Abanyakigali basabwe gushyira ibimenyetso ku bikoresho byabo

Yanditswe na Kanamugire Emmanuel
Kuya 30 Ugushyingo 2016 saa 11:52
Yasuwe : XX
0

Ubuyobozi bw’Umujyi wa Kigali bwasabye abawutuye kujya bashyira ibirango ku bikoresho bitandukanye batunze kugira ngo bijye biborohera kubibona igihe babyibwe.

Muri iki gihe ubujura bugenda bufata indi ntera ahibwa cyane cyane Lap Top, telefone, amaradiyo, televiziyo n’ibindi.

Ibi ni bimwe mu byatumye ubuyobozi bw’Umujyi wa Kigali bufata icyemezo cyo gusaba abaturage kujya bibuka gushyira ibimenyetso byihariye ku bikoresho bishya baguze cyangwa ibyo basanzwe batunze.

Umuyobozi w’Umujyi wa Kigali, Mukaruliza Monique yabwiye IGIHE ko impamvu ari uko kuri sitasiyo za polisi zo mu Mujyi wa Kigali huzuye ibikoresho by’ibijurano byafashwe ariko bikaba byarabuze banyira byo.

Yagize ati “Impamvu ni uko ubu kuri sitasiyo za polisi hari ibintu byinshi birimo za televiziyo n’ibindi byibwe byafashwe ku buryo n’aho kubishyira hatangiye kubura.”

Yavuze ko iyo abaturage bagiye kuri sitasiyo za polisi bakananirwa kugaragaza ibimenyetso ko bimwe muri ibyo bikoresho ari ibyabo bituma batabihabwa.

Ubusanzwe mu mpera z’umwaka ubujura buriyongera bamwe bashaka kwinezeza mu minsi mikuru mu byo batavunikiye.

Polisi y’u Rwanda ntihwema kuburira abateze amakiriro mu bujura ibasaba ko bayashakira mu murimo kandi ikizeza ko ifite ingamba zo kubahashya.

Umuybozi w'Umujyi wa Kigali, Monique Mukaruliza yasabye abaturage kujya bashyira ibimenyetso ku bikoresho batunze ngo nibyibwa babisubizwe
Hamwe na hamwe abajura biba nyuma yo gutobora inzu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE