00:00:00 IGIHE NETWORK KN KINYARWANDA EN ENGLISH FR FRANCAIS

UGHE igiye guha impamyabumenyi abanyeshuri 23 bitezweho guteza imbere urwego rw’ubuzima

Yanditswe na Muhonzire Sylvine
Kuya 22 Kanama 2021 saa 12:01
Yasuwe :
0 0

Kaminuza itanga amasomo ajyanye n’ubuvuzi, University of Global Health Equity (UGHE) iherereye i Butaro mu karere ka Burera, ku nshuro ya Gatandatu igiye gutanga impamyabumenyi y’icyiciro cya Gatatu cya Kaminuza (Masters) ku banyeshuri 23 baturuka mu bihugu 11 byo muri Afurika no muri Pakistan.

Uyu muhango uraba kuri uyu wa 22 Kanama 2021, hifashishijwe ikoranabuhanga aho uri buze kwitabirwa n’abayobozi batandukanye barimo Ministiri w’Ubuzima, Dr. Ngamije Daniel, Minisitiri w’Uburezi, Dr. Uwamariya Valentine, ndetse n’Umuyobozi w’Ikigo cya Afurika gishinzwe kurwanya Indwara (Africa CDC), Dr John Nkengasong.

Abanyeshuri bagiye guhabwa impamyabumenyi bari bamaze umwaka bakurikirana amasomo ajyanye no kugeza ubuvuzi kuri bose (Masters in Global Health Delivery), bibanda cyane kuri siyansi, guhanga udushya ndetse no gutanga ubuvuzi bugezweho.

Umuyobozi Mukuru wa UGHE, Prof. Agnes Binagwaho, yavuze ko aba banyeshuri barangizanyije ubumenyi n’ubwenge bubemerera kuba bamwe mu bayobozi bazagira uruhare rufatika mu guhindura no guteza imbere urwego rw’ubuzima ku Isi babugeza kuri bose.

Ati “Isi ikeneye inzobere nk’izi mu bijyanye n’ubuzima, cyane cyane muri iki gihe Isi iri guhura n’ihindagurika ry’ibihe rituma habaho ibiza bitandukanye nk’ubushyuhe bukabije, gushya kw’amashyamba, kumagara k’ubutaka ndetse n’imyuzure.”

Yakomeje avuga ko ibi byose bigira ingaruka ku batuye Isi zirimo kubavana mu byabo, inzara, imirire mibi, uburwayi, ndetse bikaba byararushijeho mu gihe cya Covid-19 cyashyize Isi mu kangaratete, ibintu avuga ko abanyeshuri barangije muri iyi kaminuza baje gutanga umusanzu mu kubihagarika.

Ati “Izi ngaruka zose zisubiza inyuma abaturage mu bijyanye n’ubuzima, gusa abanyeshuri bacu barangizanyije ubumenyi buzatuma bazihagarika kandi bakagira byinshi bahindura.”

Ibi kandi bishimangirwa n’Umuyobozi wungirije w’iyi kaminuza ushinzwe amasomo n’ubushakashasti, Prof. Abebe Bekele, aho yavuze ko aba banyeshuri baje gutanga ijwi ku bantu bose batarigiraga mu bijyanye n’ubuzima.

Ati “Uruhare rw’abanyeshuri bacu nka bamwe mu baje kuzana impinduka mu bijyanye n’ubuzima ni ingirikamaro muri iki gihe kuruta ikindi cyose cyabayeho kubera indwara zitandukanye zikomeje kwiyongera ndetse zigahungabanya bikabije ubuzima bw’abatishoboye.”

“Abanyeshuri bacu bajyanye intego yo gutanga ijwi ringana ku bantu bose no kuri ba bandi batarigiraga kandi bafatwaga nk’abatarikwiriye. Barangizanyije ubumenyi bwo guhanga udushya no guteza imbere gahunda zose zijyanye n’ubuzima zitoroshye ariko z’ingirakamaro.”

Nubwo aba banyeshuri bize mu bihe bitoroshye bya Covid-19, iri shuri ryabageneye uburyo bukwiriye bwo kwiga bijyanye n’ibihe Isi irimo nk’uko bisobanurwa na Rogers Muragije, Umuyobozi wungirije wa UGHE ushinzwe ibijyanye n’imari.

Yagize ati “Mu mwaka n’igice ushize, UGHE yagenzuye ndetse inafata ingamba zo guhangana n’ingaruka zatewe na Covid-19. Twashyizeho uburyo bugezweho mu bijyanye n’imikorere budufasha twese kubaho muri bihe bitoroshye Isi irimo, binyuze mu gutegura neza uburyo dutanga ibisubizo kuri bose turengera ejo hazaza. Dutewe ishema no kuba twarabigezeho, tukarinda ubusugire bwa UGHE, igakomeza gutekana mu mikorere yayo igera kuri bose kandi igezweho.”

Aba banyeshuri barangije bitezweho gutanga umusanzu ukomeye mu bijyanye n’ubuzima muri Afurika no ku Isi hose cyane ko iyi Kaminuza itanga amasomo ku banyeshuri baturutse hirya no hino.

Kugeza ubu UGHE imaze guha impamyabushobozi abanyeshuri 131 harimo n’aba bari buzihabwe uyu munsi, ndetse irateganya no gutanga aya masomo ku bandi banyeshuri muri Nzeri uyu mwaka baturutse mu bihugu 13.

University of Global Health Equity igiye gutanga impamyabumenyi ku banyeshuri 23 barangije masters. aha hari mu 2019 ubwo abandi banyeshuri bishimiraga kurangiza amasomo yabo muri iyi kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .