Uko amatora y’abahagarariye FPR Inkotanyi ku rwego rw’Intara n’Umujyi wa Kigali yagenze

Yanditswe na Habimana James, Hakizimana Jean Paul
Kuya 15 Kamena 2019 saa 09:10
Yasuwe :
0 0

Abanyamuryango ba FPR Inkotanyi kuri uyu wa Gatandatu bazindukiye mu matora y’abagize komite nyobozi ku rwego rw’Intara n’Umujyi wa Kigali.

Muri aya matora hatowe umuyobozi wa FRP-Inkotanyi ku rwego rw’Intara, uhagarariye abagore n’uhagarariye urubyiruko.

Mu Ntara y’Iburasirazuba, Mufulukye Fred, uyiyobora yatorewe kuyobora umuryango wa FPR-Inkotanyi, uhagarariye urubyiruko yabaye Muhire Alexis naho uhagarariye urugaga rw’abagore aba Kayitesi Mireille.

Mu Ntara y’Amajyepfo, Umuyobozi wa FPR-Inkotanyi ni Vuganeza Aloni, uhagarariye Urubyiruko ni Umutesi Jackline, naho uhagarariye urugaga rw’abagore yabaye Kayitesi Anonciata.

Mu Mujyi wa Kigali, Rwakazina Marie Chantal yatorewe kuyobora Umuryango wa FPR-Inkotanyi, uhagarariye urubyiruko hatowe Sabato Iradukunda naho uhagarariye urugaga rw’abagore hatowe Cecile Uwamariya.

Mu Ntara y’u Burengerazuba ku mwanya w’Umuyobozi w’Umuryango wa FPR-Inkotanyi, hatowe Munyantwari Alphonse, uhagarariye urubyiruko yabaye Abdulmadjid Bapfakurera naho uhagarariye urugaga rw’abagore hatorwa Nyiramana Peruth.

Mu Ntara y’Amajyaruguru hatowe Gatabazi Jean Marie Vianney, nk’umuyobozi w’Umuryango FPR Inkotanyi, uhagarariye urubyiruko yabaye Byiringiro Robert naho uhagariye abagore aba Akimpaye Christine.

Mufulukye Fred watorewe kuyobora umuryango wa FPR-Inkotanyi mu Ntara y’Iburasirazuba, yashimiye abanyamuryango ku cyizere bamugiriye abizeza ko atazabatenguha.

Yagize ati “Icyo nzibandaho cyane ni ukwibutsa no gufasha abanyamuryango kumva neza inshingano bafite, bakibuka ibyo bemereye abanyarwanda bakabishyira mu bikorwa. Ikindi tuzakora ni ukubaka inzego z’umuryango mu ntara y’iburasirazuba ku buryo zikomera kandi zigatanga umusaruro.”

Mufulukye yavuze ko kandi bazibanda ku kurwanya imirire mibi, bakongera imbaraga mu gusubiza abana mu ishuri.

Yakomeje avuga ko kandi yifuza ko inzego zose z’umuryango guturuka ku Mudugudu zakongera imikorere buri wese akamenya inshingano ze.

Mufulukye yanavuze ko nk’abanyamuryango ba FPR-Inkotanyi bagiye kongera ubuvugizi kugira ngo ikibazo cy’amapfa cyakunze kugaragara muri iyi ntara ntikizongere kugaruka.

Ati “ Ikibazo cy’amapfa ni ikibazo gikenera ubushobozi bukomeye ariko nk’abanyamuryango tugiye kongera ubuvugizi kugira ngo imwe mu mishinga itatu yo kuhira iteganyijwe muri iyi ntara irusheho kwihutishwa, ibi bizatuma biriya bice bikunda kugaragaramo izuba ryinshi haboneka ibisubizo.”

Yavuze ko mu byo bateganya imbere kandi harimo no kwibanda cyane ku rubyiruko.

Gatabazi Jean Marie Vianney watorewe kuyobora uyu muryango mu Ntara y’Amayaruguru, yabwiye IGIHE ko muri iyi manda bazibanda gukomeza kureba ko imigabo n’imigambi Perezida Paul Kagame yemereye abaturage yose ibageraho, ibi bikagirwamo uruhare n’abikorera ndetse n’abandi.

Yagize ati “Nk’intara y’Amajyaruguru dufite inshingano yo gutoza abaturage ko igihugu cyabo gifite ubushobozi kandi ko ibintu bashaka mu mahanga babibona mu gihugu cyabo, tukabatoza kwigira. Twe turi Intara irimo ubuhinzi n’ubworozi bukomeye, tuzashyira imbere urubyiruko kugira ngo rushakirwe akazi bareke kumva ko babaho ari uko bajya kugashakira hanze y’igihugu.”

Yakomeje agira ati “Turateganya kubaka uruganda rw’amata mu karere ka Gicumbi ruzatunganya amata y’ifu cyane ko Intara y’Amajyaruguru ni nayo imaze gutanga inka nyinshi muri Girinka kuko tugeze kuri 96%, urwo ruganda kandi ruzajya rutunganya litiro 300 ku munsi, turashaka no kurangiza uruganda rwa sima ku buryo sima yose izava mu Rwanda.”

Yavuze ko bashaka kandi guteza imbere ubukerarugendo kuko ubu bafite amahoteli 50 ariko bashaka gushyiramo andi ayo yose azatanga akazi.

Ati “Turashaka kandi ko muri iyi manda twatorewe twubaka umuryango wa FPR ku Mudugudu kandi abanyamuryango bakajya bahura rimwe mu kwezi, abanyamuryango bagakomeza guteza imbere igihugu.”

Yavuze ko ibi byose bazabikora bashingiye mu kubanza gushaka umutekano cyane cyane nk’Intara yegeregereye umupaka.

Guverineri Gatabazi n'abagize komite ya FPR-Inkotanyi mu Ntara y'Amajyaruguru
Mufuluke Fred niwe watore guhagararira FPR-Inkotanyi mu Ntara y'Iburasirazuba
Komite ya FPR mu Ntara y'Iburasirazuba
Mu mujyi wa Kigali, Rwakazina Marie Chantal niwe watorewe kuyobora FPR Inkotanyi
Mu Ntara y'Amajyaruguru Gatabazi Jean Marie Vianney niwe watorewe kuyobora FPR-Inkotanyi
Rwakazina niwe watowe mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza