00:00:00 IGIHE NETWORK KN KINYARWANDA EN ENGLISH FR FRANCAIS

Uburyo bwagufasha kwirinda gukubitwa n’inkuba muri ibi bihe by’imvura

Yanditswe na Prudence Kwizera
Kuya 12 Ugushyingo 2021 saa 08:14
Yasuwe :
0 0

Minisiteri y’Ibikorwa by’Ubutabazi, MINEMA, yagiriye inama abantu yo kwirinda ibiza biterwa n’imvura, inkubi y’umuyaga no gukubitwa n’inkuba, igaragaza uko bakwiye kwitwararika.

Ni nyuma y’uko hashize igihe Abanyarwanda bibasirwa n’ibiza bikabatwara ubuzima cyangwa bikabamugaza ndetse bikangiza n’imitungo yabo, ndetse muri iyi minsi u Rwanda rukaba ruri kwinjira mu bihe by’imvura.

MINEMA igaragaza ko mu gihugu hose kuva ku itariki ya 1 Nzeri kugeza kuya 30 Ukwakira 2021 ibiza byishe abantu 28, bikomeretsa abagera kuri 50, byangiza inzu z’abaturage 848 n’ibihingwa biri ku buso bwa hegitari zirenga 1,493.

Byishe inka 18 n’andi matungo magufi 287, byangiza amashyamba ku buso bwa hegitali 39, bisenya ibyumba by’amashuri 137 n’insengero eshanu, byangiza umuhanda umwe n’ibiraro bibiri.

Byasenye ibiro by’ubuyobozi bitatu, byangiza imiyoboro y’amazi 20, bisenya n’uruganda rumwe.

Umukozi muri MINEMA Uyobora Ishami ryo Gukumira Ibiza, Hishamunda Alphonse, yasobanuye ko abantu bagomba kwitwararika muri ibi bihe, buri wese akamenya imiterere y’aho atuye n’uko akwiye kwifata.

Ati “Mbere y’uko imvura igwa abantu bakwiye kwibuka kongera gusakara neza inzu zabo bakazirika ibisenge by’inzu, bagaca imiyoboro y’amazi n’ibyobo bifata amazi kandi bakibuka kureba ko umusingi w’inzu umeze neza, ndetse bakagenzura ko inzu zabo zihomye neza ku buryo amahuhwezi y’imvura adasenya igikuta.”

Yavuze kandi ko bimaze kugaragara ko mu gihugu hose inkuba ishobora gukubita abantu, bityo abaturage bakwiye kwihutira kugama igihe imvura iguye.

Ati “Turabasaba ko igihe imvura iguye, abantu bagomba guhagarika imirimo bakajya kugama kandi bakirinda kwegera amadirishya n’inzugi by’ibyuma, kuko inkuba ni amashanyarazi atwarwa n’ibyuma cyangwa amazi.”

Yakomeje avuga ko mu gihe imvura irimo kugwa, abantu bakwiye kugama mu nzu bakirinda kwegera inkuta kuko nazo zishobora kubateza ibyago.

Ati “Kuko burya hari igihe [inkuba] ikubitira ahandi cyane cyane mu nzu zifite amashanyarazi ikaza yinjirira ha handi abashaka kurahura umuriro bacomeka ibyuma, uwegereye urukuta akaba yafatwa. Turabagira n’inama ko uburiri budakwiye kwegerezwa urukuta kuko icyo gihe bigabanya ibyago byo kuba abantu bakubitwa n’inkuba.”

Hishamunda yavuze ko mu gihe imvura irimo kugwa, ibyuma byose bikoresha amashanyarazi birimo radiyo, televiziyo, telefone n’ibindi bagomba kubicomokora.

Yasobanuye ko inkuba ikubita mu buryo bubiri, burimo gukubita imanukiye ku kintu runaka cyangwa igakubitira kure ikagendera mu nsinga z’amashanyarazi cyangwa mu butaka igateza abantu ibyago.

Ati “Ubwo rero kubera ko ishobora gukubitira kure ikagendera nko mu rusinga rw’amashanyarazi, ishobora kuza ikangiza bya byuma byose bikoresha abamashanyarazi wacometse, niyo mpamvu dusaba abantu kubicomokora."

Umuburo ku bajya kureka amazi mu mvura

Hishamunda yavuze ko hari abantu bakunze kujya kureka amazi igihe imvura irimo kugwa, abasaba kubireka kuko baba bishyira mu byago byo gukubitwa n’inkuba.

Ati “Ni ukuvuga ngo genda hakiri kare imvura itaratangira kugwa ushyire ku mureko icyo urekesha, noneho utegereze ujye kugikuraho imvura yahise.”

Abaragira amatungo mu mvura nabo yabasabye kujya bihutira kuyacyura kandi bakirinda kujya kuyagaburira igihe imvura irimo kugwa.

Ati “Twabonye umuyobozi muri Rutsiro inkuba yakubise arimo kugaburira inka mu mvura.”

Yagiriye inama abantu yo kwirinda kugama imvura munsi y’igiti kuko inkuba iyo ikubise ikunze kumanukira mu kintu kirekire kiri hafi y’aho ikubitiye.

Yavuze ko kugeza ubu hari amabwiriza y’uko abantu bose bagiye kubaka inzu ahantu hahurira abantu benshi, basabwa gushyiraho imirindankuba.

Yatanze urugero aho mu 2018 inkuba yakubise abantu bari mu rusengero i Nyabimata mu Karere ka Nyaruguru, abagera kuri 15 bakahasiga ubuzima kubera ko nta murindankuba wari uhari.

MINEMA yerekanye uburyo abantu bashobora kwirinda gukubitwa n’inkuba muri ibi bihe by’imvura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .