00:00:00 IGIHE NETWORK KN KINYARWANDA EN ENGLISH FR FRANCAIS

Ubuyobozi bw’itorero rya ADEPR bwakebuye abakirisitu batizigamira

Yanditswe na Ntabareshya Jean de Dieu
Kuya 30 Ukwakira 2021 saa 12:07
Yasuwe :
0 0

Umushumba Mukuru w’Itorero rya ADEPR mu Rwanda, Ndayizeye Isaïe, yavuze ko abakirisitu bakwiye guharanira iterambere ry’imibereho myiza binyuze mu kwizigamira no gukorera hamwe n’abagenzi babo mu matsinda agamije kwiteza imbere no kwishakamo ibisubizo.

Ibi Ndayizeye yabigarutseho kuri uyu wa Kane tariki ya 28 Ukwakira 2021, ubwo hatangizwaga icyumweru cyahariwe Kuzigama mu matsinda ku bayoboke b’itorero rya ADEPR mu Rwanda, gahunda yatangijwe muri 2011.

Ni icyumweru cyahawe insanganyamatsiko igira iti “Kwizigamira, umusingi wo guhangana n’ibihe bidasanzwe", cyatangirijwe mu Karere ka Kamonyi mu Murenge wa Nyamiyaga mu Itorero rya Mbayaya.

Uyu muyobozi yifashishije urugero rw’icyorezo cya Covid-19 cyugarije Isi, cyanahungabanyije ubukungu bwa benshi, agaragaza ko abayoboke b’itorero n’Abanyarwanda muri rusange bakwiye kwiga byinshi ku muco wo kwizigama kugira ngo bizabagoboke bageze mu gihe cy’amage.

Yagize ati “Covid-19 ni urugero rw’ibihe bidasanzwe, ubwo iki cyorezo cyadukaga nibwo twabonye ko ibintu byose byahagarara bigakunda. Ibi bihe bidasanzwe byateye ingaruka nyinshi. Icyo twigiyemo muri uru rugendo, kimwe ni uko twabonye umutima mwiza wo gufashanya ariko ikindi twabonye ni umutima mwiza w’abayobozi b’igihugu."

"Twabonye ko Abanyarwanda bafite umutima w’urukundo bakunda Itorero. Muri biriya bihe abari barizigamiye baragaragaye. Hari igihe umuntu yabaga akora ikiraka atazigama, habaye ikibazo ikintu twahise tubona ni uko abantu bagize umuco wo kuzigama bakoresha ubwizigame bwabo kugira ngo batambuke.”

Kugeza ubu ku rwego rw’igihugu, muri gahunda y’amatsinda mu itorero rya ADEPR, habarurwa amatsinda 6802, harimo 513 akiri kubakirwa ubushobozi. Amatsinda agizwe n’abanyamuryango 139 242 kandi yari amaze kugera kuri miliyari y’ubwizigame, bamwe muri bo bamaze gutangira ubucuruzi, ubuhinzi, ubworozi, n’ibindi byabateza imbere.

Abaturage bafashishwe no kuba mu matsinda yo kwizigama no kugurizanya bagaragaje ko bungukiye byinshi muri yo babikesha igiceri cy’ijana bahereyeho none bakaba bageze ku gihumbu nk’uko Harerimana Alphonse, yabigarutseho.

Ati “Mu rwego rw’ubukungu byarahindutse cyane. Hari uburyo bwo kwigisha abanyamuryango kumenya ibyinjiye n’ibisohoka. Ninjira muri yo gahunda nari mfite inzu inteye isoni rimwe na rimwe abantu baje kunsura. Naje gukoresha inguzanyo mbasha kwiyubakira inzu nziza, nyishyiramo umuriro, nigurira televiziyo, mbasha no kurihira abana amashuri.”

Yankurije Mathilde yavuze ko uretse no kwiteza imbere byongera gushimangira umubano n’abaturanyi, bigakomeza ubuvandimwe n’ubukirisitu buhamye.

Uretse kwizigamira no kugurizanya bagamije kwiteza imbere, abaturage bo mu Murenge wa Nyamiyaga, basengera mu Itorero rya ADEPR Mbayaya, bakora n’ibikorwa by’urukundo bigamije gufasha bagenzi babo batishoboye. Kugeza ubu bamaze gufasha abaturage babiri bubakiye inzu, bivuye mu misanzu bakusanya.

Aba baturage bavuga ko gufasha bagenzi babo batishoboye biri mu nshingano zabo kugira ngo nabo babakure ahantu habi bari babajyane aheza kurushaho.

Umuyobozi Wungirije w’Umuryango Hope International, André Kayiranga, yavuze ko uyu muryango ukomeje gufatanya n’amatorero arindwi by’umwihariko ADEPR, kuzamura impano z’abantu n’ubumenyi bubarimo ku buryo umuntu agirira umumaro abandi.

Uruhare rwa Hope International ni ugutanga amahugurwa ku bari mu matsinda no kubaha umurongo muzima wo kwiteza imbere.

Ku rundi ruhande Umunyamabanga Nshingwabikorwa w’Umurenge wa Nyamiyaga, Mudahemuka Jean Damascène, yavuze ko kwizigama ari izingiro n’ipfundo ry’iterambere, asaba buri wese kubigira ibye.

Abayobozi batandukanye bitabiriye umuhango wo gutangiza icyumweru cyahariwe ibikorwa byo kuzigama mu matsinda muri ADEPR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .