Ubwiganze bw’abakuze mu buhinzi bwa kawa buteye inkeke ku hazaza h’iki gihingwa

Yanditswe na Iradukunda Serge
Kuya 12 Gashyantare 2020 saa 11:51
Yasuwe :
0 0

Ubwiganze bw’umubare munini w’abakuze bukomeje kugaragara mu buhinzi bwa kawa kurusha uw’abato, buteye inkeke inzego zikurikiranira hafi ubuhinzi bw’iki gihingwa mu Rwanda.

Ubushakashatsi bwakozwe n’Ikigo cy’Igihugu gishinzwe kohereza mu mahanga ibikomoka ku buhinzi n’ubworozi mu Rwanda (NAEB) mu 2015 bwagaragaje ko impunzandengo y’imyaka y’umuhinzi wa kawa yari 49.

Kugeza uyu munsi iyo witegereje abahinzi ba kawa hirya no hino, ubona ko iyi mpuzandengo y’imyaka ishobora kuba yarazamutse ikarenga aha.

Uruganda rutunganya umusaruro wa Kawa rwa Muhondo Coffee Company, ruri mu Karere ka Gakenke, Umurenge wa Muhondo ruvuga ko mu bahinzi 1252 bakorana, abagera kuri 11 aribo bari munsi y’imyaka 30 abasigaye bakaba biganje mu myaka 50 gusubiza hejuru.

Umuyobozi w’uyu Murenge wa Muhondo, Bisengimana Janvier, iki kibazo yakigarutseho ubwo bari mu muhango wo guhereza abahinzi ba kawa agahimbazamusyi abereka ko ari ikintu gihangayikishije gishobora no gutuma iki gihingwa kizimira mu Rwanda.

Yagize ati “Maze iminsi nzenguruka mu bahinzi ba kawa mfite ikibazo sinzi uburyo muzamfasha kugikemura, murebe uko muri hano uri munsi y’imyaka 30 nabonyemo nka batatu cyangwa batanu abandi bari muri za 80, 90 iyo mubitekereje mwebwe nta kibazo mubibonamo?”.

Bisengimana yavuze ko afite impungenge z’uko kawa ishobora kujyana n’abakuze “Mfite ikibazo cy’uko ejo tuzarangara gato tugasanga kawa yajyanye na bene yo, turebye nabi yajyana n’abasaza.”

Rugimbabahizi Zacharie watangiye guhinga kawa mu 1985 kuri ubu akaba afite imyaka 63, avuga ko urubyiruko rutarumva neza ubuhinzi bwa kawa.

Ati “Uyu munsi wanone rero iyo urebye urubyiruko rw’ubungubu usanga ikawa rutayumva neza ni uguhatiriza ariko uko byagenda kose njye icyo nifuriza abana banjye kandi mpora mbashishikariza ni uko izo kawa zitazabapfira ubusa icyo zangejejeho na bo zikazakibagezaho.”

Rugimbabahizi avuga ko abahinzi ba kawa ari bo bagakwiye gukundisha abana babo iki gihingwa.

Ati “Ubundi icyo uraze umwana ni cyo akora, ubundi ababyeyi bagombye kubwira abana babo ko ikawa ari ingenzi, ikawa ukayiraga umwana kubera ko icyo”.

Ubuyobozi bw’uyu murenge uri muyeza Kawa nyinshi mu Rwanda, buvuga ko impamvu urubyiruko rutinjira mu buhinzi bwa kawa ari uko nta butaka babona buhagije bwo kuyihingaho kandi ikaba itinda no kwera bigatera urubyiruko kwigira mu buhinzi bw’ibindi bihingwa byera vuba.

Iyi ngingo Umurenge wa Muhondo uyihuriyeho na NAEB ivuga ko koko mu Rwanda, hari ikibazo cy’umubare muto w’urubyiruko ruri mu buhinzi bwa kawa.

Umuvugizi wa NAEB, Ntwari Pie, avuga ko urubyiruko rusigaye rukunda guhinga ibihingwa byera vuba.

Ati “Muri iki gihe urubyiruko rukunze ibihingwa byerera igihe gito nk’ubuhinzi bw’imboga, urusenda, ibitunguru, inyanya n’ubworozi bw’amatungo magufi”.

Ntwari avuga ko nyuma yo kubona iki kibazo ubu hari ingamba NAEB yafashe zizayifasha gukemura iki kibazo

Yagize ati “Ibuye ryagaragaye ntiriba rikishe isuka, kubera urubyiruko rwibanze ku ikoranabuhanga. Muri iyi minsi NAEB yashyizeho gahunda y’ikoranabuhanga mu buhinzi bwa kawa yitwa Smart Kungahara, ikaba izareshya urubyiruko mu kwinjira mu buhinzi bwa kawa. Ku bufatanye n’ikigo cy’Abaholandi hari gahunda yo kwinjiza urubyiruko mu buhinzi.”

Ikawa ni kimwe mu bicuruzwa u Rwanda rwohereza mu mahanga byinjiza amadevize menshi, aho hagati ya Nyakanga n’Ukuboza 2019, u Rwanda rwabonye umusaruro wa toni 15.086.067 z’ikawa, rwohereza mu mahanga toni 15.423.539 Injije miliyoni $ 49.5.

Aba bahinzi ba kawa basabwe kuyikundisha n'abakiri bato
Hirya no hino mu gihugu abakuze nibo bakunze kugaragara mu buhinzi bwa kawa
Mu murenge wa Muhondo umubare munini w'abahinzi ba kawa ni uw'abakuze
Rugimbabahizi Zacharie avuga ko urubyiruko rudashishikarira guhinga kawa
Umunyamabanga Nshingwabikorwa w'Umurenge wa Muhondo, Bisengimana asaba abahinzi ba kawa kuyikundisha abakiri bato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza