Kwamamaza

Uko umuhango wo gushyingura Senateri Jean de Dieu Mucyo wagenze (Amafoto na videos)

Yanditswe kuya 7-10-2016 saa 10:24' na Cyprien Niyomwungeri


Umuryango wa Senateri Jean de Dieu Mucyo, abo bakoranye, abo bakoranaga, inshuti ze n’abandi bamuzi; kuri uyu wa Gatanu tariki ya 7 Ukwakira 2016, ni umunsi udasanzwe kuko aribwo bamusezeyeho mu cyubahiro bwa nyuma mu muhango waranzwe no kurata ibigwi byamuranze mu minsi 20024 (imyaka 54, amezi 9 n’iminsi 26) yari amaze ku isi.

Senateri Jean de Dieu Mucyo yitabye Imana mu gitondo cyo kuwa Mbere tariki 3 Ukwakira 2016.

Abasenateri, Abadepite, ba Guverineri b’Intara, Abasirikare n’Abapolisi bakuru, abahanzi n’abandi bakoranye mu mirimo itandukanye bitabiriye uyu muhango wo kumusezerabo mu cyubahiro.

Uko uyu muhango wagenze umunota ku wundi...

- Senateri Jean de Dieu Mucyo ashyinguwe akurikiranye na Inyumba Aloysia, Shamakokera Tharcise na Christine Nyatanyi.

18:00: Umuhango wo gushyingura Senateri Jean de Dieu Mucyo urahumuje.

17:00: Isanduku irimo umurambo wa Senateri Jean de Dieu Mucyo imaze kururutswa.

16:30: I Rusororo… Abantu barenga ibihumbi bitanu bateraniye ku irimbi rusange ry’i Rusororo aho umubiri wa Senateri Jean de Dieu ugiye kuruhukira. Musenyeri Rukamba n’abandi bihayimana basengeye umurambo. By’umwihariko, Rukamba asabye Imana ko iha Jean de Dieu Mucyo ‘kuruhukana amahoro, ihe n’umugisha imva igiye kubika umubiri kugeza igihe azazukira akabaho iteka ryose nkuko yabyijeje abayemera’.

15:30: Igitambo cya Misa cyaberaga kuri Kiliziya ya Regina Pacis i Remera kirahumuje. Ubu imihango ikomereje ku irimbi rya Rusororo aho umubiri wa Senateri Jean de Dieu Mucyo ugiye kuruhukira.

15:00: Mu buhamya bwatanze bwibanze ku mibereho ye, ku bunyangamagayo, ku butwari no gufasha abandi baba abo mu muryango we n’igihugu muri rusange. Hanagaragajwe uburyo yitangaga mubyo akora byose haba mu kazi ndetse no mu bindi bikorwa bya kimuntu.

- Mu rusengero...

Abihayimana batandukanye bitabiriye uyu muhango
Agahinda ku maso y'abaherekeje bwa nyuma Senateri Mucyo
Senateri Jean Damascene Ntawukuriryayo mu misa yo gusezera kuri Jean de Dieu Mucyo
Musenyeri Rukamba yavuze ko Mucyo yakoreraga Imana ku Isi
Umuhanzi Senderi (iburyo) mu misa yo gusezera kuri Senateri Jean de Dieu Mucyo
Umugaba mukuru w'Ingabo z'u Rwanda, Gen Patrick Nyamvumba, ni umwe mu bitabiriye misa yo gusezeraho Jean de Dieu Mucyo nawe wigeze kuba umusirikare
Umunyamabanga Mukuru wa FPR Inkotanyi, Ngarambe Francois (iburyo) na Minisitiri w'Ingabo, Gen James Kabarebe, mu misa yo gusezeraho bwa nyuma Senateri Jean de Dieu Mucyo
Umuvunyi Mukuru, Aloysia Cyanzayire, nawe yaherekeje bwa nyuma Senateri Jean de Dieu nawe wakoze mu rwego rw'ubutabera mu gihe yari akiri ku Isi
Senateri Makuza Bernard mu misa yo gusezera kuri mugenzi we Jean de Dieu Mucyo
Minisitiri w’Umutungo Kamere ( Ubutaka, amashyamba, ibidukije n’ubucukuzi bw’amabuye y’agaciro),Dr Vincent Biruta mu Kiliziya yitiriwe Regina Pacis asezera kuri Senateri Jean de Dieu Mucyo
Depite Nkusi Juvenal (wifashe ku munwa) ni umwe mu baherekeje Senateri Jean de Dieu Mucyo
Minisitiri w'Umuco na Siporo, Uwacu Julienne; Minisitiri Kabarebe na Ngarambe mu Kiliziya yitiriwe umubyeyi w’Amahoro ‘Regina Pacis’ i Remera

14:00: Mu nyigisho yatanzwe n’Umushumba wa Diyoseze Gatolika ya Butare, Musenyeri Filipo Rukamba, yagaragaje uko Imana yakoresheje SenaterI Mucyo kugira ngo igaragaze ineza yayo mu bantu.

Yagize ati “Mucyo Jean de Dieu mu bintu byinshi yashinzwe n’igihugu harimo no kwita ku bacitse ku icumu rya Jenoside yakorewe Abatutsi bari barakomeretse ku mutima no ku mubiri, bafite inzara, bafite inyota, barwaye, abana badashobora kwiga na benshi mu babyeyi badashobora kwivuza. Imana yaramukoresheje kugira ngo igaragaze ineza yayo muri abo bantu bari bakennye, bari bababaye, batari bafite ikibavura, batari bafite uko babaho.”

13:30: Madamu Jeannette Kagame yifatanyije n’Umuryango, Inshuri n’Abayobozi batandukanye mu gusezera mu cyubahiro Senateri Jean de Dieu Mucyo mu misa yabereye muri Kiliziya ya Regina Pacis i Remera.

Madamu Jeannette Kagame ni umwe mu baherekeje Senateri Jean de Dieu Mucyo

13:10: Kiliziya ya Regina Pacis yuzuye mu buryo budasanzwe ku buryo abantu bamwe bahagaze hanze. Ku maso yabo biragaraga ko bababajwe n’urupfu rwa Senateri Jean de Dieu Mucyo.

Amafoto: Abantu bitegura guherekeza umurambo wa Senateri Jean de Dieu Mucyo mu Kiliziya ya Regina Pacis

Abantu bari mu cyumba cya Sena bitegura kwerekeza mu misa kuri Regina Pacis
Minisitiri w'Intebe, Anastase Murekezi; Perezida w'Urukiko rw'Ikirenga, Prof Sam Rugege na Perezida wa Sena, Bernard Makuza
Senateri Tito Rutaremara (ibumoso) n'Umugaba Mukuru w'Ingabo z'u Rwanda, Gen Patrick Nyamvumba
Umunyamabanga Mukuru wa FPR Inkotanyi, Ngarambe Francois

12:50: Umurambo wa Senateri Jean de Dieu Mucyo umaze kugezwa kuri Paruwasi yitiriwe Umubyeyi w’Amahoro ‘Regina Pacis’ i Remera.

- Amafoto yo gusezera Jean de Dieu Mucyo mu Nteko Ishinga Amategeko

Minisitiri w'Intebe, Anastase Murekezi, asezera bwa nyuma kuri Senateri Jean de Dieu Mucyo
Icyumba cy’Inama z’Inteko rusange ya Sena abantu bari benshi baje gusezera bwa nyuma kuri uyu munyapolitiki watabarutse
Byari ibihe by'akababaro gusezera bwa nyuma kuri Senateri Jean de Dieu Mucyo
Abantu batandukanye basezera bwa nyuma kuri Senateri Jean de Dieu Mucyo
Senateri Jean de Dieu Mucyo yasezeweho mu cyubahiro gikwiye umuntu witangiye igihugu

- Igikorwa cya nyuma Senateri Jean de Dieu Mucyo yagaragayemo

Hari tariki ya 01 Ukwakira 2016, ku munsi mukuru wo Gukunda Igihugu, ubwo hatangizwaga Icyumweru cy’Ubumwe n’Ubwiyunge.

Senateri Makuza ati “ Tuzi neza ko ubutumwa yatanze kuri uwo munsi bwamuranze, mu nshingano yahawe n’Igihugu.”

“Nyakubahwa, muvandimwe Hon. Mucyo, Abasenateri bagenzi bawe, natwe tukubuze twari tukigukeneye. Nyakubahwa, muvandimwe Hon. Mucyo, Abasenateri bagenzi bawe, natwe tukubuze twari tukigukeneye. Uretse imirimo dushinzwe twakoranye, kandi ukayitangira, ntituzibagirwa akanyamuneza n’urugwiro wahoranaga hagati muri twe.”

Imwe mu mafoto ya nyuma yafotowe Jean de Dieu Mucyo

12:20: Umuhango waberaga muri Sena urahumuje. Ubu hakurikiyeho igitambo cya Misa cyo kumusezeraho muri Paruwasi yitiriwe Umubyeyi w’Amahoro ‘Regina Pacis’ i Remera.

12:15: Mu bayobozi bahari, harimo Minisitiri w’intebe Anastase Murekezi; Perezida w’Urukiko rw’Ikirenga, Prof Sam Rugege; Perezida w’Inteko Ishinga Amategeko umutwe w’Abadepite, Mukabalisa Donatille; Perezida w’Inteko Ishinga Amategeko umutwe wa Sena, Bernard Makuza; abasirikare bakuru n’abapolisi bakuru, abasenateri, abadepite.

Hari kandi Umunyamabanga Mukuru wa RPF-Inkotanyi, François Ngarambe, Minisitiri muri Perezidansi, Venantia Tugireyezu; Umuyobozi Mukuru wa Polisi y’Igihugu, IGP Emmanuel Gasana; Minisitiri w’Ingabo, Gen Kabarebe James; Minisitiri Uwacu Julienne; Minisitiri w’Ubutabera, Johnston Busingye; Minisitiri w’Umutungo Kamere ( Ubutaka, amashyamba, ibidukije n’ubucukuzi bw’amabuye y’agaciro),Dr Vincent Biruta; Minisitiri w’Ubuzima, Dr Diane Gashumba.

12:10: Abari muri Sena, bahawe umwanya ngo basezere kuri Senateri Jean de Dieu Mucyo. Bande musicale ya polisi irimo kuririmba ari nako abateraniye mu Nteko bamusezeraho bwa nyuma. Iyi bande iri gucuranga indirimbo yitwa ‘J’espere en toi mon Dieu’.

12:00: Abantu bagera ku 150 nibo bari mu cyumba gikoreramo Sena. Mu ijambo risoza Sena iha icyubahiro Jean de Dieu Mucyo, Makuza agize ati “ Ntituzibagirwa akanyamuneza n’urugwiro wahoranaga hagati muri twe, tugusezeyeho mu cyubahiro uruhukire mu mahoro urabikwiye”
Makuza asoje avuga kandi ko Sena izakomeza kubanira abo mu muryango wa Jean de Dieu Mucyo.

11:30: Perezida wa Sena, Bernard Makuza akomoje ku butwari bwaranze Jean de Dieu Mucyo avuga ko Sena y’u Rwanda ibuze umuntu wabanaga neza.
Ati “Sena tuzakomeza kubanira neza umuryango we nkuko nawe yakomeje kubanira neza. Ni igihombo gikomeye kuri sena , umuryango we n’igihugu, yubahirwaga cyane kugira umwete n’impuhwe mu byo akora. Tuzahora tumuzirikana twishimira ibyamuranze mu bigwi bye.”

Ari muri bake babaye muri Guverinoma, urwego rw’ubutabera no mu Nteko Ishinga Amategeko kandi hose aratwa ibigwi bizira ubugwari

Ku munsi wo gukunda igihugu ubwo hatangizwaga icyumweru cy’ubumwe n’ubwiyunge nicyo gikorwa cya nyuma yitabiriye byagaragazaga ko yacengewe kandi yemera ubumwe n’ubwiyunge by’Abanyarwanda.

Ubwo umurambo wa Senateri Jean de Dieu Mucyo wari ugejejwe ku Kimihurura mu Ngora y'Inteko Ishinga Amategeko
Umurambo wa Senateri Jean de Dieu Mucyo ubwo wari ugejejwe mu ngoro y'Inteko Ishinga Amategeko umutwe wa Sena\
Bande musicale ya Polisi niyo yacuranze mu muhango wo gusezera Senateri Mucyo
Perezida wa Sena, Makuza Bernard, yavuze ko Mucyo yari umugabo witangira akazi ke

11:00: Umurambo wa Senateri Jean de Dieu Mucyo umaze kugezwa mu ngoro y’Inteko Ishinga Amategeko mu cyumba gikoreramo Umutwe wa Sena.

10:30 Abantu batandukanye bari kwerekeza ku Nteko Ishinga Amategeko mu Cyumba cy’Inteko Rusange ya Sena ahagiye gukomereza umuhango wo gusezera mu cyubahiro Senateri Jean de Dieu Mucyo.

10:00: Abari mu rugo rwe barimo kumusezeraho bwa nyuma baririmba indirimbo zizwi cyane muri Kiliziya Gatolika nka Mubyeyi ugira ibambe, Twaremewe kuzajya mu ijuru n’izindi.

9:30: Mu bice bikikije urugo rwe, uhereye kuri Stade Regional i Nyamirambo hagaragaraga imodoka nyinshi n’urujya n’uruza rw’abantu buje agahinda mu maso, amarira n’ikiniga batewe no kubura umugabo benshi bafataga nk’intwari.

Mu rugo rwe i Nyamirambo ubwo yasezerwagaho bwa nyuma

Uko gahunda yo kumusezeraho bwa nyuma iteye

Imihango yo kumuherekeza yatangiye kuva saa moya kugeza saa mbili hakirwa umurambo ku bitaro byitiriwe Umwami Faisal biherereye ku Kacyiru.

Senateri Mucyo yari amaze umwaka urenga gato ari Umusenateri ariyo mpamvu nyuma yo kumusezeraho mu rugo rwe hakurikiraho no kumusezeraho mu cyubahiro mu cyumba cy’Inama z’Inteko rusange ya Sena.

Nk’umukirisitu Gatolika, haraturwa igitambo cya Misa cyo kumusezeraho muri Paruwasi yitiriwe Umubyeyi w’Amahoro ‘Regina Pacis’ i Remera, hakurikireho gushyingura mu irimbi rya Rusororo.

Abantu batandukanye bitabiriye umuhango wo Senateri Jean de Dieu Mucyo
Senateri Jean Damascene Ntawukuriryayo nawe yitabiriye umuhango wo gusezera mugenzi we
Agahinda kagaragara ku maso y'abaje gusezeraho Mucyo
Mu nzira yerekeza ku rugo rwa Senateri Mucyo haragaragara imodoka nyinshi z'abantu bitabiriye umuhango wo kumusezeraho bwa nyuma
Abahanzi Senderi, Mariya Yohani, Bonhomme, Mibirizi na Grace bahimbiye Mucyo indirimbo bise ‘ Intwari ntipfa’

Urupfu rwa Senateri Jean de Dieu Mucyo

Kuwa Mbere tariki ya 3 Ukwakira 2016 nyuma y’amasaha make Senateri Mucyo yitabye Imana, Perezida wa Sena, Bernard Makuza, yabwiye IGIHE ko Mucyo yari amaze iminsi ameze neza nta kibazo afite.

Ati “ Yaje yitwaye mu modoka nk’ibisanzwe. Amaze iminsi ari mu kazi nta kibazo kuko n’ejo bundi yari mu ntara mu Ruhango.”

“ Yaje mu gitondo nkuko bisanzwe azamuka ajya mu biro agomba kuba yanyereye akikubita hasi. Agomba kuba yatsikiye kuri escalier. Nta muntu wari umuri inyuma ahubwo hari uwari umuri imbere. Uwo w’imbere yari amaze gukata yumva hari uwituye hasi inyuma ye asubira inyuma asanga ni Mucyo niko guhita ajyanwa kwa muganga.”

Yitabye Imana ahagana saa tatu n’iminota nk’icumi. Yari umuntu wubahiriza amasaha yaguye yitegura imirimo ya Komisiyo.”

Incamake y’Ubuzima bwa Senateri Jean De Dieu Mucyo

Senateri Mucyo ufite inkomoko mu Murenge wa Mbazi muri Butare, yavukiye i Nyanza mu Ntara y’Amajyepfo kuwa 07 Ukuboza 1961, yiga amashuri abanza ahitwa i Save mu 1967, arangiza amashuri yisumbuye mu 1980 ahita abona akazi muri Minisiteri y’Ubutabera.

Yatangiye kwiga muri Kaminuza y’u Rwanda mu 1985 arangiza mu 1990, aza kwiga icyiciro cya Gatatu cya kaminuza (Masters) mu 2012, aho yarangije mu bijyanye no gukumira Jenoside.

Jean de Dieu Mucyo yinjiye mu gisirikare mu 1994 nyuma yo kurokoka Jenoside yakorewe Abatutsi, aho yari yarahunganye n’abandi muri Hotel de Milles Collines.

Mu 1995 yahawe gukurira urwego rw’ubugenzacyaha muri Minisiteri y’Ubutabera, mu 1997-1998 agirwa Umucamanza wa gisirikare (Conseil de guerre) ariko izo nshingano akomeza kuzifatanya zombi.

Muri Gashyantare 1999 yagizwe Minisitiri w’Ubutabera kugeza mu 2003, ari nawo mwaka yavuye mu gisirikare ageze ku ipeti rya Kapiteni.

Kuva mu 2003 kugeza mu 2006, Jean de Dieu Mucyo yagizwe Umushinjacyaha Mukuru wa Repubulika, kuva mu mu 2006 kugeza mu 2007 ayobora Komisiyo yakoze raporo ku ruhare rw’Abafaransa muri Jenoside yakorewe abatutsi, inshingano yasoje agirwa Umunyamabanga Nshingwabikorwa wa Komisiyo y’Igihugu ishinzwe kurwanya Jenoside, CNLG, kugeza mu 2015.

Kuwa 29 Gicurasi 2015 nibwo Komisiyo y’Amatora yemeje ko Mucyo Jean de Dieu ariwe watorewe kuba senateri ahagarariye Intara y’Amajyepfo ku majwi 50.3%, icyo gihe akaba yari agiye kuziba icyuho cyari cyasizwe na Senateri Jean Damascene Bizimana wari wamusimbuye muri CNLG.

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved