Uko ibitangazamakuru rutwitsi ‘Kangura na RTLM’ byabaye umusemburo wa Jenoside yakorewe Abatutsi

Yanditswe na David Eugène Marshall
Kuya 13 Mata 2018 saa 08:03
Yasuwe :
1 0

Abahanga mu by’itangazamakuru bemeza ko iyo rikoreshejwe neza rihinduka umuyoboro w’amajyambere arambye, kuko rituma abaturage bamenya ibibera hirya no hino mu gihugu no ku Isi, bakanamenya aho inyungu zabo ziherereye n’aho zitari, bakamenya uruhare rwabo mu majyambere yabo bwite n’ay’igihugu muri rusange, bityo bikabafasha guharanira imibereho myiza.

Gusa ibi byose ntibyagerwaho abaturage n’igihugu kidafite amahoro n’umutekano, ari yo mpamvu itangazamakuru mbere na mbere rigomba kubiharanira mu mikorere yaryo ya buri munsi bigasasirwa na politiki nziza rikoreramo.

Bisobanuye ko iyo politiki ibaye mbi naryo rihinduka intwaro isenya. Ibi si inshoberamahanga ku Banyarwanda kuko itangazamakuru rutwitsi rya Kangura na RTLM ryakoreshejwe nk’ikivumbikisho cya Jenoside yakorewe Abatutsi mu 1994, igahitana abarenga miliyoni.

Si umugani itangazamakuru mu Rwanda ryagize uruhare rugaragara muri Jenoside. Ubumara bwaryo bwigaragaje cyane hagati ya 1990-1994, ubwo mu gihugu hari inkundura yo kwanga kuyobozwa igitugu n’ishyaka rukumbi ryari ku butegetsi mu Rwanda (MRND).

Yari inkundura yari iyobowe n’amashyaka ataravugaga rumwe na Habyarimana ku ruhande rumwe, mu gihe kandi mu gace k’amajyaruguru y’u Rwanda, urugamba rwari ruhinanye hagati y’Ingabo zari iza leta (FAR), n’izahoze ari iza FPR-Inkotanyi.

RTLM

Radio Télévision Libre des Mille Collines (RTLM), yari Radiyo yatangiye kuvuga ku wa 8 Nyakanga 1993 ariko yagize uruhare rugaragara muri Jenoside hagati ya Mata na Nyakanga 1994.

Itangira yahawe akabyininiro ka ‘Radiyo Rutwitsi’ ikaba yari ifite studio n’iminara yayo mu nyubako ziri ahari Car-Free-Zone magingo aya. Iyi Radio yumvwaga n’abaturage benshi cyane, byatumye ikwirakwiza urwango mu buryo bworoshye. Mu bintu byatumye ubwicanyi bugira imbaraga kandi bugakwirakwira vuba, harimo amagambo y’ikangura yavugirwaga kuri iyi Radiyo.

RTLM yatangiye ibiganiro yigisha amacakubiri, ariko ikajya isa n’ibigira mu rwenya, gusa abantu bagenda bavumbura imigambi yayo uko abanyamakuru bayo bacishagaho inyigisho zihembera amacakubiri.

Amwe mu magambo yatambukaga kuri RTLM harimo ngo “Abatutsi mwa nyenzi mwe tuzabica”, ayo magambo yo kubiba urwango yateye impaka mu biganiro bya Arusha, ahaberaga imishyikiraho y’amahoro abatavuga rumwe na Habyarimana baje gusaba ko iyo Radiyo yafungwa maze uwari umuyobozi wayo Ferdinand Nahimana avuga ko iyo Radiyo yashyizweho kugira ngo irwanye Radiyo Muhabura yari iya FPR-Inkotanyi, ariko byabaga ari nko kuyobya uburari.

Nyuma yo guhanurwa kw’indege ya Habyarimana ku ya 6 Mata 1994 RTLM yakanguriye rubanda ko Abatutsi bigometse ari bo bakoze ayo mahano maze ihamagarira abantu icyo yitaga intambara ya nyuma yo gutsemba Abatutsi. Imvugo yasubirwagamo kenshi ni iyo “Gutema ibiti birebire”.

Umunyamakuru wayo Habimana Kantano yavugiye kuri iyi Radiyo ati “Aho bukera muri Kigali haraba akantu”.

Kalisa Callixte yazize kwima RTLM iminara

Désire Rugenera umenyerewe mu mwuga w’Itangazamakuru wanakoreye ORINFOR (yahindutse RBA) mu bihe byakurikiye Jenoside yakorewe Abatutsi, avuga ko n’ubwo atari umunyamakuru mbere ya 1994, ariko yakurikiraniraga bugufi ibiriberamo.

Aganira na IGIHE yagize ati “Muri duke nashoboye kumenya kubireba RTLM ni uko yigeze gushaka gufungura ishami rya Televiziyo, ariko igashaka kuzajya ikoresha iminara n’ibyuma bya Radiyo Rwanda, uwitwa Kalisa Callixte wari umutekinisiye kuri Radiyo Rwanda akabyanga, bukeye agasanga gerenade imbere yiwe, RTLM imuhigira hasi kubura hejuru aza no kwicwa”.

Kangura ya Ngeze yarabiciye biracika

Kangura yaterwaga inkunga n’abasirikare bakuru, abayobozi ba MRND n’urwego rw’igihugu rwari rushinzwe iperereza barimo Lieutenant-Col Anatole Nsengiyumva na Protais Zigiranyirazo bakaba kugeza ubu aba babiri baramaze gukatirwa n’Urukiko Mpuzamahanga Mpanabyaha rwashyiriweho u Rwanda rw’i Arusha.

Byagaragaye ko Kangura yakoreshwaga n’ubutegetsi bwariho ku buryo babwiraga abanditsi bayo bimwe mu byo benda gukora, abanditsi bakabimenya na mbere y’uko biba nk’uko umunyamakuru w’umunyakenya Mary Kamani abivuga.

Kangura ya Ngeze Hassan nawe wakatiwe n’Urukiko rwa Arusha, yari yarakataje mu kubiba urwango dore ko yananditse amategeko 10 y’abahutu muri icyo kinyamakuru cye, ayo mategeko ari no mu byifashishijwe mu gukongeza ingengabitekerezo y’urwango rugamije kwangisha abahutu abatutsi.

Ayo mategeko yahamyaga ko Umuhutu wese ugira icyo akorana n’Umututsi ari umugambanyi.

Imwe mu nyandiko yigeze gusohoka muri nimero idasanzwe ya Kangura, yari ifite inyito ngo: “Uwagarura revolusiyo ya 1959 y’abahutu kugira ngo dutsinde inyenzi-ntutsi”.

Muri ibi byose ariko, ntawabura no kuvuga ku bakoraga umwuga w’Itangazamakuru nka ba; Noheli Hitimana wakoreraga iyi RTLM, Habimana Kantano, Valéry Bemeriki na George Ruggiu bijanditse mu bikorwa byo gukwirakwiza urwango bibasira abatutsi, hamwe no kurimbura benshi muri bo bari bahuje umwuga.

Ferdinand Nahimana wari Umuyobozi wa RTLM
Umunara RTLM yakoreshaga ugaragara hejuru y'inyubako ziri mu Mujyi rwagati ahazwi nka Car Free Zone

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza