Ubuhanga bw’itsinda ry’Abanyarwanda rizakorera Volkswagen ikoranabuhanga ryo guhererekanya imodoka

Yanditswe na Cyprien Niyomwungeri
Kuya 24 Mutarama 2018 saa 08:36
Yasuwe :
2 0

Abanyarwanda umunani bibumbiye mu Kigo ‘Awesomity Lab’, cyazobereye mu bijyanye n’ikoranabuhanga ryo gukora porogaramu za telefoni na Website, bagiriwe icyizere n’uruganda rukora imodoka rwa Volkswagen, ngo bafatanye mu gushyiraho uburyo bwo gusangira imodoka ku bantu benshi.

Kuva muri Gicurasi uyu mwaka uruganda rukora imodoka rwa Volkswagen, ruzatangira icyiciro cya mbere cy’umushinga warwo mu Rwanda ruzashoramo miliyoni 20 z’amadolari. Ruzateranya imodoka 5000 ku mwaka zo mu bwoko bwa VW Polo, VW Passat [zo mu bwoko bwa Sedan] na VW Teramont (SUV) ndetse runashyireho ikoranabuhanga rizatuma umuntu atwara imodoka akayivamo undi akayikoresha.

Ikigo cy’Urubyiruko rw’Abanyarwanda, Awesomity Lab, cyatangiye mu 2016, nicyo cyatsindiye isoko ryo gukora uburyo bw’ikoranabuhanga buzifashisha porogaramu ya telefoni na mudasobwa izajya ifasha umuntu kubona imodoka no kuyishyura harebwe ibilometero yagenze. Bikazatangirira mu modoka 150.

Mu kiganiro IGIHE yagiranye n’Umuyobozi Mukuru wa Awesomity Lab, Lionel Mpfizi, yasobanuye ko muri Gashyantare 2017 ari bwo bahuye n’itsinda rya Volkswagen, batumiwe nka kimwe mu bigo bifite ubunararibonye mu bwikorezi n’ikoranabuhanga, bagahabwa amahirwe yo kwerekana application yitwa ‘Ride Hailing Car’ bakoreye Umunya-Nigeria igakundwa.

Avuga ko iyi Application ya telefoni ifasha umuntu guhamagara imodoka imwegereye ikamutwara, ngo bwishimiwe cyane n’iryo tsinda bituma Awesomity Lab yemererwa gupiganira isoko ryo gukorana na Volkswagen, inaritsindira ihigitse ibindi bigo mpuzamahanga birimo ibyo muri Afurika y’Epfo n’ahandi ku Isi.

Yagize ati “Ibi byeretse Volkswagen ko dufite ubushobozi bwo gukora ibyo bashaka ndetse ko twanabikoreye n’abandi bakiriya banini. Byatumye bagira icyizere muri twe ko nubwo turi ikigo gito cy’abantu bato, dufite ibikorwa bituvugira byerekana ko dushoboye kandi twabyerekanye.”

Yongeraho ko kuba Awesomity Lab ariyo yari ifite ibiciro byiza no gukora ibintu byiza ndetse ikagira umwihariko wo kuba iri mu Rwanda ari naho ikorera, byabongereye amahirwe.

Iri tsinda ryanakoze izindi Application zifashishwa mu burezi, ubuzima n’ubwikorezi. Mu Rwanda hari Academia ifasha guhuza abarimu n’abanyeshuri muri za Kaminuza na Umbrella isobanurira abagore n’abakobwa ibijyanye n’ubuzima bw’imyororokere yabo. Hari kandi izo bakoreye abakiliya babo bo muri Nigeria, Guinea na Congo.

Izingiro ry’imikoranire ya Awesomity Lab na Volkswagen

Volkswagen irashaka gutangiza mu Rwanda uburyo buzwi nka ‘Integrated Mobility Solutions’, bwo gusanga imodoka ziparitse ahantu ugakoresha telefoni yawe ukayifungura ukayitwara aho ushaka kujya hanyuma ukayigarura ukishyura byose kuri telefoni yawe, ibizwi nko gusangira imodoka (Car sharing).

Hari kandi n’ubundi buryo bwo guhamagara nka Taxi ukoresheje Application ikagusanga aho uri ikakugeza aho ugiye ukishyura kuri telefoni yawe, wakongera kuhava ugakoresha telefoni yawe ukabona imodoka ikwegereye ikaza kugutwara ikakugeza aho ugiye (Ride Hailing).

Mpfizi asobanura ko uruhare rwa bo muri ubu buryo bwombi ari ugukora Application ya telefoni cyangwa Laptop, izafasha abantu kubona imodoka ibatwara.

Ati “Tuzakorana na bo mu gukora izo application na website zifasha abakiliya babo n’abaturage bo mu Rwanda gushobora gukoresha serivisi za Volkswagen mu buryo bworoshye.”

Hazaba hari umurongo uhuza uduce dutandukanye muri Kigali, umuntu akaba afite application ashyira muri telefoni ye, akandikamo aho ashaka kuva n’aho agiye, akabona imodoka iri hafi ye, akayifungura akoresheje iyo application, agatwara akajya aho ashaka, akishyura bitewe n’ibilometero yagenze.

Ikoranabuhanga ryose rizarangira nibura muri Gicurasi. Rizakorwa hifashishijwe uburyo bwa GPS uru rubyiruko rwakoze bwitwa ‘Fleet Management System’, buzatuma imodoka ikurikiranwa hakamenyekana aho iherereye.

Ubu buryo buzakoreshwa na bose kuko hazajyaho n’umurongo umuntu yahamagara ku bantu badafite smartphone bakoreshamo iyo application.

Inyungu ni nyinshi

Ibi bizatuma abantu badafite imodoka cyangwa badashaka gukoresha izabo babona izo batwara muri gahunda zabo bakishyura bitewe n’ibilometero bagenze kandi byose bigakorerwa ku ikoranabuhanga. Bizoroshya ubwikorezi kuko umuntu azajya atunga imodoka mu gihe akeneye kuyikoresha gusa.

Bizagabanya igihe abantu bamara bategereje imodoka zitwara abantu mu buryo rusange kuko imodoka za Volkswagen zizaba ziparitse hafi y’ahakorerwa ubucuruzi, ahahurira abantu benshi n’ahandi, ugakoresha application ya telefoni ukayitwara ukishyura uhageze ukongera ukayiparika ukagenda.

Nta hantu na hamwe ku Isi ibi byari byakorwa kuba ikigo cyakwikorera imodoka kikanakora uburyo abaturage bazifashisha mu gukoresha izo modoka.

Lionel Mpfizi (hagati), Yves Ndejuru (iburyo) na Jisca Azaba bakorana muri Awesomity Lab
Bamwe mu bagize Awesomity Lab igiye gukorana na Volkswagen

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza