Uko Visi Meya Bisizi yarokotse jenoside Kibeho na Cyahinda, Nkomero no ku Kanyaru

Yanditswe na David Eugène Marshall
Kuya 16 Mata 2018 saa 08:33
Yasuwe :
1 0

Ku itariki ya 13 Mata 1994 nibwo Interahamwe zateye Kiliziya ya Kibeho yari yahungiyemo Abatutsi bagera ku 30 000. Babanje kwirwanaho bikomeye, zicamo abagera ku 2200 uwo munsi, bukeye zigarukana ubukana zica abari basigaye harokokamo 2 000 gusa.

Visi Meya wungirije ushinzwe ubukungu mu Karere ka Nyaruguru, Bisizi Antoine, ni umwe mu bari bahungiye i Kibeho. Yaje kurokoka akomereza mu bindi bice byegereye i Burundi, mu rugendo rwamubereye inzitane we n’abo bari kumwe.

Ubusanzwe ku muntu uzi amateka ya Jenoside yakorewe Abatutsi mu zahoze ari Perefegitura ya Butare na Gikongoro, kumva ukuntu Bisizi yarokotse ubwicanyi ahantu harenga hane kandi haberaga ubwicanyi bukomeye, ni igitangaza kidasanzwe.

Aganira na IGIHE yagize ati “Uko twari turokotse Interahamwe i Kibeho, twerekeje i Cyahinda mu yahoze ari Komini Nyakizu tubigiriwemo inama na Padiri Ngoga wa Kibeho. Tugezeyo, Interahamwe zibonye ko tumaze kubayo benshi zo n’abasirikare hamwe n’abajandarume baza kuhatwicira nabwo ndarokoka”.

Yakomeje avuga ko bukeye bwaho ku itariki 16 Mata 1994, abatutsi bari barokotse ubwicanyi bw’i Cyahinda bahisemo gukiza amagara yabo berekeza ku mupaka w’Akanyaru, ariko Interahamwe n’abakozi bo ku mupaka babasubiza inyuma.

Baberekeje ahitwa mu Nkomero, mu yahoze ari Komini Kigembe, ku ntera yitaruye umupaka w’u Rwanda n’u Burundi, icyo gihe ngo bari bamaze kugera ku bihumbi bitatu urebye n’abari bahuye nabo mu nzira.

Gusa ngo ubwo bari ku Kanyaru mbere yo kugarurwa mu Nkomero, Interahamwe zarababwiye ziti “Murashaka tubareke mugende i Burundi, ejo bundi muzaze mudutera? Mwa bakecuru mwe, bariya badutera si mwebwe mwababyaye? Mugende i Nkomero tujye kubafashirizayo”.

Bageze mu Nkomero ngo bahamaze iminsi itatu, ku itariki 19 imodoka zuzuye abajandarume n’abasirikare ziraza zirabagota n’interahamwe nyinshi cyane, maze ahagana saa tatu, ubwicanyi buratangira, anahatakariza mama we na bashiki be barimo n’uwari umubikira.

Bisizi we yirutse ajya kwiroha mu Kanyaru, ariko Imana ikinga ukuboko ntiyapfa, arohorwa n’abagiraneza b’Abarundi.

Uko Interahamwe zakurikije amasasu Abatutsi mu Burundi zigakozanyaho n’Ingabo z’u Burundi

Bisizi ngo ntazibagirwa ubwitange bw’abari abasirikare b’u Burundi bareberaga ibintu hakurya y’Akanyaru, bagerageje kwambutsa abatutsi uruzi rw’Akanyaru bari barokotse mu Nkomero, Interahamwe zikabakurikiza amasasu.

Ngo byateye umujinya abasirikare b’u Burundi maze bahengera izo Nterahamwe zagiye gutanga umusanzu mu bice bya Butare, Abasirikare b’u Burundi basa n’abigaruriye umupaka agahe gato, ku buryo hari itsinda rito ry’Abatutsi ryabashije kwambuka umupaka kubera bo.

Ibya Sagatarama warwanye inkundura ku batutsi banyuze muri Nshili

Bisizi anavuga kandi umugabo Sagatarama wari ufite imbunda yari yahawe n’umupadiri w’i Cyahinda, maze ayobora itsinda ry’abatutsi bahunze bava Cyahinda bagana Nshili.

Sagatama ngo mu mayira yose yabarwanyeho bikomeye, nyuma ngo yanagizwe Umurinzi w’Igihango.

Sagatarama ngo wakundaga abantu cyane, yageze hafi y’umupaka w’u Burundi, inzego za Leta y’Abatabazi, Interahamwe n’igisirikare bamuta mu yombi, baramwica ariko ababashije kwambuka bari bambutse.

Ba Burugumesitiri Silas Mugirangabo wa Komini Rwamiko, Charles Murindahabi wa Komini Mubuga, Superefe Biniga wa Superefegitura Munini hamwe na Juvenal Ndabarinze wayoboraga Uruganda rw’icyayi rwa Mata, umupolisi witwa Saba Athanase ndetse na Agoronome wa Komini Mubuga witwaga Innocent Bakundukize bari mu bagize uruhare rukomeye mu bwicanyi by’umwihariko bwibasiye Kibeho na Cyahinda, nk’uko tubikesha CNLG.

Visi Meya ushinzwe Ubukungu mu Karere ka Nyaruguru, Bisizi Antoine, warokotse ubwicanyi bwabereye i Kibeho, Cyahinda, Nkomero no ku Kanyaru mu zahoze ari Butare na Gikongoro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza