Kwamamaza

Ubushinjacyaha busanga hakiri byinshi byo gukora ku kibazo cy’Icuruzwa ry’abantu

Yanditswe kuya 24-10-2016 saa 11:07' na Jean Pierre Tuyisenge


Umushinjacyaha Mukuru wa Repubulika y’u Rwanda, Richard Muhumuza, yavuze ko nubwo imibare igaragaza ko ibyaha by’icuruzwa ry’abantu bigenda bigabanuka, hakiri byinshi byo gukora kugira ngo abaturage bajye babimenyesha inzego zibishinzwe mu gihe byaba bibaye.

Ibi byaha hamwe n’iby’ihohoterwa rishingiye ku gitsina, Perezida Kagame na we yabikomojeho ubwo yatangizaga Umwaka w’Ubucamanza mu Nteko Ishinga Amategeko mu byumweru bibiri bishize.

Uwo munsi yasabye abantu bose bafite aho bahuriye n’Ubucamanza, gukora uko bashoboye ibyo byaha bikava mu muryango nyarwanda.

The New Times yanditse iyi nkuru, ivuga ko ubwo Muhumuza yaganiraga n’Itangazamakuru mu cyumweru gishize, yavuze ko iyo ugereranyije n’umwaka ushize ubona ko ibyo byaha bigenda bigabanuka.

Gusa yongeyeho ko ibyo bidasobanuye ko abaturage bamaze kubisobanukirwa no kubimenya bihagije, cyane cyane ibirebana n’icuruzwa ry’abantu.

Polisi ikunze gutangaza ko abagurishwa baba babeshywe ko aho bajyanwe bagiye guhabwa akazi keza na buruse zo kwiga nyamara ngo baba bajyanwe mu bucakara no mu kazi gasuzuguritse.

Muhumuza avuga ko bitewe n’uko abantu badasobanukiwe iby’iki cyaha usanga batakimenyesha inzego zibishinzwe.

Ati “ Ni inshingano za buri wese mu gufasha kurwanya no gukumira iki cyaha kuko kigira ingaruka mbi ku rubyiruko; ababyihishe inyuma biragora cyane kubatahura kuko bafite inzira ndende bakoresha babahererekanya, ndetse bakagira n’amategeko bagenderaho.”

Raporo y’Ubushinjacyaha igaragaza ko ibi byaha byagabanutse kuva kuri 51 byariho umwaka ushize, bigera kuri 32 mu kwezi kwa Kamena uyu mwaka; gusa Muhumuza avuga ko umubare w’abahamijwe ibyo byaha wiyongereye.

Amategeko y’u Rwanda agena ko umuntu ukora icyaha cyo gucuruza abantu cyangwa akakigiramo uruhare, ahanishwa igifungo kuva ku myaka irindwi kugeza ku myaka icumi n’ihazabu y’amafaranga y’u Rwanda kuva kuri miliyoni eshanu kugeza kuri miliyoni icumi.

Iryo tegeko rivuga ko iyo icyo cyaha gikozwe ku rwego mpuzamahanga, ibihano bishobora kwiyongera bikava ku gifungo cy’imyaka 10 kikagera kuri 15 n’ihazabu ya miliyoni 20 z’amafaranga y’u Rwanda.

Umuvugizi wa Polisi y’u Rwanda, ACP Celestin Twahirwa, yavuze ko ingamba zafashwe ubu ziri gukurikizwa kandi ko bidatinze ibyaha by’icuruzwa ry’abantu, guhohotera abana n’ibindi bifitanye isano bigiye kuba amateka.

Ati “ Ibyo turi kuregageza gukora ni ugushyira imbaraga mu ngamba zihari zo gukumira ibyo byaha, kugira ngo dushobore kubona amakuru ku gihe bityo hagire igikorwa mbere y’uko biba.”

Twahirwa yavuze ko Polisi ifite izindi ngamba zishobora gufasha mu kurinda abana bambuka imipaka badafite uruhushya rw’ababyeyi cyangwa abandi bakozi bo ku mipaka.

Abakorewe iki cyaha birabagora kongera kwinjira muri Sosiyete

Hagati aho abagize imiryango itegemiye kuri Leta basabye Guverinoma kugira icyo ikora kugira ngo ababa bakorewe ibyo byaha babashe kongera kwibona mu miryango.

Umunyamabanga Mukuru w’Umuryango nyarwanda uharanira uburenganzira bw’umugore n’ubw’umwana Haguruka, Ninette Umurerwa, avuga ko ashingiye ku byavuye mu bushakashatsi bakoze, abantu bakorerwa iki cyaha, kwisanga mu miryango cyangwa kongera kubaho mu buzima babagamo bibabera ihurizo ritoroshye.

Yagize ati “ Icyo twabonye ni uko bibagora kongera kwisanga miryango yabo kuko baba barahuye n’ibibazo bikomeye, mu gihe abandi cyane cyane abakobwa akenshi bitwa indaya, abantu bakabatoteza , ibi ni ibibazo bikeneye ubufatanye.”

Umurerwa yongeyeho ko byarushaho kuba byiza mu gihe ubucamanza bugiye buryoza uwakoze ibyo, ibintu byose byangiritse abeshya uwo yari agiye kugurisha.

Umurerwa yahamagariye Leta gushyiraho ibigo ngororamuco bizajya bifasha abahuye n’ibyo bibazo mbere y’uko bashyirwa mu miryango yabo n’ababyeyi bakigishwa uko bazajya bafasha abana babo bavuye muri ubwo bucuruzi.

Abacamanza bari mu Nteko Ishinga Amategeko ubwo Perezida Kagame yatangizaga Umwaka w'Ubucamanza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved