Ubuhamya bwa Rukundo waciwe urutoki n’umujura

Yanditswe na Ishimwe Israel
Kuya 11 Ugushyingo 2016 saa 11:13
Yasuwe : XX
91 54

Rukundo Elie uvuka mu Murenge wa Kimisagara mu Karere Nyarugenge mu Mujyi Wa Kigali avuga ko amaze amezi ane aciwe urutoki n’umujura wari umaze kumwiba telefone ye ndetse ko byagize ingaruka ku buzima bwe.

Uyu musore w’imyaka 26 yaciwe urutoki mu masaha ya saa mbili mu ijoro ryo ku wa 23 Nyakanga 2016, ubwo yari mu Kagari ka Kimisagara mu Murenge wa Kimisagara hafi y’umuhanda wa Kaburimbo avuye ku ishuri.

Yavuze ko ababazwa cyane n’uburyo yahuriye n’umujura mu nzira akamwaka telefone ye yamara kuyimuha agahita amukata urutoki kandi atamurwanyije.

Yagize ati “Nari mfite telefoni yanjye mu kuboko kw’iburyo noneho mbona umuntu araje arambwira ngo nyimuhe vuba ndayimuha ahita anyambura amataratara nari nambaye ayakubita hasi ngiye kuyatora ahita anjomba ikintu ku kuboko.”

Akomeza avuga ko kubera ko kumenyera kwambara amataratara, byatumye atamenya icyo uwo mujura yakoresheje amutema urutoki kuko atashoboraga kureba neza.

Rukundo avuga ko akimara gucibwa urutoki, yahise avuza induru kubera ububabare bituma abanyerondo bari aho hafi bamutabara ku buryo birutse kuri uwo mujura baramufata.

Yagize ati “ Nkivuza induru yarirutse abanyerondo bamwirukaho baramufata bahita bamujyana ku Murenge nabo bamwohereza kuri Sitasiyo ya Polisi ya Nyamirambo, ku buryo naje kumukurikirana bambwira ngo bamumanuye muri Gereza ya 1930."

Akimara gucibwa urutoki yagowe cyane no kwandika igitabo gisoza amashuri ya Kaminuza muri ULK, ishami rya Rubavu riherereye mu Ntara y’Iburengerazuba bitewe n’uko yari agifite ibikomere.

Akomeza avuga ko aterwa ipfunwe cyane n’uburyo yamugajwe kandi yaravutse afite ingingo zose. Yasoje avuga ko ategereje kuzakurikirana urubanza rw’umujura wamuciye urutoki ruzasomwa muri uku kwezi.

Rukundo bamukase urutoki rwa kabiri rukurikira igikumwe
Agaragaza ukuboko umujura yamukaseho urutoki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE