Kwamamaza

Uko Kayitare yarokoye Abatutsi 30, akarera imfubyi zisaga 20 agendera mu kagare

Yanditswe kuya 30-08-2016 saa 17:47' na Emma-Marie Umurerwa


Nubwo ku bigaragara nta mabaraga z’umubiri yari afite kubera ko yamugariye ku rugamba, Kayitare Gaita yabashije kurokora abatutsi bagera kuri 30 mu gihe cya Jenoside, igikorwa cy’ubutwari ashimirwa na benshi.

Kayitare w’imyaka 52 y’amavuko, atuye mu Kagari ka Kamashashi mu Murenge wa Nyarugunga mu Karere ka Kicukiro, akaba avuka mu Karere ka Nyamasheke.
Agendera mu kagare k’abafite umubuga nyuma yo kumugarira mu gisirikare mbere ya 1990.

Mu kiganiro yagiranye na IGIHE, yavuze ko nubwo yahuye n’ibizazane bitandukanye mu buzima, bitamubujije kugira umutima wa kimuntu no gukora ibikorwa by’ubutwari ashimirwa na benshi.

Kayitare afite ubumuga bw’ingingo yakuye mu gisirikare cy’u Rwanda yinjiyemo mu 1983, aho mu mwaka wa 1993 yatangiye kugendera mu igare afasha abaganga bo mu bitaro bya gisirikare bya Kanombe.

Avuga ko mu 1990 yabonaga uburyo abatutsi barenganwa, ndetse bagakorerwa n’ihohoterwa ritandukanye, bigeze mu 1994 ho biba akarusho.

Yagi ati «Indege yari itwaye Habyarimana nayibonye ikongoka, dore ko nari ntuye i Kanombe. Nahise njya mu bitaro bya Kanombe aho nakoraga kuko hari abantu bahigwaga bari baharwariye njya kureba uburyo nagerageza kubahisha. »

Ubwo yabonaga ibintu birushaho gukomera, yafashe icyemezo cyo kubahungana berekeza i Butare ariko na ho basanga ari nko guhungira ubwayi mu kigunda, icyakora ahakura abandi bakomeza berekeza i Cyangugu ahitwa i Gihundwe, ubu ni mu Karere ka Rusizi.

Nk’uko akomeza abivuga ngo abo bari kumwe abita intwari kuko bamufashaga bakamusunikira akagare yagenderagamo.

Ati «Si ubushobozi bwanjye, abantu Imana yamfashije kurokora bose hamwe ni 30, nari umusirikare usanzwe wo ku rwego rwa caporal, nta zindi mbaraga zidasazwe nari mfite.»

Urukundo akunda abana rwatumye aba se w’imfubyi

Jenoside yakorewe Abatutsi irangiye, Kayitare hamwe n’abo yarokoye bagarutse mu Mujyi wa Kigali, atangira ubucuruzi abifashijwemo n’umuvandimwe we akaba yari afite intego yo kuzirikana imfubyi.

Ati “Ubwo nari mfite umuvandimwe wari umaze gutahuka, aramfasha ampa amafaranga ibihumbi 21 ndacuruza, ariko hari n’abandi bagiye bamfasha. Maze kubona amafaranga mbonye uko mbaho, ndavuga ngo umuhigo wanjye wa mbere ni ukuzayasangira n’imfubyi n’abadafite kivurira.”

Akomeza agira ati “Nkunda abana cyane, ngakunda n’ibidukikije. Ni muri urwo rwego nafashe icyemezo cyo kujya nakira umwana umwe buri mwaka. Ubu bamwe barangije amashuri yisumbuye ndetse na kaminuza, ariko iyo umwe avuyemo mfata undi bityo bityo. Ubu abana bamaze kunyura imbere yanjye barenga 20 harimo abo dufitanye isano n’abo nagiye ntoragura.”

Nyirahategekimana Marie Josée, mwishywa wa Kayitare, avuga ko yatangiye kumurera afite imyaka ine y’amavuko, ubu akaba afite 28.

Yagize ati «Hari abana benshi yafashije ari abo bafitanye isano hamwe n’abo batayifitanye kandi twese agakurikirana uburyo tubaho n’uburyo twiga. Ubu nkanjye narangije Kaminuza. Umuntu wese wabuze aho ajya aramutoragura akamurera. »

Akomeza avuga ko icyo yigiye kuri Kayitare, ari umutima w’urukundo ahorana, gutega amatwi ababaye n’abadafite shinge na rugero, akabiyegereza bagasangira bicye afite.

Kayitare ni umwunzi mu Murenge wa Nyarugunga, akaba n’umurinzi w’igihango

Abaturage bashingiye ku bikorwa by’indashyikirwa yagiye akora, bamutoreye kuba umwe mu bagize komite y’Abunzi mu Murenge wa Nyarugunga, uyu mwanya akaba awumazeho igihe kitari gito. Mu muganda rusange usoza ukwezi kwa Kanama 2016, Kayitare yatorewe kuba umurinzi w’igihango.

Icyo yifuza n’ubutumwa yageneye abafite ubumuga

Kayitare yifuza kubona abantu abantu batekanye, bakagira ubumwe bakiyunga, kandi akazasiga inkuru nziza n’umurage muzima imusozi.

Akomeza avuga ko abafite ubumuga badakwiye kubyitwaza, ngo bibatere kwirambirwa.

Ati « Ubumuga bubi ni ukudatekereza, ubutumwa nabaha ni ukutiheba no kutirambirwa, kuko abafite amaguru bose siko babyina, abafite amaboko bose siko bakora ibyiza, abafite amaso ntibahitamo ibyo bareba, abafite amatwi ntibumva ibyo bashaka. Niyo mpamvu abadafite ingingo zimwe na zimwe dukwiye kumva ko nta mpamvu yo kwiheba. »

Kayitare ashimirwa kuba yaragize uruhare mu kurokora Abatutsi bagera kuri 30 mu gihe cya Jenoside
Nyirahategekimana Marie Josée, umwe mu barezwe na Kayitare

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved