Ubuyobozi bwa Trump bushaririye impunzi z’Abanye-Congo ziri mu Rwanda

Yanditswe na Herve Ugirumukunda
Kuya 16 Ukwakira 2017 saa 10:55
Yasuwe :
2 0

Icyizere cyo gutuzwa muri Leta Zunze Ubumwe za Amerika gikomeje kuyoyoka ku mpunzi z’Abanye-Congo ziri mu Rwanda nyuma y’uko Perezida Donald Trump atangaje ko azakira impunzi nke zishoboka mu gihugu cye mu myaka azamara ku butegetsi.

Mu ijambo yagejeje ku nteko rusange ya Loni mu kwezi gushize, Trump yavuze ko ateganya kugabanya umubare w’impunzi Leta Zunze Ubumwe za Amerika zakira kuko yifuza ko zizajya zitabwaho mu bihugu bituranye n’aho zikomoka.

Yasobanuye ko amafaranga Amerika itanga mu kwakira impunzi ari menshi cyane. Ati “Amafaranga dukoresha twimurira impunzi imwe muri Leta Zunze Ubumwe za Amerika dushobora kuyakoresha tugafasha impunzi 10 ziri mu karere igihugu cyazo ziherereyemo.”

Ibi uyu mugabo yahise abishyira mu bikorwa dore ko yategetse ubuyobozi bwe kumenyesha inteko ko mu mwaka utaha wa 2018 impunzi 45 000 zonyine ziturutse hirya no hino ku Isi, ari zo zizemererwa gutuzwa muri USA.

Ni bwo bwa mbere iki gihugu kizaba cyakiriye impunzi nke cyane mu myaka 30 ishize. Byaherukaga mu 1986 ubwo ubuyobozi bwa Perezida Ronald Reagan bwemereraga impunzi 67 000.

Umubare 45 000 Trump yamurikiye inteko ntugeze no mu cya kabiri cya 110 000 ubuyobozi bwa Obama bwateganyaga kwakira muri uyu mwaka, mu gihe muri 2016 bwari bwemereye 84 994.

Imiryango iharanira inyungu z’impunzi ikomeje kwinginga Trump nibura ngo azemerere impunzi 75 000 ariko nta cyizere gihari.

Ni iki cyihishe inyuma y’ubushake buke bwo kwakira impunzi bwa Trump?

Ikinyamakuru The Atlantic gitangaza ko amatwara yo kwanga kwakira impunzi Trump afite ayacengezwamo n’umujyanama we Stephen Miller, w’intagondwa iyo bigeze ku kwakira abimukira n’impunzi muri Amerika.

Miller agendera ku cyegeranyo cyashyizwe ahagaragara n’Ikigo cy’Ubushakashatsi ku Mpunzi, CIS, kivuga ko igiciro cyo gutuza impunzi mu Burayi na Amerika gihanitse cyane.

Gusa ni ubushakashatsi bwakozwe ku mpunzi zo mu Burasirazuba bwo Hagati zihungira mu Burayi kubera intambara yo muri Syria.

The New York Times ivuga ko uyu Stephen Miller yari yagiriye inama Trump ko yakwemerera impunzi 15 000 gusa naho Ishami rya Amerika rishinzwe Umutekano w’Imbere rikamusaba kwemerera 40 000, nyuma y’igitutu cya bamwe mu nkoramutima ze bavuganira impunzi, nibwo Trump yemeye 45 000.

Mu mubare Trump ateganya kwakira harimo impunzi 19 000 zo muri Afurika, izo mpunzi zirimo izo muri Somalia, Eritrea, Sudani y’Epfo, CAR, u Burundi na Repubulika Iharanira Demokarasi ya Congo.

Ku mpunzi z’Abanye-Congo ziri mu Rwanda…

Mu myaka itatu ishize, Amerika yateganyaga gutuza impunzi 25 000 mu zisaga 75 000 ziri mu Rwanda.

Ishami ry’Umuryango w’Abibumbye ryita ku Mpunzi, UNHCR, rivuga ko muri 2010, impunzi 929 zasabye koherezwa muri Amerika no mu bindi bihugu byateye imbere hakemererwa 650; muri 2011 hasabye 1310 hemererwa 731; muri 2012 hasabye 2249 hemererwa 733; muri 2013 umubare wariyongereye, hasaba 2717 ariko hemererwa 922 naho muri 2014, 607 basaba kwimurwa hemererwa 468.

Ariko UNHCR ivuga ko muri iyo myaka yose impunzi zagiye muri Amerika ari 2369 gusa.

Mu mwaka wa 2015, USA yemereye impunzi z’Abanye-Congo ziri mu Rwanda 1317 kuyituramo, mu gihe muri 2016 yemereye 3018.

Umuyobozi wa UNHCR mu Rwanda, Ahmed Baba Fall, aherutse kubwira IGIHE ko umubare w’abemererwa ugomba kugabanuka cyane kubera ubuyobozi bwa Trump.

Ati “Ntacyo twabikoraho, urabizi buri butegetsi bugiyeho muri Leta Zunze Ubumwe za Amerika buba bufite gahunda zabwo zihariye kandi ubutegetsi bushya bwa Trump ntabwo bushyigikiye kwimura impunzi nyinshi tugomba guhangana nabyo.”

Yavuze ko hakomeje ibiganiro hagati ya UNHCR na Leta Zunze Ubumwe za Amerika ngo barebe ko Trump n’ubuyobozi bwe bazisubiraho bakakira impunzi nyinshi.

Ati “Dukomeje gukorana nabo ngo dushakire umuti uhoraho impunzi zibikwiriye, ariko n’ubundi koherezwa muri Leta Zunze Ubumwe za Amerika si wo muti urambye, umuti nyawo ni ugushaka amahoro bagasubira mu gihugu cyabo. Amerika yakira impunzi nyinshi, turayishimira ariko tunakomeje kubinginga ngo turebe ko bazongera umubare w’impunzi bakira.”

Umuyobozi wa UNHCR mu Rwanda,Ahmed Baba Fall

Umuyobozi Ushinzwe Ibibazo by’Impunzi muri Minisiteri y’Imicungire y’Ibiza n’Impunzi, MIDIMAR, Jean Claude Rwahama; yasobanuriye IGIHE ko impunzi zihaguruka mu nkambi zikajyanwa muri Amerika zagabanutse bigaragara kuva Donald Trump yajya ku butegetsi.

Ati “Sinavuga imibare ariko ubona ko abagenda bagabanutse cyane kuva Leta Zunze za Amerika zabona ubuyobozi bushya.”

Rwahama avuga ko hari abemerewe kugenda bakererwa, niba icyiciro cyabo cyagombaga kugenda mu kwezi runaka, kukarinda kurangira bataragenda.

Yongeyeho ko abategereje kugenda baguma mu nkambi kimwe n’izindi mpunzi, ndetse hakaba n’abashobora gutwara inda bataragenda.

Abo ngo bitabwaho, bagahabwa ibisabwa hakanigwa uko bakoroherezwa kubona ibyangombwa bakajyana n’abana babo mu gihe bavutse mu buryo bwemewe n’amategeko.

Impunzi z’Abanye-Congo ziri mu Rwanda zivuga ko kujya muri Amerika ari inzozi zihora zirota, ndetse zabona bagenzi bazo bagiye, icyizere kikiyongera.

Gusa kuri ubu, yaba ari abari bamaze kwemererwa kugenda bafite impungenge ko batazahaguruka, naho abateganyaga kubisaba nabo bacitse intege ngo kugeza igihe Leta ya Trump izavira ku butegetsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza