Kwamamaza

Ubuhamya bw’umukozi wo mu rugo wafashwe ku ngufu ari gukoropa

Yanditswe kuya 25-11-2016 saa 09:56' na Hakizimana Thamimu


Umukobwa w’imyaka 18, uvuka mu Kagari ka Murama, mu Murenge wa Bweramana wo mu Karere ka Ruhango mu Ntara y’Amajyepfo avuga ko nyuma y’ibyumweru bitatu n’igice atangiye gukora akazi ko mu rugo mu Mujyi wa Kigali yaje gusagarirwa n’umusore baturanye amufata ku ngufu amusanze ari gukoropa.

Uyu mukobwa umaze igihe gito atangiye gukora akazi ko mu rugo, mu Mudugudu wa Kokobe mu Kagari ka Nyakabanda mu Murenge wa Nyakabanda mu Karere ka Nyarugenge, avuga ko yakajemo kugira ngo ashakishe imibereho kubera ko yavutse mu muryango ukennye.

Mu buhamya bwe, yatangarije IGIHE ko buri gihe iyo yibutse cyangwa agatekereza uburyo yafashwe ku ngufu yumva yakwiyahura.

Yagize ati “Nta kintu na kimwe kijya kimbabaza nk’uburyo nafashwe ku ngufu, n’umuntu utambaye agakingirizo.”

Yavuze ko ubwo yari amaze icyumweru kimwe gusa atangiye gukora akazi ko mu rugo, nyirabuja yamusize wenyine mu nzu, ajya kurwaza umuvandimwe we mu bitaro bikuru bya Kigali (CHUK) ndetse anasiga amubwiye ngo ntazate urugo.

Ngo nyirabuja amaze kugenda, umusore w’umuturanyi we yahise atangira kumutereta amubwira ko amukunda ndetse ko bimugora kuryama ataramubona.

Yongeyeho ko uwo musore yahise atangira no kujya amuzanira amandazi n’umutobe (jus) buri gihe mu masaha y’ijoro atashye bagasangira ariko atazi icyo agamije.

Ati “Iyo yabizanaga nibwo yambwiraga ko ankunda, njye nkamubwira ko bimureba ku buryo byagezeho akajya azana amafaranga ibihumbi bitanu, akambwira ngo nta kigenda cyanjye kuko ndi kuyirengagiza.”

Tariki ya 5 Ugushyingo 2016, nibwo uwo musore yamufashe ku ngufu amusanze arimo gukoropa yambaye isume.

Yagize ati “Nashidutse yafunguye urugi, noneho ahita amfata ambwira ngo ntaho mucikira kuko nari nambaye isume nunamye twarakiranye andusha ingufu ahita ansambanya ku ngufu. Kubera ahantu dutuye ari ku gasozi nagerageje no kuvuza induru ntihagira abantu babyumva.”

Yakomeje avuga ko yabuze uburyo yabibwira abaturage n’ubuyobozi bitewe n’uko na nyirabuja yari yaramubujije guta urugo, ku buryo yaje kubwira umukoresha we ko yafashwe ku ngufu kuwa Gatandatu tariki 19 Ugushyingo 2016 hashize igihe.

Yasoje asaba ubuyobozi ko bwamufasha bukamurenganura cyane cyane ko afite ubwoba bw’uko ashobora kuba yaramwanduje agakoko gatera Sida.

Uyu musore wamufashe ku ngufu ubu afungiye ku Murenge wa Nyakabanda aho biteganyijwe ko agomba kuva ajyanywa kuri Sitasiyo ya Polisi ya Rwezamenyo nyuma y’uko mu gitondo cyo ku wa 21 Ugushyingo, abaturage basanze yikingiranye ari kumwe n’abakobwa babiri b’abaturanyi be, bakamushinja ko yari arimo kubasambanya.

Nyirabuja we avuga ko yababajwe cyane n’uburyo umuturanyi we ariwe wamufatiye ku ngufu umukozi mu gihe yari azi ko aramutse ahuye n’ibyago ariwe wamutabara.

Ati “Njye nkiva kwa muganga umukozi wanjye yahise ambwira ngo sinkavugishe uriya musore w’umuturanyi wanjye kuko ari umugome, nibwo nagize amatsiko yo kumubaza impamvu ambwira ko yamufashe ku ngufu, anamubwira ko nabimbwira azamwica.”

Umukobwa w’imyaka 18 wafashwe ku ngufu ari gukoropa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved