Abakora mu buzima bajyanwa mu itorero hagamijwe kunoza serivisi batanga

Yanditswe na Ishimwe Israel
Kuya 28 Ugushyingo 2016 saa 03:38
Yasuwe : XX
0

Abayobora n’abakora mu nzego z’ubuzima mu Rwanda basaga 800 bitabiriye itorero bazatorezwamo indangagaciro z’umuco Nyarwanda zizabafasha kuzahura ireme ry’ubuvuzi ryasubiye inyuma kubera imico mibi ya bamwe.

Iryo torero riri kubera i Gabiro mu Karere ka Gatsibo guhera tariki ya 27 Ugushyingo rizasozwa kuya 5 Ukuboza 2016.

Umunyamabanga wa Leta muri Minisiteri y’Ubuzima ushinzwe Ubuzima Rusange n’Ubuvuzi bw’Ibanze, Dr Ndimubanzi Patrick, yaberetse aho serivisi z’ubuzima zigeze mu Rwanda.

Ati “Murabizi ko igihugu cyacu nyuma ya Jenoside yakorewe Abatutsi mu 1994, cyari gikeneye kongera kwiyubaka, cyariyubatse […] by’umwihariko mu gutanga ubuvuzi, u Rwanda rukora ndetse rukagera kuri byinshi ku buryo ubu amahanga asigaye aza kutwigiraho.”

Yakomeje atangaza ko ibyagezweho bitasigasiwe uko bikwiye kuko hari ibibazo byagaragaye muri urwo rwego bishingiye ku gutakaza zimwe mu ndangagaciro z’umuco nyarwanda.

Ati “Aho gukomeza indangagaciro n’ubutore twahoranye, abakozi bamwe mu nzego z’ubuzima bimitse za kirazira zirimo ubugwari, kwakira nabi ababagana, ubuhemu, umururumba no kunyereza umutungo wa rubanda n’ibindi.”

Ibyo bikorwa yavuze ko bigayitse byatumye serivisi z’ubuzima n’ubuvuzi ziteshwa agaciro, abakozi bo mu buzima batakaza icyizere, bimwe mu bipimo by’ubuzima biramanuka, ubuzima bw’Abanyarwanda bashinzwe burahungabana.

Hagaragaye abatubahiriza inshingano zabo, kutakira neza ababagana no kudindiza serivisi zihabwa abaturage, kudashobora guhangana vuba n’indwara z’ibyorezo, imikoranire itanyuze mu nzego z’ubuzima n’imicungire mibi y’umutungo muke u Rwanda rufite mu mavuriro.

Ati “Muri make bimwe mu bigize ireme ry’ubuvuzi ryasubiye inyuma cyane. Niyo mpamvu nyuma y’uko hagaragara ibi bibazo twifuje gukora itorero, kugira ngo ibyiciro byose by’abakora muri serivisi z’ubuzima batozwe indangagaciro na kirazira by’umuco nyarwanda.”

Iminsi bazamara muri iryo torero ngo baziyibutsa inshingano zabo, basobanurirwe neza icyerekezo n’intego z’igihugu ku bijyanye na politiki y’ubuzima n’uruhare rwa buri wese kugira ngo izo igihugu cyihaye zigerweho.

Umusaruro…

Dr Ndimubanzi yavuze ko umusaruro igihugu kibitezeho nyuma y’iryo torero ari uguhindura imyumvire n’imyitwarire, bakarangwa n’umuco w’ubutore, bagakoresha ubumenyi bazahakura kugira ngo barusheho kubungabunga ubuzima bw’Abanyarwanda.

Ibyo ngo bizajyana no kugira imikorere mishya, cyane yubakiye mu gutanga serivisi nziza ku Banyarwanda, no guharanira guteza imbere urwego rw’ubuzima n’iterambere muri rusange.

Ati “Tugomba kuva hano turi Abanyarwanda baharanira ishema ryabo, bafite indagagacizo zibaranga, kandi bashaka impinduka nziza kandi zihuta. Nimuhaguruke dukenyere, imihigo irakomeje.

Mu bikorera bite?

Umuyobozi w’ibitaro, La Croix du Sud, Dr Nyirinkwaya Jean, yemeza ko hari n’abikorera barangwa na serivisi mbi nubwo baba bagamije kwita ku bantu no kubona inyungu y’amafaranga, gusa ngo n’abivuza si shyashya.

Ati “Hari n’abakozi batukisha bose, duhora dukora inama zo kubatoza ikinyabupfura ngo abantu tubafashe gukora neza.[…] Niba uje ugasanga hari abantu 10 bari imbere yawe ugomba kubategereza bakabanza, ntuvuge ngo baguhaye serivisi mbi kuko batarakugeraho ako kanya.”

Ibihumbi 19 bazatozwa

Umuyobozi w’Ibitaro bya CHUK, Dr Hategekimana Théobald, yavuze ko serivisi zo mu buzima zizakomeza gutera imbere kurushaho aho abayobozi n’abakozi bari muri serivisi z’ubuzima muri leta bagera ku bihumbi 19 bazaba bamaze kugana iri torero kugera muri Werurwe 2017.

Ati “Serivisi nziza burya hari ikintu zigenderaho gikomeye cyane, kitava mu mashuri umuntu yize. Yego ushobora kuba warize ukaminuza ukagira Phd no kuminuza birenze (specialisation), ariko gutanga serivisi bikakunanira.”

Ku bakora muri urwo rwego ngo hari icyo bahishiwe. Ati “Kera uko Umuryango nyarwanda wari umeze, buri wese yabaga ari uruhembe agomba kurasaniramo, umugabo azi ko agomba kujya ku rugerero kurinda igihugu, abagore bagasigara inyuma bari mu burere bw’umwana bakabatoza.”

“No mu buvuzi, umuganga wese aho ari afite ururembo arasaniramo[…] Ni kwa kureba umurwayi umugana, akamenya uko amwakira n’uko amuvura. Ni indangagaciro utigira mu ishuri ahubwo wigira mu itorero ukavuga uti ‘noneho muri bwa Bunyarwanda bwanjye bwa bumuntu bwanjye, ni gute ngomba gutanga iriya serivisi nkoresheje ibyo nize n’ubushobozi navanye mu ishuri?”

Gusesagura ibya leta ni ukwihima

Umuyobozi w’ibitaro bya Ruhengeri, Dr Ayingeneye Violette, yavuze ko biteze guhindura imyumvire mibi yarangaga bamwe.

Ati “Ni ukwita cyane ku kurinda Abanyarwanda indwara kurusha uko twari tumaze iminsi dutegereza ko twakira cyane abatugana ngo tubatabare mu gihe bahuye n’uburwayi ndetse n’ibizazane by’ubuzima,duharanira kugaragaza isura nziza y’ubuzima n’u Rwanda muri rusange.”

Ayingeneye yemeza ko hari bamwe mu baganga bakora nabi, kuko ngo nta byera ngo de ndetse ko n’inda ibyara Mweru na Muhima.

Ati “Hari abaganga koko bataye indangagaciro zabo, batacyakira abarwayi babagana nk’uko bigomba bitwaje impamvu zitandukanye.”

Ku basesagura umutungo wa Leta yasanze bahemuka ariko banibeshya kuko ngo leta ari buri Munyarwanda, kandi ibyo bikoresho n’ibikorwa remezo bibereyeho gufasha buri wese n’uwo ubisesagura arimo.

Insanganyamatsiko y’iri torero iragira iti “Gira Ubuzima wiheshe agaciro” nk’umuyoboro mugari uzayobora abari muri uru rwego, banamaze guhiga imihigo bazesa.

Umunyamabanga wa Leta muri Minisiteri y’Ubuzima ushinzwe Ubuzima Rusange n’Ubuvuzi bw’Ibanze, Dr Ndimubanzi Patrick (ibumoso) mu muhango wo gutangiza iri torero
Abayobora n’abakora mu nzego z’ubuzima mu Rwanda bitabiriye itorero
Abicaye imbere bambaye imipira y'imihondo ni abatoza b'intore
Abitabiriye itorero bazahabwa amahugurwa ajyanye no gukunda igihugu ndetse no kwigishwa indangagaciro zikwiye kubaranga
Dr Nyirinkwaya asanga itorero rifasha n'abikorera kwimakaza indangagaciro z'umuco Nyarwanda
Umuyobozi w’Ibitaro bya CHUK, Dr Hategekimana Théobald (uwa gatatu uhereye ibumoso) na Dr Ndimubanzi Patrick bashimangira ko iri torero rizabafasha gukemura ibibazo bigaragara mu rwego rw'ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza