rijyanye n’ihanurwa ry’indege y’uwari Perezida w’u Rwanda, Juvenal Habyarimana, avuga ko ari kimwe mu bikorwa bibi byakozwe n’u Bufaransa dore ko ryari ryarasubitswe inshuro zitari nke.

Ati “Reka mvuge ibintu bibiri kuri ibi bijyanye n’ihanurwa ry’indege u Bufaransa bushaka kudutsindagira ku mutwe kuva mu myaka ishize. Icya mbere Jenoside ntabwo yatewe n’ihanurwa ry’indege, ibyo bifitiwe ibimenyetso. Jenoside yari yaratekerejweho mbere, yari yarateguwe,yari itegereje imbarutso ngo itangire. Icya kabiri ni uko niba hari igihugu kitari u Rwanda cyari neza mu itegurwa rya Jenoside mu myaka ya za 90 ni u Bufaransa.”

“U Bufaransa bwari bufite abajyanama ba guverinoma yateguye Jenoside, bwari bufite abajyanama mu bya gisirikare n’abatoza ku ngabo za leta n’umutwe wagize uruhare muri Jenoside, bwafashaga mu butasi […] ibyo ni ibimenyetso. Hari amazina, hari amasura, ibi ntabwo ari ibintu byahimbwe.”

Abanyapolitiki bagize uruhare muri Jenoside bagiye gutangazwa

Mushikiwabo yavuze ko mu gihe cya vuba u Rwanda rugiye gushyira ahagaragara amakuru yose yerekana uruhare rw’abanyepolitiki n’abayobozi b’u Bufaransa muri Jenoside yakorewe Abatutsi.

Ati “ Mu gihe cya vuba no mu myaka iri imbere, twe nk’igihugu turashaka gushyira ahagaragara amakuru yose agaragaza uruhare rw’abayobozi batandukanye b’u Bufaransa, abasirikare, abanyapolitiki, abatasi n’abandi bagize uruhare muri jenoside muri iki gihugu. Aha niho duhagaze muri iki gihe.”

Komisiyo y’Igihugu yo kurwanya Jenoside iherutse gushyira ahagaragara amazina y’abasirikare 22 b’u Bufaransa bagize uruhare muri Jenoside yakorewe Abatutsi, mu gihe cya vuba Minisitiri Mushikiwabo akaba yavuze ko n’abandi bose bazashyirwa ahagaragara.

Mu gihe cya vuba,ngo u Rwanda ruzashyira ahagaragara amakuru yerekana uruhare rw'abayobozi b'u Bufaransa muri Jenoside
Umunyamakuru Edith Nibakwe wa Radio Isango Star abaza ikibazo
Ikiganiro n'abanyamakuru cyibanze ku ngingo ku mubano w'u Rwanda n'amahanga
Ibinyamakuru bitandukanye byataye iyi nkuru

Amafoto: Rwanda Gov


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved