Ubuhamya bwa Mukandayisenga wigobotoye uburaya n’ubusinzi yinjiyemo afite imyaka 17

Yanditswe na Evariste Nsengimana
Kuya 31 Gicurasi 2018 saa 08:13
Yasuwe :
2 0

Mukandayisenga Ester ni umukobwa w’imyaka 26 y’amavuko uvuka mu Murenge wa Rusororo, mu Karere ka Gasabo, avuga ko yishoye mu ngeso mbi z’uburaya yavangaga no kunywa inzoga ubwo yari akiri umwana w’imyaka 17 y’amavuko, abitewe n’amakimbirane yaranze umuryango yabagamo.

Ubuhamya bwe yabutangiye mu mahugurwa umuryango ‘Humanite & Inclusion’ wahoze ari Handicap International, wahaga abanyamakuru, kuri uyu wa 30 Gicurasi 2018, agamije gukumira ihohoterwa rikorerwa mu ngo.

Asobanura uko yabitangiye, Uyu mukobwa ufite umwana yabyariye muri uwo mwuga yagize ati “Umwuga w’uburaya, nawutangiye kubera ubuzima bw’amakimbirane y’ababyeyi banjye. Nabonye ubuzima bw’iwacu bunaniye, kuko ababyeyi banjye iteka, uko bwije n’uko bukeye bansiganiraga, mbona nta bundi buzima, ngize imyaka 17, numva ko njyewe ngiye kwigira i Kigali.”

Uyu mukobwa wabyawe na Nyina yarahukanye, akaba ari nayo ntandaro yo kutishimirwa n’ababyeyi, yasobanuye ko yaje kugirana agakungu n’abandi bakobwa bagenzi be, bamujyana gukora akazi ko mu rugo i Kigali.

Ati “Tugezeyo tugenda banjyanye mu kazi ko mu rugo, mpakora ukwezi kumwe, ntangira kubona ko katankwiriye, mugenzi wanjye arambwira ngo ngwino twigire kuba twenyine (muri ghetto), tujye kwiberaho mu buzima bworoshye.”

Uko niko yinjiye mu buraya, nyuma y’imyaka ibiri, yaje gutwariramo inda ubuzima buramugora.

Ati “Maze gutwara inda, noneho ubuzima mbona burancanze, nta handi hantu najya, nkumva ubuzima bwanjye burarangiye. Nahise mfata inzira nsubira iwacu, Mama akimbona aravuga ati ‘Ishyano riraguye, noneho amakimbirane ariyongera.”

Mukandayisenga yabuze icyerekezo, yiyemeza gusubira mu bukode akomeza uburaya ariko bitamworoheye, kuko hari n’ubwo yasigaga umwana amufungiranye.

Ati “Ubwo umwana namushyiraga mu nzu kuko numvaga ibyanjye n’iby’umwana ntacyo bivuze, nkigendera, ubwo umpaye 1000 Frw, umpaye 2000 Frw, umpaye menshi. Ni ayo nyine. Nkinywera inzoga, nari ngeze ku rwego rwo kunywa n’itabi kuko numvaga ubuzima narabuhaze.”

Nyuma y’igihe kirekire abayeho muri ubwo buzima, yaje kumva amakuru ko umuryango Handicap International uri kwandika abakobwa bakora umwuga w’uburaya, ntiyabiha agaciro ahubwo akeka ko bashaka kugira ngo babafunge.

Yabwiye ababimubwiye ati “Mwarasaze, bari budufunge nitujyayo. Njye ndihara, ndavuga nti reka n’ubundi ubuzima bwanjye ko nabuhaze, reka nigireyo ndebe n’ubundi nta heza, ndi hagati yo gupfa no gukira. Ubwo mba ndagiye.”

Nyuma yo kugerayo agasangayo abandi bahuriraga muri uwo mwuga, bakiyandikisha, bahise batangira guhabwa amasomo y’isanamitima, abumvisha ko nta keza ko gukora uburaya no gukoresha ibiyobyabwenge, ariko abanza kwinangira yumva ko atazabona uko abaho n’umwana we.

Nyuma y’amahugurwa, yaje kumva akamaro k’umushinga n’inyigisho zawo. Ati “Ubu ndashima Handicap ko navuye mu buraya, ubu ndi mu itsinda badushyizemo, baduha umuhuza [...] tukizigama 100 Frw tuza kugera ku mafaranga menshi ku buryo twagabanye, ntangira kujya ncuraza utuntu, igihe kiragera twiga umushinga badutera inkunga, ubu ducuruza ihene.”

Yunzemo ati “Ngeze aho mfata umwanzuro wo kureka ibiyobyabwenge, n’umugabo yaza yamvugisha nkamubwira ‘oya njyewe narahindutse, nzarya duke niryamire kare’ bati ‘ubwo se uzava muri uyu mwuga ukure he amavuta?’ nti ‘oya, ubu n’uje ndamubwira nti oya.”

Mukandayisenga ubu ni umucuruzi w’ihene, yigishijwe gukora imyenda, kuri ubu ni umujyanama w’ubuzima, asigaye agishwa inama n’abo yasize mu buraya. Umwana we agize imyaka umunani.

Ati “Ubu ndi umujyanama w’ubuzima n’abakobwa b’indaya bari bagenzi banjye baza kungisha inama bambaza bati ‘tubwire umuti wanyoye, nkababwira nti muzaze tujye twegera abafatanyabikorwa, umushinga uduhugure kuko nanjye nibo muganga wamvanye mu mwuga.”

Yasoje agira inama ababyeyi yo kwita ku bana no kubarera neza, bakirinda amakimbirane yo mu muryango kuko ariyo ntandaro y’ibibazo byugarije umuryango birimo kwicana, ibiyobyabwenge, uburaya, ubuzererezi n’ibindi.

Mukandayisenga ubu ni umucuruzi w’ihene, yigishijwe gukora imyenda, kuri ubu ni umujyanama w’ubuzima, asigaye agishwa inama n’abo yasize mu buraya
Mukandayisenga Ester ni umukobwa w’imyaka 26 y’amavuko uvuka mu Murenge wa Rusororo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza