Ubwo se ko batwita Abanafiki dutege amajosi bayace kuko ari abana bacu?- Min Fazil

Yanditswe na Uwishyaka Jean Louis
Kuya 4 Nzeri 2016 saa 07:28
Yasuwe :
0 0

Nyuma yaho abantu batatu mu karere ka Rusizi n’umwe wo mu karere ka Rubavu barashwe bakekwaho ibikorwa by’iterabwoba, Minisitiri w’Umutekano mu gihugu Sheikh Mussa Fazil Harerimana yasuye Abayisilamu bo mu karere ka Rubavu abasaba kwirinda iterabwoba, ndetse akangurira ababyeyi kudahishira abana babo baba bishoye mu bikorwa by’ubutagondwa.

Minisitiri Fazil Harerimana yibukije abayisilamu bose ko bakagombye kuba aba mbere mu kurinda umutekano kuko ngo bari barakandamijwe na Leta zabanjije ariko ubu bakaba barahawe uburenganzira busesuye batakitwa abaswayire.

Yagize ati “ Umutekano igihugu gifite ni mwe mwakabaye aba mbere bo kuwubungabunga, aho twavuye turahazi, uko twapyinagajwe turabizi, kwangiza umutekano w’u Rwanda ni nko kuvanga amata n’amaraso.”

Minisitiri Fazil yakomeje akangurira ababyeyi kudahishira abana babo igihe bagaragayeho ibitekerezo by’ubutagondwa, abibutsa ko iyo bamaze gucengerwa n’ubutagondwa ntaho baba bagihuriye kuko batangira kwita bagenzi babo b’abayisilamu ’Abanafiki’ ( bishatse kuvuga ko badahuje umugambi w’ubutagondwa) ndetse ngo baba bumva abo bagomba kwicwa.

Yagize ati “ Umunafiki ni mubi kurusha umukafiri, ubwo se ko batwita abanafiki dutege amajosi bayace kuko ari abana bacu? Wowe urabagirira impuhwe ariko bo ntazo bazakugirira”.

Umuyobozi mukuru w’aba sheikh mu Rwanda Nzanahayo Kassim avuga ko iterabwoba mu Karere ka Rubavu rimaze igihe ryigishwa kuko ngo ubushakashatsi bwakozwe bwagaragaje ko mu mwaka wa 2000 ari bwo ubutagondwa bwatangiye kwigishwa mu ishuri rya institut Islamique aho umwalimu wakomokaga muri Somalia yigishaga abana b’abahungu kwitandukanya n’abakobwa ndetse ngo akabigisha no guca amapantalo.

Bamwe mu bayisilamu bo mu Karere ka Rubavu bavuga ko bababajwe n’uko hari abatangiye kubanduriza isura, gusa banatunga agatoki bamwe mu ba sheikh babo ko barangaye imisigiti ikaba yarahindutse nk’ahantu hasanzwe ku buryo abantu bacuriramo imigambi y’iterabwoba.

Ngendahimana Hassan ni umwe mu bayisilamu bo mu karere ka Rubavu,yagize ati “ Biratubabaza cyane kubona hano iwacu hamaze kugira izina ribi mu bayisilamu kubera bariya bana bigishijwe iterabwoba, gusa mbona n’abashehe (Sheikh) badushinzwe bararangaye ntibite ku mutekano w’ibibera mu misigiti".

Kugeza ubu Akarere ka Rubavu kari mu turere twagaragayemo abakora iterabwoba nk’uko byemezwa n’ubushakashatsi bwakozwe n’Ishami rya Polisi rishinzwe ubugenzacyaha.

Mu rwego rwo kurwanya iterabwoba, hari zimwe mu ngamba zafashwe n’umuryango w’abayisilamu mu Rwanda zirimo ko nta musilamukazi ugomba kwambara imyenda imuhisha isura izwi nka Niqab, kuko ngo na yo ishobora guha urwaho abashaka kwiyoberanya bagakora ibikorwa bihungabanya umutekano w’igihugu.

Minisitiri Fazil yasabye Abasilamu kwibuka aho bavuye bityo bakabungabunga umutekano w'igihugu
Mufti w'u Rwanda Sheikh Habimana Salim yibukije abasilamu ko ntacyo bapfana n'ibikorwa by'iterabwoba
Ababyeyi basabwe kutajya bahishira abana babo mu gihe babumviseho ibitekerezo by'ubutagondwa
Ubuyobozi bw'akarere na Polisi na bo bari bitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244