Uko byagenze ku yandi masezerano y’amahoro u Rwanda rwasinyanye na Uganda: Inkuru igaruka ku mateka

Yanditswe na Philbert Girinema
Kuya 26 Kanama 2019 saa 09:36
Yasuwe :
0 0

Kujya mu mitsi hagati y’u Rwanda na Uganda si ibya none kuko magingo aya imyaka irenga 20 yihiritse ishyamba atari ryeru hagati y’ibihugu byombi. Guterana amagambo akarishye hari naho byagiye bishyirwa ku ruhande, hakabaho gutsinsurana hifashishijwe umututu w’imbunda. Ubugira gatatu Uganda yarahavunikiye, ingabo zayo zikubitwa inshuro n’iz’u Rwanda.

Muri iyi myaka irenga 20 yaranzwe n’ubwumvikane bucye, hagati ya Uganda n’u Rwanda hasinywe amasezerano yo guhosha ubwumvikane buke arenga atanu yiyongereyeho andi aheruka yashyiriweho umukono i Luanda muri Angola.

Muri aya yose yasinywe harimo ayabaga areba u Rwanda na Uganda byonyine, kimwe n’andi yabaga areba ibi bihugu byombi hamwe n’ibindi by’ibituranyi.

Urugero ni nk’ayiswe ‘Lusaka Agreement’ yasinywe mu 1999 agamije guhosha ubushyamirane bwari bumaze igihe muri Repubulika Iharanira Demokarasi ya Congo.

Icyo gihe ku wa 19 Nyakanga 1999 yasinyiwe muri RDC n’ibihugu birimo u Rwanda, Angola, Namibia, Uganda, Rwanda na Zimbabwe.

Aya masezerano ya Lusaka yari uburyo bumwe bwonyine bwari busigaye bwo guhosha ubwumvikane buke hagati y’ibihugu, aho intambara yo muri Congo yashyizweho akadomo biyaturutseho.

Harimo andi yasinywe na ba Minisitiri b’Ingabo hagati y’ibihugu byombi agamije kubaka icyizere hagati y’inzego zose nk’imwe mu nzira zo gukuraho ubushyamirane bwari bumaze igihe hagati y’ibihugu byombi.

Aya masezerano yasinywe mu 2002 i Kampala, Amama Mbabazi ariwe uhagarariye Uganda mu gihe ku ruhande rw’u Rwanda yari Brig Gen Emmanuel Habyarimana.

Aya y’i Kampala ajya gusinywa, yari akurikiye inama nyinshi z’abakuru b’ibihugu byombi zabereye mu Rwanda, Uganda ndetse no mu Bwongereza i Londres.

Uko u Bwongereza bwinjiye mu kibazo

Inyandiko y’Ubutasi bw’u Bwongereza yo mu 2000, ivuga ko muri Gicurasi uwo mwaka, imirwano yakajije umurego yagati y’Ingabo z’u Rwanda n’iza Uganda zari muri RDC mu ntambara yo gutsinsura imitwe yitwaje intwaro yaterwaga inkunga na Laurent Désiré Kabila.

Iyi nyandiko ivuga ko ibihugu byombi bitumvikanaga ku murongo wo gukurikizwa, aho Uganda yashinjaga u Rwanda gushaka gushyira muri RDC ubutegetsi “bumeze nk’igipupe”. Iyo ntambara bivugwa ko yaguyemo abasirikare bagera ku bihumbi bibiri ba Uganda, gusa muri uko kwezi hagati, abayobozi ku mpande zombi baje guhura agahenge gasa n’akabonetse.

Nibwo hasinywe amasezerano asaba ibihugu byombi gukura ingabo zabyo muri RDC, intambara ya Kisangani isozwa ityo ariko Uganda ihatakarije abasirikare benshi.

Muri Kanama 2001, Museveni yandikiye uwari Minisitiri w’Iterambere w’u Bwongereza, Clare Short, ibaruwa ndende imusaba ko igihugu cye cyakongera inkunga igenerwa igisirikare cya Uganda kubera umutekano muke mu karere, icyo gihe yasabaga ko inkunga igenerwa igisirikare yarenga 1.9% mu ngengo y’imari bingana na miliyoni $110 ku mwaka.

Muri iyi baruwa, Museveni yashinje u Rwanda ko ruri guha imyitozo urubyiruko rw’Abagande rushaka gutera igihugu cye.

Ati “Uribuka mbere y’uko uza hano, nagiye mu Rwanda mpurira na Kagame ku mupaka, ku ruhande rw’u Rwanda. Muri iyo nama, twemeranyije ko abarwanya ubutegetsi b’ibihugu byombi usibye no kuba badakwiye gufashwa na guverinoma, ntibanakwiriye no kwemererwa kugira ibikorwa bakorera ku butaka bw’igihugu bigamije inabi ku kindi.”

Yahereye aha avuga ko u Rwanda rwabirenzeho rugafasha abashaka kugirira nabi igihugu cye, afatira kuri iyo ngingo amenyesha Short ibintu bibiri: icya mbere uko ibintu bihagaze, ikindi inkunga yo kongerera ingufu igisirikare cye.

Perezida Yoweri Museveni ari kumwe na mugenzi we w’u Rwanda, Paul Kagame ubwo baganiraga n’itangazamakuru nyuma y’ibiganiro byabo byabereye i Gatuna ku wa 06 Nyakanga 2001 byari bigamije guhosha ubwumvikane buke bwari hagati y’impande zombi muri icyo gihe

Ibaruwa ya Museveni yari ihatse iki?

Albert Rudatsimburwa asobanura ko ibaruwa Museveni yandikiye Clare Short yari ifite ikibazo gikomeye kuko ubwabyo bitumvikana ukuntu Umukuru w’Igihugu arega mugenzi we kuri Minisitiri aho kuba ku wundi mu Perezida.

Ati “Perezida, umukuru w’igihugu yandikiye Umuminisitiri muto arega Perezida wundi, mu buryo ibintu bikorwa ntabwo ibyo bibaho. Nibura yari kwandikira nka Minisitiri w’Intebe, wandika ku rwego rwawe, ntabwo upfa kwandika.”

Icyo gihe u Bwongereza bwayoborwaga na Tony Blair, Clare Short nta mubano wihariye yari afitanye n’u Rwanda ariko nyuma y’iyo baruwa, hatangiye ibiganiro byayikurikiye, byaje no kuvamo amasezerano yo guhosha umwuka mubi.

Iyo baruwa ijya kwandika, u Rwanda narwo rwari rufite byinshi rushinja Uganda harimo gufasha abashaka guhungabanya ubutegetsi ibintu byari byaratangiye mu myaka ya 1996 bikaza umurego mu 1998 ubwo Seth Sendashonga yashakaga guhirika ubutegetsi bw’u Rwanda afashijwe na Uganda.

Mbere y’iyo baruwa kandi, muri Nyakanga 2002, abanyarwanda bagera kuri 50 bagiye kureba Museveni, bamugezaho ikibazo cy’ihohoterwa bakorerwa n’Urwego rw’Ubutasi mu Gisirikare, CMI, hamwe n’Urwego rushinzwe Umutekano w’Imbere mu gihugu, ISO.

Inkuru ya Daily Monitor yo ku wa 5 Nyakanga 2002 yavugaga ibyabaye iminsi itatu mbere y’iyo tariki, ko Abanyarwanda umunani batawe muri yombi bagafungwa. Ivuga kandi ko abanyarwanda 20 bafashwe binyuranye n’amategeko kuko bafunzwe bakamara amasaha arenga 48 bataragezwa imbere y’ubutabera.

Icyo gihe Perezida Kagame mu kiganiro yagiranye na Andrew Mwenda wakoreraga Monitor FM, yagize ati “Nabwiwe uburyo abanyarwanda bari gufatirwa i Kampala na Bikuubo, aho babonwe hose, yewe n’abantu bari kwerekeza Entebbe. Barabona uri Umunyarwanda, bakakwambura, bagasaka ibikapu byawe, buri kimwe cyose bakagishyira hanze.”

Icyo gihe ibinyamakuru byinshi byanditse ko Museveni yanditse iyo baruwa ku mpamvu zo gusaba inkunga, kuko u Bwongereza bwari igihugu gikomeye gifasha Uganda bikaba byari mu murongo wo kugaragaza ibibazo afite.

Kagame na Museveni imbonankubone mu biganiro by’amasaha atandatu

Mu gitabo cya Emily Paddon Rhoads cyitwa ‘Taking Sides in Peacekeeping’ avugamo ko icyo gihe u Bwongereza nta mubano ukomeye bwari bufitanye n’u Rwanda.

Gusa ngo Short yahise atangira kureba uko yakwiyegereza Perezida Paul Kagame, ku buryo kuva ibibazo by’u Rwanda na Uganda byafata ubukana hagati ya 1997 na 2003, yatangiye kugirira ingendo i Kigali, ndetse nibura ngo bombi bavuganaga kuri telefoni buri cyumweru.

Short yahuje Kagame na Museveni mu Bwongereza mu nama yamaze amasaha atandatu, nyuma abakuru b’ibihugu bongera guhura bombi yaba mu Rwanda no muri Uganda, umwaka ushira bahuye gatanu.

Icyo gihe basoje hanzuwe ibijya gusa n’ibyabereye i Luanda, hazamo agahenge gake kuko icyari kigamijwe ari uko ibihugu byombi bitagirana intambara.

Umwarimu muri Kaminuza y’u Rwanda, Dr Kayumba Christophe avuga ko amasezerano yasinywe nyuma y’intambara ya Kisangani, hari icyo yafashije.

Ati “Ntabwo navuga ko atageze ku byari bigamijwe kuko icyo gihe ayo makimbirane abantu batekerezaga ko yanavamo ko u Rwanda rwarwana na Uganda ako kanya ariko ntibyabaye ahubwo ibihugu byongeye gukorana ndetse abakuru b’ibihugu bagabirana inka.”

Inyandiko nyinshi zigaragaza ko Clare Short atari asanzwe afitanye umubano n’u Rwanda, gusa kubera ibibazo by’u Rwanda na Uganda, ngo yatangiye kwiyegereza Perezida Kagame

Ibirego byo mu 2000 bisa n’ibyisubiyemo

Mu myaka ya 2000 yaba u Rwanda na Uganda, buri gihugu cyashinjaga ikindi gufasha abashaka guhungabanya umutekano w’ikindi, gusa ubu u Rwanda nirwo rubishinja Uganda.

Dr Kayumba avuga ko impamvu muri iki gihe u Rwanda rudashinjwa ibi, bijyanye n’uko politiki y’ububanyi n’amahanga yarwo yahindutse cyane aho rudashaka ikintu cyose cyarusiga icyasha.

Ati “Muri politiki y’u Rwanda hahindutse ikintu kinini, bijyanye n’izina Perezida Kagame amaze kubaka muri Afurika, kuko ubu niwe ukurikiye komisiyo ifasha mu mavugurura ya AU kandi ubu u Rwanda nta na hamwe barurega ko rushyigikiye abarwanya Uganda kandi narwo rubishatse rwabikora kuko barahari.”

“No muri iki kibazo, Kagame niwe wafashe iya mbere kugira ngo ashake uko cyakemuka binyuze mu mahoro, uziko na Perezida wa Kenya yigeze kuza hano ndetse n’aba bahuza hari benshi bavuga ko Kagame yabibanyuriyemo ngo bakemure iki kibazo.”

Yakomeje avuga ko na mbere y’ubu buhuza, hashyizweho ihuriro ry’ibihugu bitatu rigamije kurwanya imitwe irwanira muri RDC rihuriweho n’u Rwanda, RDC na Angola.

Akomeza agira ati “Uwo murongo wa Kagame, njye mbona wari ugamije gushaka kugumishaho biriya bikorwa byiza byose yagezeho muri Afurika, umuyobozi ushaka ko Afurika yikemurira ibibazo.”

Gusa ngo ku rundi ruhande “kuva mu 2000, imikorere ya Museveni nibaza ko itahindutse, niyo mpamvu akiregwa ko ashyigikiye imitwe yitwaye intwaro, arashaka kugumana icyubahiro binyuze mu mitwe yitwaje intwaro, izo politiki zombi ziratandukanye”.

Na mbere amasezerano nta kinini yagezeho

Umusesenguzi mu bya politiki n’umwanditsi, Gatete Thierry, avuga ko hari byinshi byari mu masezerano ya mbere, ariko bitubahirijwe na Uganda ari nayo mpamvu nta cyizere cy’uko n’aya azubahirizwa.

Abishingira ku kuba Uganda yaremeye gufasha Kayumba Nyamwasa n’abandi barwanya ubutegetsi bw’u Rwanda mu gihe mu masezerano ya mbere byari bibujijwe gufasha abarwanya ubutegetsi bw’ikindi gihugu.

Avuga ko Uganda idateze kureka gufasha RNC n’indi mitwe kuko byo ubwabyo byayibera ikibazo gikomeye bitewe n’ubufasha imaze kuyiha kuko bisa naho itumvise umugani wa Kinyarwanda uvuga ngo “inkoni ikubise mukeba uyirenza urugo”.

Atanga urugero rw’uburyo FLDR yakirijwe yombi muri RDC, u Rwanda rwashaka gusaba Congo kuyitsinsura ikinangira nyuma, “abarwanyi bayo batangiye gufata ku ngufu, kwica urubozo abanye-Congo”.

Ati “Na RNC ubona hariya ukuntu Uganda yayifashe neza, yari iziko iri guhima u Rwanda, Uganda iramutse yumvikanye n’u Rwanda ntabwo RNC [Uganda] yayikira kandi ariyo yayizaniye. Umutego mubi ushibukana nyirawo. Kwirahuriraho amakara, ni wowe atwika. Biragoye ko [Uganda] yakwitandukanya na bariya bantu.”

Kuri Albert Rudatsimburwa, asanga nubwo hari amasezerano yagiye asinywa, hari “akantu gakomeza kugaruka”.

Ku kibuga cy’indege cya Bangoka i Kisangani, ni hamwe mu ho ingabo z’u Rwanda zarasiye bikomeye iza Uganda birangira RPA igifashe mu maboko. Umunsi umwe ingabo z’u Rwanda zaharasiye indege ya Uganda, abasirikare babiri barimo barapfa, barindwi barakomereka
I Kisangani habereye imirwano ikomeye ubugira gatatu, birangira ingabo z’u Rwanda zinesheje iza Uganda gusa amasezerano yasinywe n’ibihugu byombi niyo yagaruye agahenge
Gen Kazini niwe wari uyoboye Ingabo za Uganda ubwo zakubitwaga inshuro n'iz'u Rwanda i Kisangani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza