Uko akaduruvayo mu miyoborere ya Mitterand kagize uruhare muri Operation Turquoise

Yanditswe na Philbert Girinema
Kuya 7 Nzeri 2016 saa 03:27
Yasuwe : XX
0

Indigo Ellis, Umunyeshuri uri gusoza amasomo mu bijyanye n’amateka muri Kaminuza yigisha ubukungu na politiki, London School of Economics and Political Science, yanditse igitabo gishingiye ku nyandiko u Bufaransa buheruka gushyira ahagaragara zivuga kuri Jenoside yakorewe Abatutsi mu 1994, agaragaza uburyo akaduruvayo kari muri icyo gihugu kagize uruhare ku byo bakoze mu Rwanda.

U Rwanda rushinja u Bufaransa uruhare rutaziguye muri Jenoside, n’ubwo icyo gihugu kitaremera ngo cyerure ibyo cyakoze cyangwa ngo gishyire ahagaragara inyandiko zose z’imikoranire yabwo na guverinoma y’u Rwanda mu gihe cya Jenoside yakorewe Abatutsi.

Mu kiganiro na La Liberation, Indigo Ellis yavuze ko yakurikiranye uruhererekane rw’ibihe bigaragazwa mu nyandiko enye zatoranyijwe mu ziheruka gushyirwa ahagaragara na Perezida Hollande muri Mata 2015 zari mu bubiko bwa Perezida Mitterand hamwe n’izindi zinyuranye.

Ati ‘‘Hari byinshi byanditswe kuri Jenoside yo mu Rwanda no ku ruhare nyakuri u Bufaransa bwaba bwarabigizemo, ariko hakozwe ubushakashatsi buke ku buryo amacakubiri muri Guverinoma y’u Bufaransa yaba yaragize uruhare mu ifatwa ry’ibyemezo, uko byabaga biteye n’ingengabihe ya Operation Turqouise.’’

Muri ubu bushakashatsi Ellis yatangiye muri Nzeli 2015, ngo yizeraga ko inyandiko u Bufaransa bwashyize ahagaragara zerekana amakuru yose ajyanye na Operation Turquoise, ariko icyo izo zigaragaza ni guverinoma icitsemo ibice gusa.

Uko ibintu byari bimeze mu Bufaransa

Indigo Ellis, yavuze ko mu 1994 Guverinoma y’u Bufaransa yasaga n’idakora kuko hari hashize igihe gito Inama y’Abaminisitiri ikuweho yongera gusubirwamo nyuma y’amatora y’abagize Inteko Ishinga Amategeko mu 1993.

Ati ‘‘Mu kuri imikoranire ya François Mitterrand wo ku ruhande rw’abashyigikiye impinduka na Édouard Balladur wo ku ruhande rw’abatsimbarara, (gauche vs droite) yari yarananiwe gushyira hamwe, kandi amashyaka Rassemblement pour la République (RPR) na Union pour la Démocratie Française (UDF) yo ari hagati na hagati yari yatangiye gucikamo ibice.’’

‘‘Cyari igihe gikomeye. Amatora ya Perezida yari ashyushye kandi ishyaka ry’aba Socialiste ryagombaga gushaka usimbura François Mitterrand wari usoje manda ebyiri ndetse wari unarwaye kanseri y’ubugabo.’’

Amashyaka akomeye ngo yashakaga kwifatira ubuyobozi, ndetse muri icyo gihe nibwo mu Rwanda Jenoside yatangiraga.

Icyo gihe kandi amashyaka ya PS, RPR na UDF yari ari kumaranira ubuyobozi aza kwemeranya kohereza ingabo mu Rwanda n’ubwo byatinze, haboneka n’ibindi byemezo byinshi byagiye bidindira cyangwa intego zagiye zishidikanywaho.

Ellis yakomeje agira ati ‘‘Gucikamo ibice mu nzego zo hejuru za guverinoma mu mikoranire ya Mitterrand na Balladur mu mwaka w’amatora kwakerereje Opération Turquoise. Ubwo yanatangiraga kuwa 22 Kamena, hariho urujijo no gushidikanya ku bazayigaragaramo. U Bufaransa bwari bufite impungenge zo kujya muri ibyo bikorwa bwonyine.’’

François Mitterand na Edouard Balladur wari Minisitiri w'Intebe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza