Ubujura n’amakimbirane yo mu miryango ku isonga mu bihungabanya umudendezo w’Abanyarwanda

Yanditswe na Prudence Kwizera
Kuya 20 Werurwe 2017 saa 09:02
Yasuwe :
0 0

Ubushakashatsi bw’Urwego rw’Igihugu rw’Imiyoborere mu Rwanda RGB (Rwanda Governance Board), bwerakana ko ubujura, amakimbirane yo mu miryango n’amakimbirane ashingiye ku butaka ari byo byagaragajwe n’abaturage ko biri ku gipimo kiri hejuruya 50% mu bibahungabanyiriza umudendezo.

Ni ubushakashatsi bukorwa buri mwaka kuri gahunda zitandukanye zijyanye n’imibereho y’Abanyarwanda hagamijwe kureba uko babayeho, iterambere ryabo n’ibibazo bafite kugira ngo bishakirwe umuti,ubuheruka gukorwa bukaba bwarashyizwe hamwe mu gitabo cyiswe ‘Citizen Report Card/CRC 2016’.

Ubu bushakashatsi bwakozwe muri Nzeri 2016, ariko RGB ikaba imaze iminsi ibusobanurira abayobozi hirya no hino mu turere tw’igihugu bwerekana ko hakwiye gushyirwa ingufu mu kurwanya ubujura no gukumira amakimbirane yo mu kiryango n’ashingiye ku butaka.

Abaturage babajijwe bagaraje ko ubujura buri ku kigereranyo cya 68.3%, amakimbirane yo mu miryango kuri 61%, na ho amakimbirane ashingiye ku butaka akaba ababangamiye ku gipimo cya 55.5%.

RGB ivuga ko abaturage bayigaragarije ibyifuzo by’uko ubuyobozi bwashyira ingufu mu gushaka umuti w’ibyo bibazo uko ari bitatu.

Umuyobozi muri RGB ushinzwe ubushakashatsi, Félicien Usengumukiza, ubwo aheruka mu karere ka Huye kuganira n’abayobozi ku bijyanye n’ubu bushakashatsi yavuze ko basanze ahanini bishingira ku biyobyabwenge, atanga inama ku cyakorwa ngo umudendezo w’abaturage ube nta makemwa.

Usengumukiza ati “Inama twabagira ni ugukomeza gukangurira abantu kumenya uburenganzira bwabo no kumenya kubana neza mu miryango. Ariko nkuko benshi babivuze usanga byose bishamikiye ku biyobyabwenge, kuko iyo ababinywa bamaze kubifata nibwo bishora mu bindi byaha birimo ubujura n’urugomo. Gukumira ibiyobyabwenge no kubikihashya waba umuti urambye kuri ibyo bibazo”.

Bamwe mu baturage bo mu karere ka Huye baganiriye na IGIHE mu cyumweru gishize, na bo bemeza ko ibihungabanya umudendezo wabo ahanini bikomoka ku biyobyabwenge, bityo bagasaba ubuyobozi kongera ingufu mu kubihashya.

Sebakungu ati ”Abantu birirwa ku tubari bicaye banywa ibikwangari, abandi bakanywa urumogi, inzara iyo ibishe nibo bajya kwiba kuko ntacyo bakora, ese ko birirwa bicaye ayo banywera bayakura he? Abo kandi ni bo bataha mu ngo zabo barwana cyangwa bakarwanira mu tubari. Icyo twasaba ni uko ubuyobozi bwaca ubusinzi, na bo bantu birirwa mu tubari bakabiruka bakajya gushaka icyo bakora bakabona ibyo kurya bivuye mu maboko yabo”.

Abayobozi bitabiriye inama yabahuje na RGB mu Karere ka Huye bavuze ko ubushakashatsi bubakanguye, bityo bakaba bagiye gushyira ingufu ahakiri inyuma y’ahandi kugira ngo iterambere ry’abaturage rikomeze nta kiribangamiye.

Ubushakashatsi bwa RGB bwakozwe kuri Serivisi zigera kuri 13, zirimo imibereho myiza y’abaturage, umudendezo n’ibibazo by’ihohotera, iyubahirizwa ry’amahame y’imiyoborere, umutekano n’ibindi.

Umuyobozi muri RGB ushinzwe ubushakashatsi, Félicien Usengumukiza
Dr Sendegeya(Ibumoso), Umuyobozi w'Ibitaro bya Kaminuza bya Butare, Meya w'Akarere ka Huye, Kayiranga Muzuka Eugene na Felicien Usengumukiza, Umuyobozi muri RGB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza