Uko Nzambayire yigometse kuri Perefe Kayishema wari shebuja, akarokora Abatutsi muri Jenoside

Yanditswe na Evariste Nsengimana, Karirima A. Ngarambe
Kuya 30 Nyakanga 2019 saa 03:43
Yasuwe :
0 0

Mu gihe cya Jenoside yakorewe Abatutsi mu 1994, hari abanyarwanda bagiye bagaragaza ubutwari bwo kwitandukanye n’abahigaga bukware Abatutsi cyangwa abayobozi batangaga amabwiriza, abandi bakabahisha bazi neza ko ingaruka bishobora kubagiraho harimo no kwicwa.

Nzambayire Uzzias wanditse igitabo yise ‘Désobéir pour Sauver’ ugenekereje mu Kinyarwanda bishatse kuvuga ‘Kubahuka kugira ngo ukize’, gikubiyemo ubuhamya bw’ibyamubayeho n’ibyo yiboneye n’amaso ku mugambi wo gucura no gushyira mu bikorwa Jenoside yakorewe Abatutsi, mu yahoze ari Perefegitura ya Kibuye.

Uyu mugabo avuka muri mu yahoze ari Perefegitura ya Kibuye ndetse akaba mwene wabo na Dr Kayishema Clement wayiyoboye akagira uruhare muri Jenoside.

Uretse ayo masano ya hafi, Nzambayire yanabaye umushoferi w’iyo Perefegitura guhera mu 1992 n’igihe Dr Kayishema yari umuyobozi wayo.

Mu kiganiro yagiranye na IGIHE, Nzambayire yasobanuye byinshi mu byo yabonye mu mugambi wo gutegura no gushyira mu bikorwa Jenoside yakorewe Abatutsi n’uko yigometse ku bayobozi yari aberereye umushoferi kugira ngo abashe kurokora abatutsi bahigwaga bukware.

Ibimenyetso bya Jenoside muri Kibuye

Nzambayire wari umushoferi wa Perefe Kayishema yavuze ko mbere ya Jenoside yagendaga abona ibimenyetso byo gutegura Jenoside yakorewe Abatutsi nubwo nta washoboraga kumenya igihe izabera.

Ibyo abishingira ku bitero byagendaga bigabwa hirya no hino Abatutsi bakameneshwa mu 1991 na 1992. Nzambayire yibuka ibyabaye ubwo bajyaga mu Rutsiro guhosha ubwicanyi, gusenyera abatutsi no kubarira amatungo byari byahatangijwe.

Icyo gihe hoherejwe ingabo kurinda abaturage bari bahungiye kuri komini. Yajyanyeyo na Perefe Kayishema, akoresha inama abaturage abasobanuza ibiri kuhabera n’impamvu yabyo.

Nzambayire ati “Natangajwe n’umuturage wabwiye Perefe ngo ‘Ubu Bututsi buri kuri Komine yacu nimutabuhavana turabwica. Murebe ahandi mubujyana ntabwo tubushaka muri Komine yacu.”

Igitangaje ngo ni uburyo uwo muturage ntacyo Perefe yigeze amukoraho, bikaba igihamya ko hari abategetsi bari babyihishe inyuma.

Mu nzira bataha, Nzambayire yabajije Perefe Kayishema impamvu ntacyo yakoze ku muturage wavuze amagambo mabi, amusubiza mu muzimizo ati “Bariya batutsi benewanyu ujye ubabwira bangurire inzoga kuko ntabanga, iyo nza kubanga baba barashize.”

Ayo magambo yayibajijeho, cyane cyane kuba Perefe yaramubwiye ngo bariya batutsi bene wanyu kandi Nzambayire akomoka ku babyeyi b’Abahutu, biramuyobera.

Nzambayire yavuze ko bitarangiriye aho kuko nyuma y’urupfu rwa Perezida Habyarimana, muri Kibuye hakwirakwijwe igihuha ko hari ibyobo byacukuriwe kuzajugunywamo Abahutu.

Mu gitabo cye asobanuramo uburyo habayeho gukwirakwiza ibinyoma kugira ngo abaturage[Abahutu] barakare bihorere ku batutsi.

Nzambayire avuga ko mu ntangiriro za Jenoside yakorewe Abatutsi, ubwo yari avanye na Perefe Kayishema i Kirinda, basanze Abatutsi bari bahungiye muri Paruwasi ya Kibuye bahamaze icyumweru kirenga batewe n’abaturanyi babo. Perefe Kayishema ngo yarikomereje.

Urugendo rwarakomeje bagana kuri Stade Gatwaro ariko mbere y’uko bayigeraho banyura ku bagabo babiri baganira na Perefe Kayishema ku mpungenge bari batewe n’Abatutsi bari muri Stade.

Abo bagabo bamubwiye ko abo batutsi bababuza umutekano ndetse ko bazindutse bajya kwaka gerenade Burugumesitiri Karara ngo birinde ntibazihabwe.

Nzambayire ati “Natunguwe n’amagambo Kayishema yabwiye abo bagabo ‘Yababwiye ko bafata uwo mugabo wanze kubaha Grenade bakamushyira muri Stade agapfana n’Abatutsi. Ntabwo niyumvishaga ko abari bahungiye muri stade no muri Paruwasi bari bategereje gupfa, numvaga ko bategereje uburinzi.”

Yakomeje gutwara Perefe Kayishema bageze imbere amubaza kuri ayo magambo yumvise avuga n’icyo Abatutsi bakoze gituma bicwa, amusubiza ko ‘Abahutu barakajwe n’uko Perezida wabo yishwe n’Inkotanyi’.

Nzambayire yakomeje kumuhata ibabazo ati ‘Ese Perezida yishwe n’Abatutsi barimo hano muri Paruwasi no muri Stade’, Kayishema amwiyama ko atakomeza kumubaza ibibazo kuko ‘Abatutsi Leta n’Imana byabatanze bagomba kwicwa’.

Urugendo rwarakomeje bagera ku bitaro bya Kibuye, bahasanga imirambo irenga 15 y’abana n’abagore mu muhanda ariko harimo abana batemwe ntibapfe, bari kurira bonka imirambo y’ababyeyi babo.

Nzambayire ati “Maze kubibona nahise ngira isereri numva ntaye umutwe, nkurikije amagambo[Kayishema] yambwiriye kuri stade mbona ko nyine iby’Abatutsi byarangiye. Ndamubaza nti ibi ni ibiki?, yansubije ngo ‘Tugende se!”

Yamuhatirije gukomeza urugendo nyamara nta nzira ihari kuko umuhanda wari wuzuye imirambo, ashaka ko ayinyura hejuru. Yongeye kubaza Kayishema icyo bazize, amubaza niba nta buryo abana bakiri bazima bafashwa, bakajyanwa kwa muganga undi arabyanga.

Nzambayire yagerageje kubererekera iyo mirambo n’abana batarapfa, Kayishema akamwuka inabi ko agambiriye kumuta mu mukingo. Ati “Namubwiye ko ninkomeza gutwara ahantu nk’aho binganisha kuza gukora impanuka.”

Uko Nzambayire yigometse

Urugendo rwarakomeje bagera ku biro bya Perefegitura, Perefe Kayishema akomeza mu biro, aramukurikira amusigira imfunguzo z’imodoka ahita amusezera undi ntiyakoma.

Ati “Twasaga n’abarakaranyije, abona ko mbabaye nawe afite isoni zo kunsobanurira impamvu abantu bari kwicwa.”

Nzambayire yakomereje kwa Komanda wa Jandarumori, asanga ari kumwe na Burugumesitiri wa Komini Gitesi, ntiyabasuhuza ahubwo abuka umunabi ababaza ukuntu biyicariye abaturage bari kwicwa, baramwitegereza bamubwira ko ntacyo babikoraho mu gihe babuze Perefe Kayishema mu rugo no kuri Telefone.

Yabajije ukuntu Komanda ufite ingabo ayobora, abaturage bakomeza kwicwa, amusubiza ko Perefe atigeze amwaka ingabo n’abajandarume bo kurinda abaturage ngo abamwime.

Igisubizo yifuzaga sicyo yahawe, yahise abasiga aho yerekeza mu rugo, ahamagara Perefe Kayishema ariko yitabwa n’umugore we, amubaza aho umugabo we ari nubwo yari azi aho yamusize, undi amubwira ko ariwe bajyanye.

Ati “Mubwira ko maze kumenya ko[Kayishema] ari inyuma y’ubwicanyi nti ‘Mumenye amaraso y’Abatutsi muri kwica ko azabakoraho’ agiye kunsubiza nawe ati ‘Amagambo uvuze nubona atagukozeho ungaye!”

Abatutsi bari muri Stade no kuri Paruwasi batangiye kwicishwa imipanga, amasasu n’ibindi bikoresho ku wa 17 Mata.

Muri icyo gitabo Nzambayire yagarutse ku bitero byo mu Bisesero. Nyuma yo kwica Abatutsi bari muri Paruwasi ya Kibuye na Stade Gatwaro n’ahandi kuri iyo Perefegitura, bakurikijeho gutera mu Bisesero.

Icyo gihe Nzambayire yari yarahagaritse akazi, Perefe Kayishema atwarwa n’umusirikare.

Su-Perefe Gashongore yahamagaye Nzambayire amubwira ko akenewe kuri Perefegitura, gutwara imodoka yagombaga kwerekeza mu Bisesero, ijyanyeyo Interahamwe zigiye kwica.

Nzambayire yabasubije ati “Ariko muzi ko mutagira isoni, urugamba mwatangiye twararutangiranye? Munyihanganire ntabwo nshobora gutwara imodoka igiye kwica abaturage.”

Nzambayire avuga ko ubusanzwe atajyaga asubiza ibisubizo byuje uburakari no kwihenura ariko muri icyo gihe yabaye ikigomeke.

Nyuma Nzambayire yaje kubwirwa na Perefe Kayishema ngo ‘Amafaranga y’Inkotanyi mwariye muzayaruka’ kubera uburyo yabonaga atari kwifatanya nabo.

Uko yarokoye abahigwaga

Nzambayire ati “Nabashije kugira Abatutsi bake ndokora bagera ku munani mu ntangiriro ariko nyuma maze kubona uburinzi bw’Abafaransa ntangira kugira icyizere ko abantu banjye bashobora kubaho, ngerageza no kujya gushakisha abandi bakiri mu bihuru mbakuramo mbajyana iwanjye.”

Nyuma yo gukora icyo gikorwa cy’ubutwari, Nzambayire yamenyesheje ingabo z’Abafaransa ko ari kuzana abantu mu rugo iwe bakeneye ubufasha, ahisha abagera muri 26.

Ati “Bari[Abafaransa] banteguje ko bazaza bakamfata n’abantu banjye bakampungisha, baje basanga nagiye kureba umwana warokokeye muri Stade witwa Kayiranga aho nari naramuhishe, ngeze kuri Perefegitura mpura n’ijipe itwaye umugore wanjye n’abana babaga iwanjye abandi nahishe babasize.”

Yabajije Abafaransa impamvu abandi babasize, bamubwira ko batwara umuryango we gusa kuko kajugujugu yagombaga kubambutsa yari ntoya batajyamo bose.

Nzambayire yahise ababwira ngo ‘Sinshobora gusiga abantu banjye, naba nararuhiye iki ngiye bakabica?, ngiye kuguma hano mpfane nabo.”

Abafaransa bahise basohora n’umugore we babasubiza mu rugo ariko bamusezeranya ko bagaruka kumutwara saa moya z’umugoroba n’abo bantu yahishe, zigeze haje amakamyo na burende barurira ngo babahungishe.

Uko yatabarije Abatutsi mu Bisesero

Inyuma ku gitabo cye hagaragaraho ifoto y’abantu benshi hejuru yabo harimo kajugujugu. Ni ifoto yafashwe n’abanyamakuru, yifashishije agamije kugaragaza uruhare rwe mu gutabara abo mu Bisesero.

Ati “Iyo ndege ni njye watanze igitekerezo cyo gukoresha kajugujugu[Y’Abafaransa]. Bakomeje kuyishyiraho amananiza ubwa mbere mbabwira ko Bisesero ariho honyine dusigaje Abatutsi abandi bose babamaze ndahabarangira.”

Bwa mbere baragiye bageze ku Mubuga bumva amasasu menshi, babajije abaturage babwira ko ari Inkotanyi zirimo kurwana n’ingabo z’u Rwanda, Abafaransa bagaruka bavuga amabwiriza bafite, kurwanya uruhande urwo arirwo rwose bitarimo ariko Nzambayire agerageze kubumvisha ko ari abaturage bari kwicwa atari Inkotanyi nk’uko byavugwaga.

Bamwe muri abo banyamakuru baramushyigikiye bunga mu rye, bavuga ko imodoka zihora zijyayo ari iz’abasirikare ba Leta bari kwica abaturage ndetse biyemeza kujya kureba uko bimeze, batanga amakuru ko ari abaturage bicwaga.

Nzambayire yavuze ko Abafaransa batsimbaraye bakavuga ko batemerewe kwivanga mu mirwano, bamubaza icyakorwa ngo batabare bativanzemo abura icyo yabikoraho.

Avuga ko yahise yiruka ajya kureba Burugumesitiri Karara, amugezaho icyo gitekerezo cy’uko Abafaransa bifuza kujya gutabara abantu mu Bisesero ariko babuze uko bahagera kubera amasasu bari kumva.

Karara yamubwiye ko nibafata Kajugujugu bakahazenguruka, Interahamwe zigira ubwoba zikahahunga, abibwira abo Bafaransa barabikora, Abatutsi bahigwaga bahitamo kwegera abazungu.

Igihe cyarageze bagirana imishyikirano n’abihishe baraza. Abafaransa baje gushimira Nzamayire ku nama yabagiriye ariko bamubwira ko basanze Abatutsi babayeho mu buzima bubi bamwe barishwe n’inzara ndetse ko babimenyesheje u Bufaransa ngo bubagenere inkunga.

Nzambayire yababajije niba babasigiye abantu bo kubarinda ariko bamubwira ko nta bantu bahagije bafite, agira ubwoba bw’uko babica ariko bamuhumuriza ko baza gusubira kubarinda.

Nyuma yaje kubwirwa amakuru ko abo bahasize benshi bishwe hasigara abatageze kuri 880 mu babarirwaga mu bihumbi.

Yabaye inkuru y’incamugongo kuri Nzambayire nyuma y’imbaraga zishoboka yakoresheje ngo arebe ko barokoka ariko bikaba iby’ubusa.

Ntabwo yacitse intege kuko yahise abwira abo bafaransa ko hari ahandi hantu azi Interahamwe zafashe bugwate abana b’abakobwa, mu macumbi ya Rwagasirika, berekezayo bahagera saa sita z’ijiro barabarokora, bahita babajyana mu Nkambi ya Nyarushishi.

Ati “Icyanteye kwigomeka no kugira umutima w’ikihebe ni hariya nageze munsi y’ibitaro nkahasanga imirambo myinshi n’abana bakiri bazima, bonka amabere ya ba nyina bishwe, tukabanyuraho tugatambuka Kayishema na we afite abana, agatinyuka agafunga amaso.”

Nzambayire kandi avuga ko mu gihe Jenoside yakorwaga, hari inkuru yanditse agaragaza ko Kayishema ari kwica no kwicisha abatutsi muri Kibuye.
Ibihumbi by’abatutsi muri perefegitura ya Kibuye bishwe ku mategeko ya Kayishema wahayoboraga. Muri Stade Gatwaro honyine hiciwe abatutsi basaga ibihumbi 15.

Kayishema yakatiwe n’urukiko Mpuzamahanga Rwashyiriweho u Rwanda, ICTR, gufungwa burundu kuwa 21 Gicurasi 1999 nyuma yo guhamwa n’ibyaha bine bya Jenoside. Yaguye muri gereza muri Mali mu Ukwakira 2016.

Nzambayire yarenze ku bitekerezo by'umukoresha we mu mugambi wo gukora Jenoside
Nzambayire yanditse igitabo 'Désobéir pour Sauver' kigaruka ku buzima yanyuzemo
Nzambayire mu kiganiro n'umunyamakuru Karirima Aimable mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza