Uko Yamfashije yigobotoye ubukene no guca inshuro abikesha kwizigama 100 Frw

Yanditswe na Prudence Kwizera
Kuya 15 Kamena 2019 saa 07:46
Yasuwe :
0 0

Yamfashije Philomène wo mu Karere ka Huye, avuga ko yabayeho igihe kirekire mu buzima bushaririye atunzwe no guca inshuro ariko nyuma aza kubuvamo abikesha kwizigama igiceri kimwe cy’amafaranga 100 buri cyumweru.

Uwo mubyeyi w’imyaka 45 y’amavuko atuye mu Kagari ka Nyaruhombo mu Murenge wa Rwaniro; afitanye n’umugabo we abana batatu.

Avuga ko we n’umugabo we bari babayeho mu buzima bwa gikene bitewe n’uko bahingaga nta fumbire ntibeze bigatuma ajya guca inshuro kugira ngo babone icyo kurya.

Ati “Nahingiraga amafaranga 600 ku munsi cyangwa uwo nahingiye akampemba ibishyimbo n’ibijumba nkajyanira abana.”

Kuri uyu wa Gatanu Yamfashije yatanze ubuhamya avuga uko umuryango nterankunga AEE ukimara kugera mu murenge wabo muri Gashyantare 2018, wabigishije kuzigama bimubera inzira nziza yo kwigobotora guca inshuro n’ubukene.

Yagize ati “Twishyize hamwe turi abantu 20 tukajya tuzigama igiceri kimwe cy’amafaranga 100 buri cyumweru.”

Yamfashije avuga ko ubwo bahuriraga mu itsinda bagiye kuzigama bunguranye ibitekerezo bashyiraho n’uburyo bwo guhingirana kugira ngo batizanye imbaraga.

Ati “Twakoze amatsinda ane yo guhingirana rimwe ry’abantu batanu ku buryo byamfashije kubonera urugo ibyo kurya bihagije, ikibazo cy’inzara gitangira gukemuka.

Muri icyo gihe ngo umugabo we na we yari yaragiye gupagasa i Kigali ashakisha icyatunga urugo n’amafaranga yo gufasha abana kwiga.

Ubwo Yamfashije yatangiye kujya arangura igitebo cy’ibijumba ku 1000 FRW akagicuruza ku mifungo mu gasoko kari imbere y’aho atuye akungukaho 200 FRW agasagura n’umufungo wo gutekera abana.

Nyuma yaho Yankurije yaje kuguza mu itsinda amafaranga ibihumbi 15 aguramo inkoko zitera amagi zitangira kumuha inyungu.

Ati “Naguze amasake abiri n’inkokokazi esheshatu; ubwo zimaze gukura zatangiye gutera amagi ndagurisha maze kubona amafaranga nguramo ikibwana cy’ingurube ku buryo ubu cyamaze gukura cyanda kwima.”

Yemeza ko umushinga we wamuhiriye kuko yamaze gutumiza izindi nkoko 10 kugira ngo abashe kwagura ibikorwa.

Uwo mubyeyi avuga ko afite konti mu Murenge Sacco kandi azigamaho amafaranga atari make.

Avuga ko we n’umugabo we babashije gushyira hamwe biyubakira inzu yo kubamo ndetse bagura n’amasambu yo guhinga.

Yishimira ko abana babo bose biga kandi babasha kubabonera ibikoresho by’ishuri no kubatangira umusanzu w’ubwisungane mu kwivuza ndetse n’amafaranga y’ifunguro ryo ku ishuri (School Feeding).

Yemeza ko kuba hamwe n’abandi mu matsinda byamufashije gutinyuka, kwigirira icyizere no kugira isuku muri byose ndetse no kubasha gutanga igitekerezo.

Ibyo guca inshuro yarabirese ahubwo na we akoresha bakozi bane mu cyumweru baza kumuhingira.

Ati “Nahinganga Pariseri imwe y’umuceri nayo ikarara kubera kujya guca inshuro; kuri ubu mpinga ebyiri kandi zikera neza kandi mfite na telefone”

We n’umugabo we bafite intego yo kugura inka bakabona amata kandi bifuza no kuzana mashanyarazi mu nzu yabo.

Umukozi w’umuryango AEE ushinzwe gukurikirana ibikorwa by’amatsinda mu Karere ka Huye, Jean Pierre Nizeyimana, yavuze ko bakorana n’amatsinda 141 abumbiye hamwe abantu bagera ku 2 800.

Abari muri ayo matsinda bakora n’ibindi bikorwa birimo ubuhinzi bwa kijyambere, ubworozi bw’amatungo magufi n’amaremare, kudoda imyenda, kogosha n’ibindi.

Abagore bo mu Murenge wa Rwaniro bibumbiye hamwe mu matsinda bamuritse amwe mu matungo boroye
Bamuritse bimwe mu byo bagezeho bikomoka ku buhinzi
Imbere y'imbaga y'abaturage, Yamfashije Philomène yatanze ubuhamya bw'uko kwizigama igiceri cy'amafaranga 100 byamufashije kwivana mu bukene
Kuboha imipira, kudoda no kuboha ibiseke ni bimwe mu byo bize bibafasha kubona amafaranga
Umukozi uhagarariye ishami ry’ubuzima mu Karere ka Huye, Mazimpaka Ange, yabasabye guharanira kutazasubira inyuma
Umukozi w’umuryango AEE ushinzwe gukurikirana ibikorwa by’amatsinda mu Karere ka Huye, Jean Pierre Nizeyimana
Yamfashije Philomène yavuze ko atagica inshuro n'uko kuba mu itsinda byamubereye inzira nziza yo kuva mu bukene
Imwe mu myumbati ihingwa n'abagore mu Murenge wa Rwaniro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza