Kwamamaza

Uburasirazuba:Abaturage bararikira ingurane kurusha ibikorwa by’iterambere bahwituwe

Yanditswe kuya 22-09-2016 saa 08:12' na Niyonsenga Schadrack


Ubuyobozi bw’Intara y’u Burazirazuba burasaba abaturage kumva ko imihigo y’uturere twabo ibareba ari nako bagaragaza ubufatanye mu ishyirwa mu bikorwa ryayo birinda kuruhanya baka amafaranga y’ingurane ku bikorwa by’amajyambere baba bakorewe.

Ibi ni ibyavugiwe mu nama yahuje abayobozi kuva ku rwego rw’akarere kugeza ku rwego rw’intara, abikorera ndetse na sosiyete sivile, barebera hamwe ibizitabwaho kurusha ibindi mu mwaka utaha w’ingengo y’imari.

Muri iyi nama yanahuriranye n’ukwezi kw’imiyoborere myiza igihugu kirimo, ubuyobozi bw’iyi ntara bwavuze ko ibikorwa birimo guteza imbere imiturire myiza ijyanye n’iterambere, amazi meza, n’amashanyarazi ari byo bizibandwaho, hakorwa ubukangurambaga bugamije gutuma abaturage babigiraho uruhare, bukazakurikirwa n’ishyirwa mu bikorwa ry’ibi bikorwa bavuga ko bizarangirana n’umwaka utaha.

Gusa n’ubwo ibikorwa nk’ibi bikorwa hagamijwe guteza imbere abaturage, ngo bamwe mu baturage baracyafite umuco wo kumva ko bakwiye guhabwa ingurane z’ahaba hacishijwe ibyo bikorwa, ibintu umuyobozi w’iyi ntara avuga ko bidindiza ibi bikorwa biba byateganyijwe.

Uwamariya Odette uyobora iyi ntara yagize ati "Umuturage ntiyumve ko nibaza kumuha amashanyarazi bazasabwa no kumuriha ipoto bashinze mu butaka bwe, usanga icya kabiri cy’ingengo y’imari kiri kwishyura ahanyujijwe bene ibyo bikorwa, turifuza ko iyo myumvire abaturage bayivaho."

Mu mihigo y’umwaka ushize, uturere tugize Intara y’u Burasirazuba ntitwigeze tugaragara mu myanya 10 ya mbere, kuko akaza hafi ari Gatsibo yaje ku mwanya wa 11. Gusa ariko ngo iyi ntara yishimira umudugudu w’icyitegererezo yujuje mu karere ka Bugesera, mu Murenge wa Rweru ikaba ishaka kuwubaka no mu tundi turere tugize iyi ntara, bityo bikaba agahigo.

Guverineri Uwamariya yasabye abayobozi b’uturere kugaragaza aho bahagaze mu guteza imbere ibikorwa birebana n’imiturire myiza, amazi meza ndetse n’amashanyarazi nka bimwe mu byo biyemeje kuzibandaho, maze bose bamusubiza ko ibi bikorwa byose biri mu byo bashyize imbere mu mwaka utaha w’ingengo y’imari.

Icyakora aba bayobozi bagaragaje imbogamizi z’amafaranga azakoreshwa ashobora kuzababana make bitewe n’uko ingengo yimari iba ari nke.

Mupenzi George uyobora Nyagatare yagize ati "Ku bijyanye n’imiturire, mu karere dufite abantu 3600 batuye nabi muri Nyagatare, hari gahunda yo kubatuza neza iri gutangizwa, icyakora kuko bihenze bikaba bizatwara arenga miliyari zirindwi, ntabwo twavuga ko bizakorwa mu gihe gito, bizakorwa mu myaka ibiri cyangwa itatu."

Abayobozi mu Ntara y’u Burasirazuba bose bemeje ko ibikorwa byose biyemeje bigomba kugerwaho ku bufatanye n’abafatanyabikorwa ba buri karere, n’ubwo bavuga ko muri iyi ntara hakunda kugaragara ikibazo cy’imwe mu miryango mpuzamahanga igaragaza ubushake buke mu gufasha uturere bitewe n’uko baba bahanze amaso kuri gahunda zabo bwite. Gusa Guverineri Uwamariya yabagiriye inama yo gukorana n’amadini ndetse na sosiyete sivile mu rwego rwo guhigura imihigo y’uturere twabo ndetse no kuduteza imbere.

Mu rwego rwo kuzamura umubare w’abafite umuriro w’amashanyarazi, Intara y’u Burasirazuba yiyemeje kutita ku mashanyarazi atangwa n’ikigo cy’igihugu gishinzwe ingufu, ahubwo ngo bagomba gushishikarira gukorana n’abandi bafatanyabikorwa batanga ingufu zituruka ku mirasire y’izuba.

Iyi ntara ngo ifite gahunda ko mu mwaka utaha amashanyarazi azaba ari ku kigero cya 70%, gusa ngo iracyabangamiwe n’abafite amashanyarazi batayacana bitewe no kutishyura amafaranga ya cash power.

Umuyobozi Mukuru wungirije w’Ikigo cy’Igihugu cy’Imiyoborere, RGB, Ambasaderi Fatuma Ndangiza, wari wifatanyije n’aba bayobozi muri iyi nama, avuga ko by’umwihariko muri uku kwezi hazashyirwa imbaraga mu gukangurira abaturage gukoresha amashanyarazi, kwita ku miturire myiza ndetse no kugira amazi mu rwego rwo kwihutisha iterambere.

Muri uku kwezi kwatangiye tariki ya 14 Nzeri 2016 kukazarangira tariki ya 30 Ukwakira 2016, RGB ifite gahunda yo kuzenguruka intara zose ishishikariza abayobozi guha umwanya abaturage mu kwihitiramo ibikorwa bibanogeye babona bikwiye kwitabwaho mu mihigo.

Abayobozi banyuranye kuva ku karere bari bitabiriye iyi nama
Abayobozi mu nzego zinyuranye bari bitabiriye iyi nama y’Intara
Guverineri Uwamariya asaba abaturage badindiza iterambere kwisubiraho
Ambasaderi Fatuma Ndangiza avuga ko muri uku kwezi kw'imiyoborere bazegera abaturage

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved