00:00:00 IGIHE NETWORK KN KINYARWANDA EN ENGLISH FR FRANCAIS

Ubufatanye mu bumenyi mu by’isanzure n’umutekano muri Afurika: Ibyaranze urugendo rwa Minisitiri Dr Biruta i Moscow

Yanditswe na Ndahayo Emmanuel
Kuya 7 Ukwakira 2021 saa 06:53
Yasuwe :
0 0

Minisitiri w’Ububanyi n’Amahanga w’u Rwanda, Dr. Vincent Biruta, ari mu Burusiya mu ruzinduko rugamije guteza imbere umubano w’ibihugu byombi, aho yakiriwe na mugenzi we w’u Burusiya, Sergey Lavrov.

Ni uruzinduko Minisitiri Biruta yagiriye mu Burusiya akubutse muri Finland, aho yabonanye n’abayobozi barimo Minisitiri w’Uburezi, impande zombi zikagirana ibiganiro bigamije guteza imbere ubufatanye bw’ibihugu byombi muri urwo rwego.

Kuri uyu Kane, Minisitiri Biruta yagiranye ibiganiro byihariye na Minisitiri Lavrov, byagarutse ku ngingo zitandukanye, cyane cyane zijyanye no guteza imbere umubano w’ibihugu byombi umaze imyaka irenga 55 utangiye.

Uyu mubano kandi wanagaragaye mu minsi ishize, aho u Burusiya buri mu bihugu byoherereje u Rwanda ibikoresho byo kwifashisha mu guhangana n’icyorezo cya Covid-19.

Uyu mubano kandi washyizwemo imbaraga mu myaka itatu ishize, bitewe ahanini n’ingendo zo ku rwego rwo hejuru zabaye hagati y’ibihugu byombi.

Minisitiri Lavrov yagiriye uruzinduko mu Rwanda mu 2018, mu gihe Perezida Paul Kagame na we yarugiriye mu Burusiya mu 2018 ubwo iki gihugu cyakiraga imikino y’Igikombe cy’Isi, icyo gihe akaba yaragiranye ibiganiro na mugenzi w’u Burusiya, Perezida Vladimir Putin.

Aba bayobozi bombi kandi bongeye kubonana mu 2019 mu Nama ya mbere yahuje u Burusiya na Afurika, aho bagiranye ibiganiro mu bijyanye no gukomeza gushyigikira iterambere ry’ibihugu byombi. Minisitiri w’Intebe w’u Rwanda, Dr. Edouard Ngirente, ndetse n’Umugaba Mukuru w’Ingabo, na bo baherutse kugirira ingendo mu Burusiya.

Mu kiganiro n’abanyamakuru, Minisitiri Biruta yavuze ko ibiganiro yagiranye na mugenzi we Lavrov, byibanze ku guteza imbere imikoranire mu nzego zirimo ubumenyi mu by’isanzure, ubuvuzi, ingufu za nuclear n’ibindi bitandukanye.

Yagize ati “Uretse umubano twamaze kubaka, mu bihe biri imbere turifuza guteza imbere ubufatanye binyuze mu nzego z’uburezi, ubuzima, imikino no mu bushakashatsi mu bijyanye n’isanzure. Duherutse gushyiraho Ikigo gishinzwe Isanzure, kandi dushobora kungukira mu bunararibonye bw’u Burusiya muri ibyo bikorwa.”

U Burusiya ni kimwe mu bihugu bifite ubunararibonye buhambaye mu bijyanye n’isanzure, aho abashakashatsi babwo ari bo ba mbere bakoreye ingendo hanze y’Isi, ndetse n’uyu munsi u Burusiya bubarirwa mu bihugu bya mbere bifite ubumenyi n’ikoranabuhanga riteye imbere mu bijyanye n’amakuru y’isanzure.

Minisitiri Biruta yavuze ko ibiganiro hagati y’u Rwanda n’u Burusiya bikomeje mu rwego rw’ubuzima, aho mu minsi iri imbere ibihugu byombi bizasinya amasezerano y’ubufatanye muri uru rwego, mu gihe ingingo zose zizaba zimaze kwemeranywaho.

Yanavuze ko impande zombi “Ziri gukorana ku masezerano y’ubufatanye mu bya siporo, aho tubona ko ibihugu byombi byakungukira mu bunararibonye bwa buri kimwe.”

Minisitiri Biruta kandi yashimangiye ko u Burusiya busanganywe imikoranire myiza n’u Rwanda mu bijyanye n’ubucuruzi, umutekano n’ibindi bitandukanye, nubwo bigikenewe gushyirwamo imbaraga.

Ku ruhande rwa Minisitiri Lavrov, yavuze ko impande zombi zisanganywe umubano mwiza, anashimira uruhare rw’u Rwanda mu bikorwa byo kugarura umutekano muri Afurika, aho u Rwanda rufite ingabo mu butumwa bw’Umuryango w’Abibumbye mu bihugu birimo Centrafrique, ndetse rukanagira ingabo ziri muri Mozambique ku bufatanye bw’ibihugu byombi.

Uyu muyobozi yavuze ko igihugu cye cyifuza gukomeza guteza imbere umubano w’u Burusiya n’u Rwanda mu bijyanye n’ubucuruzi, ishoramari, ubucukuzi bw’amabuye y’agaciro, ingufu za nucléaire zikoreshwa mu buryo bw’amahoro, ubuhinzi n’ibindi bitandukanye.

Minisitiri Lavrov yavuze ko ibiganiro ku mpande zombi byanagarutse ku biganiro bimaze iminsi mu Kanama gashinzwe Umutekano mu Muryango w’Abibumbye, aho u Burusiya bwakomeje gusaba ko ibihugu biri mu nzira y’amajyambere byahagararirwa muri aka Kanama, ubusanzwe kagizwe na Leta Zunze Ubumwe za Amerika, u Bufaransa, u Bushinwa, u Bwongereza n’u Burusiya.

Lavrov yagize ati "Twaganiriye ku bijyanye n’aho ibiganiro ku mavugurura akenewe mu Kanama k’Umutekano ka Loni ageze. Uruhande rw’u Burusiya ntirwahindutse. Twizera neza ko aya mavugurura akwiye kujyana no kwagura umubare w’ibihugu biri mu Kanama k’Umutekano wa Loni, hakazamo ibihugu biri mu nzira y’amajyambere biturutse muri Afurika, Aziya na Amerika y’Epfo."

Minisitiri Lavrov yanahishuye ko u Burusiya buri kwitegura inama ya kabiri izahuza ubuyobozi bukuru bw’icyo gihugu ndetse n’abayobozi bakuru ba Afurika.

Minisitiri w'Ububanyi n'Amahanga w'u Rwanda, Dr. Vincent Biruta na Minisitiri w'Ububanyi n'Amahanga w'u Burusiya, Sergey Lavrov, bagiranye ikiganiro n'abanyamakuru nyuma y'ibiganiro bagiranye hagati yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .