Uburyo inama zo mu Rugwiro zakoreye mu ngata amahame yatumye havuka FPR

Yanditswe na Philbert Girinema
Kuya 21 Gicurasi 2018 saa 10:36
Yasuwe :
2 0

Umuryango wa FPR Inkotanyi wihariye amateka akomeye mu mibereho y’u Rwanda n’Abanyarwanda, ahanini bishingiye ku ruhare rwawo mu iterambere ry’igihugu ariko by’umwihariko mu kukivana mu bihe bikomeye bya Jenoside ubu kikaba cyishimirwa na buri muturage n’abanyamahanga.

Nubwo igihugu kimaze gutera imbere si ko byabaye igihe cyose, kuko politiki y’ivanguramoko yabibwe n’abakoloni ikavomererwa n’abenegihugu yaje koreka u Rwanda.

Nyuma y’icyiswe revolusiyo yo mu 1959, Abatutsi benshi barameneshejwe abandi baricwa, abarokotse bahungira mu bihugu by’abaturanyi birimo Uganda, u Burundi, Tanzania, Repubulika Iharanira Demokarasi ya Congo n’ahandi, abasigaye mu gihugu bakomeza gutotezwa.

Mu myaka ya za 70 nibwo Abanyarwanda bari mu buhungiro mu bice bitandukanye bya Afurika y’Uburasirazuba batangiye kwisuganya umwe ku wundi, aho bari mu mashuri n’ahandi bakajya baganira ku bibazo u Rwanda rufite nta n’umwe ubona inzira byakemukamo.

Depite Mutimura Zeno ni umwe muri bo, ati “Njye n’abandi twaricaraga tukaganira n’aho twari mu ishuri. Iyo twarebaga u Rwanda, wasangaga ibibazo bihari nta n’umuntu ushobora kubisobanura. Abantu babaga bumva nta gisubizo gishobora kuboneka. Abo twaganiraga twaje kugera aho twibaza ko ibibazo natwe bitureba. Ni uko byatangiye.”

Mu 1979 abari i Nairobi muri Kenya bishyize hamwe maze batangira witwa RANU (Rwandese Alliance for National Unity) yari ihuriro rigamije kunga ubumwe bw’Abanyarwanda.

Iyi RANU yarakoze, imara igihe kinini ari nako Abanyarwanda bashakaga impinduka mu gihugu cyabo bayiyoboka aho bari bari hose mu buhungiro.

Ku wa 25 Ukuboza 1987 haje kuba Kongere ikomeye ya kane ya RANU yabereye i Kampala, isozwa hafashwe imyanzuro ikomeye irimo ivuka ry’Umuryango FPR-Inkotanyi (Front Patriotique Rwandais), hashyirwaho n’inyandiko z’iremezo: intego, imigambi, amategeko remezo ndetse n’imyitwarire.

Muri iyo nama ni ho hemejwe ishyirwaho ry’abakada, urugaga rw’urubyiruko n’urw’abategarugori.

Depite Mutimura Zeno watangiriye ibikorwa bya politiki muri RANU mbere y’uko ihinduka FPR Inkotanyi, mu kiganiro aherutse kugirana na IGIHE, yavuze ko iyi kongere yabereye muri Uganda mu buryo bw’ubwihisho butari buzwi n’iki gihugu.

Mu byahise bikorwa icyo gihe hamaze guhindurwa izina bikanemezwa ko FPR Inkotanyi atari ishyaka ahubwo ari umuryango, hashyizweho umutwe wa RPA ari nawo wagize uruhare rukomeye mu guhagarika Jenoside.

Hemejwe ingingo umunani zo kugenderaho

Depite Mutimura yavuze ko muri iyo kongere ariho hemerejwe imirongo migari umunani FPR Inkotanyi yiyemeje gushyira imbere irangajwe no kubaka ubumwe bw’Abanyarwanda bwari bwarasenyutse n’ubusugire bw’igihugu.

Zeno yakomeje agira ati “Icya kabiri ni ukurinda umutekano w’igihugu n’abagituye. Hanyuma ikindi cyari icya ngombwa ni icyerekeye demokarasi tuvuga iteye ite? Ikindi ubukungu bwacu twabukora dute?”

“Hari ibibazo bibaho u Rwanda rwari rufite kandi biri no mu bindi bihugu. Nk’ikintu cyo guca ruswa no gutonesha, icyo kintu kiri muri iyo gahunda. Ikindi cyagarutsweho ni imibereho y’Abanyarwanda, mu buzima bimeze bite, amashuri bimeze bite ngira ngo murabizi ko mbere hari iringaniza hagendewe ku bwoko.”

Mu zindi ngingo z’ibyagombaga kugenderwaho hari ikigendanye n’ububanyi n’amahanga aho mbere bwari bushingiye ku kubana n’amahanga kugira ngo abuze Abanyarwanda kuzagaruka mu gihugu cyabo.

Yakomeje agira ati “Ikindi ni uguca ubuhunzi. Turebye ibyo bintu byose uko ari umunani, ubirebye kimwe ku kindi wasanga iyo gahunda ikiriho kandi igenda ikora.”

Iyo mirongo migari niyo FPR Inkotanyi yagendeyeho n’uyu munsi inayifashisha mu kubohora u Rwanda, igahagarika Jenoside yakorerwaga Abatutsi.

Ibi biniyongeraho gahunda yo gusobanurira Abanyarwanda ibyo FPR igamije ndetse no gusobanurira amahanga ikibazo cy’u Rwanda n’uburyo cyashakirwa umuti n’ubwo byaje kurangira yose atereye agati mu ryinyo ntihagire icyo akora.

Depite Mutimura Zeno watangiriye ibikorwa bya politiki muri RANU mbere y’uko ihinduka FPR Inkotanyi

Inama yo mu Rugwiro yaje ikora mu ngata

Mu 1998, muri Village Urugwiro habereye inama ikomeye yari yatumiwemo abayobozi batandukanye n’izindi mpuguke mu ngeri zinyuranye, kugira ngo barebere hamwe ahazaza h’u Rwanda banemeza umurongo uhamye igihugu gikwiye kugenderaho.

Iyo nama yari irimo abari ba Minisitiri, ba Perefe, ba Burugumesitiri, abanyamategeko, abarimu muri Kaminuza n’abandi bari barabaye mu mashyaka nka MDR, MRND, PSD.

Ni inama yareberaga hamwe ibibazo u Rwanda rufite, ikabishyira mu byiciro ku buryo rushobora gutandukanya ikibazo rufite n’ibimenyetso by’ikibazo.

Ibyo biganiro byamaze igihe kirenga umwaka [kuva mu 1998-1999] nibyo byavuyemo gahunda zikubiye mu cyerekezo 2020. Ni byo kandi byabyaye ishyirwaho ry’Urwego rw’Umuvunyi, Ubugenzuzi bw’imari ya leta, Umutwe wa Sena, amahame remezo agaragara mu itegeko nshinga n’ibindi.

Mutimura ati “U Rwanda rumaze kubohorwa [nyuma ya Jenoside], imirambo yari hirya no hino, abishe abantu bari bakiriho; habaye inama yo mu Rugwiro rero […] byari bimeze nko muri laboratwari (laboratoire) yo gusuzumiramo umurwayi.”

Mutimura avuga ko iyi nama yari imeze nko mu isuzumiro ry’umurwayi, abaganga bakaba ari Abanyarwanda bariho muri icyo gihe barimo ababaye muri RANU, abari muri Parmehutu babaye muri Leta ya Kayibanda n’iya Habyarimana n’abandi.

Ati “Iyo nama yifashishije UNAR, yifashisha Parmehutu, yifashisha Abanyarwanda yari ifite iza no kwifashisha FPR bashya.”

Yari irimo abantu bamwe baregwaga kwica abantu ‘ariko muri ya gahunda ya bwa bumwe bw’Abanyarwanda, bagombaga kubamo buri wese agatanga ibyo azi niba hari ufite icyaha akaba yagihanirwa. Guhuza uwishe n’uwiciwe nibyo byaje kuvamo Komisiyo y’Ubumwe n’Ubwiyunge.’

Mutimura ni umwe mu babaye abadipolomate b’u Rwanda ba mbere nyuma ya Jenoside yakorewe Abatutsi wanakoze no mu zindi nzego zitandukanye zirimo Minisiteri y’Ububanyi n’Amahanga.

Kuva mu 1994 kugera 1996, Mutimura yabaye Umujyanama wa Mbere muri Ambasade y’u Rwanda i Addis Abeba muri Ethiopia ahavuye akora muri Minisiteri y’Ububanyi n’Amahanga; mu 1999 kugera mu 2005 ajya mu Bushinwa; mu 2005 kugera mu 2009 aba Ambasaderi w’u Rwanda i Dar-Es-Salaam muri Tanzania; mu 2009 kugera mu 2011 aba Umujyanama mu bya Dipolomasi w’Umunyamabanga Mukuru wa FPR aho yavuze mu 2011 kugeza magingo aya yinjira mu Nteko Ishinga Amategeko nk’Umudepite watanzwe n’Umuryango FPR Inkotanyi.

Icyicaro cy’Umuryango FPR Inkotanyi giherereye i Rusororo mu Karere ka Gasabo

Video: Armand Kazungu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza