Uko amafaranga y’abanyamuryango ba Sacco Ndego yarengeraga mu mifuka y’abayobozi

Yanditswe na Mugabo Jean d’Amour
Kuya 9 Nyakanga 2018 saa 06:23
Yasuwe :
0 0

Musabyimana Vianney, Umunyamuryango w’Umurenge Sacco Ndego mu Karere ka Kayonza, yatunguwe no kwisanga yishyuzwa umwenda w’amafaranga miliyoni eshatu n’ibihumbi 700 nk’inyungu n’ibihano by’ubukererwe ku mwenda wa miliyoni n’igice bivugwa ko yafashe muri Sacco mu 2014.

Kuri we, ngo nta faranga yahawe na Sacco nyamara kuri ubu afite impungenge ko ashobora guterezwa umutungo we wose ku maherere.

Iki kibazo Musabyimana agisangiye n’abandi banyamuryango barenga 50 bavuga ko bariganyijwe n’uwahoze ari umucungamutungo (manager) w’iyi Sacco, Habyarimana Simon Pierre n’uwari ushinzwe inguzanyo, Nzabonimpa Jean Paul.

Mu rubanza ubushinjacyaha bwari bukurikiranyeho aba bagabo bombi kunyereza amafaranga agera kuri miliyoni umunani, Urukiko Rwisumbuye rwa Ngoma rwabakatiye muri Gicurasi 2018 igifungo cy’imyaka umunini n’ihazabu ya miliyoni icyenda n’ibihumbi 767 na 420 nyuma yo kubahamya ibyaha byo gucunga nabi umutungo w’abaturage, guhimba no gukoresha inyandiko mpimbano no kwambura ikintu cy’undi bakoresheje amayeri.

Aba bombi bahise bajurira ndetse n’abanyamuryango 10 ba Sacco baregeraga indishyi bajurira bavuga ko batishimiye indishyi ya 222,000 Frw yagenewe buri umwe mu gihe batakaje arenga 800,000 Frw mu rukiko harimo 500,000 Frw buri umwe yahembye avoka n’ayarenga 300,000 Frw bavuga ko buri umwe yakoresheje mu ngendo zo kwitabira iburanisha kuva muri Mutarama kugera muri Gicurasi 2018.

Uko abarenga 50 bariganyijwe

Aganira na IGIHE mu cyumweru gishize, Musabyimana yagize ati "Nahawe inguzanyo mu magambo ariko nta faranga nahawe mu 2014. Byatangiye uwari ushinzwe inguzanyo ampamagara muri weekend musanga ku biro bye maze anshishikariza gufata inguzanyo kandi ko bashakaga kurangiza raporo muri iyo weekend, maze ansinyira inguzanyo ya miliyoni imwe n’igice ariko ambwira ko amafaranga nzayafata ku wa Mbere ariko ngiyeyo bakomeza kundangarana kugeza hashize hafi ukwezi ari bwo biyemeje kuyampa".

Yakomeje agira ati "Gérant (umucungamutungo) yanjyanye mu biro bye yuzuza ifishi itangirwaho inguzanyo ayandika no mu gatabo kanjye ambwira ko BDF izanyishyurira 50% y’inguzanyo ariko nkaba ngomba kumuhaho ibihumbi 500.”

Musabyimana ngo yamusubije ko nayamuha na we azayishyura ariko umucungamutungo arabyanga bituma barwanira ya fishi n’agatabo maze Musabyimana atwara agatabo ke kanditsemo inguzanyo ariko nta kashi ya Sacco iteyemo naho undi asigarana ifishi ariko Musabyimana atayisinyiyeho nk’uhawe inguzanyo maze ataha nta mafaranga atwaye.

Ati “Yarampamagaye umunsi ukurikiye ariko nabwo ntitwumvikana bituma muregera Perezida wa Sacco ariko umucungamutungo amubwira ko inguzanyo nayifashe. Nagejeje ikibazo ku Murenge no ku Karere bangira inama yo kugana inkiko ariko mbura amafaranga yo kwishyura avoka mpitamo gutaha ndituriza ntegereza ko Sacco izandega.”

Undi munyamuryango utarashatse ko amazina ye atangazwa yavuze ko bari biyegeranyije bagera kuri 50 bahemukiwe n’abayobozi ba Sacco harimo abo ushinzwe inguzanyo yasangaga mu ngo bakamuha amafaranga ababeshya ko ayajyanye muri Sacco, abasanze banditsweho inguzanyo batahawe, ababwirwaga n’ushinzwe inguzanyo ko aho kubitsa amafaranga muri Sacco bayamuguriza akazabungukira maze bakayamuha n’ababuze amafaranga yabo babikije kuko yabikuzwaga n’abayobozi naho nyiri konti atabizi.

Yagize ati "Uwari ushinzwe inguzanyo yansanze mu rugo ambwira ko Gérant amumereye nabi, ansaba ko namuha 427,600 Frw nari nsigayemo ku nguzanyo ya miliyoni imwe nari mfite. Nabanje kwanga kuko sinari mfite ubukererwe ariko anyemeza ko nkwiriye kumwizera ariko nyamuha abaturanyi bareba ariko naje kubwirwa ko nishyuye 100,000 Frw gusa naho uwo mugabo yahise atwara 327,000 Frw kuko yaje no kubinyemerera ko yayigurije n’abagize komite ishinzwe inguzanyo muri Sacco yacu babyumva.”

Uyu yavuze ko bamwe bagiye bashukwa n’uwari umucungamutungo n’ushinzwe inguzanyo bakabizeza ko bazabishyura maze ntibafatanye n’abandi 25 bagejeje ikirego kuri polisi naho 10 gusa bakaba ari bo baregeye indishyi kuko abandi babuze amafaranga asabwa mu rukiko harimo ayo guhemba avoka n’amagarama y’urubanza.

Nkangura Daniel, utuye mu Kagari ka Karambi mu Murenge wa Ndego akaba yaragurijwe ibihumbi 100 muri Mutarama 2013 akayishyura mu mwaka umwe ndetse agasubizwa ingwate yari yatanze, yatunguwe no kubwirwa muri Kanama 2017 ko yagurijwe ibihumbi 450 bityo akaba yari afite umwenda wa miliyoni imwe n’ibihumbi 860 kubera ubukererwe, umwenda yahanaguweho n’urukiko uyu mwaka.

Nkangura yavuze ko umuturanyi we yari afite umwenda wa baringa w’ibihumbi 320 agasabwa kwishyura miliyoni imwe n’ibihumbi 983 ngo kuko yakererewe kwishyura mu gihe cy’imyaka ine. Hari n’undi wishyuye inguzanyo y’ibihumbi 200 anasubizwa ingwate ariko yisanze yishyuzwa miliyoni icyenda n’ibihumbi 460.

Ubwo Banki Nkuru y’Igihugu n’ Ikigo cy’Igihugu gishinzwe amakoperative (RCA) bakoraga igenzura muri Sacco Ndego mu Ugushyingo 2017 basanze hari miliyoni umunani zaburiwe irengero n’inguzanyo zitishyuwe maze bategeka abayobozi kuyagaruza byaba ngombwa bakajyana mu nkiko abanze kwishyura.

Sacco yahise igeze abanyamuryango icyenda barimo Musabyimana mu Rukiko rw’Ubucuruzi rwa Nyarugenge ariko RCA ikomeza gutakambirwa na benshi baregaga abayobozi ba Sacco uburiganya bituma batabwa muri yombi bagezwa mu Rukiko Rwisumbuye rwa Ngoma. Urubanza Sacco Ndego iregamo abanyamuryango batishyuye inguzanyo rwapfundikiwe muri Werurwe 2018 hakaba hategerejwe isomwa ry’imyanzuro.

Icyizere cyarayoyotse

Abagizweho ingaruka n’uburiganga bwakoze muri Sacco Ndego baganiriye na IGIHE bose bahuriza ku kuba nta cyizere bagifitiye Sacco yabo ndetse ko byaciye intege n’abaturanyi bashakaga kuyigana, bagasaba ko hazanwa abakozi bashya kugira ngo bongere kuyizera.

Hari uwagize ati "Buriya bujura bwatunye icyizere cyiyoyoka kandi hari impamvu nyinshi. Nk’ubu Sacco ntikirenza inguzanyo y’ibihumbi 100 kandi mbere yaratangaga na miliyoni ebyiri. Hari igihe umuntu ashaka kubikuza nk’ibihumbi 500 bakamubwira ngo abe yihanganye kuko nta mafaranga ahari kandi yashakaga aye yababikije.”

Musabyimana yavuze ko we na begenzi be batakaje icyizere, atanga urugero rw’aborozi banze ko ikusanyirizo ry’amata ribishyurira muri Sacco ndetse n’abakozi bagera kuri 200 bakora mu mushinga w’ubuhinzi wa Bramin, uhuriweho na Bralirwa na Minimex, banze ko imishahara yabo inyuzwa muri Sacco bigatuma abakozi ba Sacco bagomba kubashyira amafaranga mu mirima.

Yagize ati "Ntabwo twagira icyizere hakiri abantu bakoranye na bariya bagabo baturiganyije. Kk’ubu haracyari umukozi wigeze kwandikira umuturanyi wanjye ibihumbi 20 kandi abikije ibihumbi 200 maze aho abiboneye abibabwiye bamuhindura umusazi, agerageza no kubarega ariko abura ibimenyetso. Ubu twahisemo kujya tuzigamira mu matsinda yacu aho kujya kubitsa muri Sacco".

Umucungamutungo wa Sacco Ndego, Alphonsine Uwamariya, yavuze ko barimo kugerageza kugarura icyizere cy’abanyamuryango, babizeza ko nta kibazo kigihari kuko abakoze ibyaha babihaniwe ariko yemera ko hari abanyamuryango batagikorana n’iyi Sacco biganjemo abagizweho ingaruka na buriya buriganya.

Hamaze kunyerezwa amafaranga arenga miliyari imwe na miliyoni 730 mu Umurenge Sacco mu gihugu hose kuva hafungurwa ishami rimwe muri buri Murenge mu 2009 ariko asaga miliyari imwe amaze kugaruzwa naho imanza 100 z’abakurikiranweho iri nyerezwa zikaba zikiri mu nkiko, nk’uko Umuyobozi Mukuru wa RCA, Prof. Harelimana Jean Bosco, aheruste kubitangariza IGIHE.

Yavuze ko kugira ngo hakumirwe ibi byaha, RCA yatangiye inzira yo gukoresha ikoranabuhanga muri Sacco no gutangiza banki y’amakoperative bitarenze mu 2020 maze ikajya igenzura imikorera y’amashami yose ya Sacco.

Harelimana yijeje abanyamuryango ba Sacco umutekano w’amafaranga yabo kuko Sacco n’ibindi bigo by’imari byose bifite ubwishingizi bwishyura abanyamuryango igihe cyose havuka ikibazo.

Kugeza ubu hari amashami 535 ya Sacco abitsemo ubwizigame bugera kuri miliyari 66 n’umugabane shingiro wa miliayari 12.

Abari abayobozi ba Sacco Ndego mu Rukiko Rwisumbuye rwa Ngoma /Ifoto: Pax Press

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza