Kwamamaza

Ububasha bwa Perezida wa Repubulika mu Rwanda bugarukira he?

Yanditswe kuya 8-09-2016 saa 07:40' na Philbert Hagengimana


Umukuru w’Igihugu mu Rwanda niwe muyobozi w’Ikirenga ushobora guha imbabazi umuntu wakoze icyaha runaka, agatangiza cyangwa agahagarika intambara, by’akarusho afite uburenganzira busesuye bwo guhagararira igihugu mu gihe abandi ariwe uba wabigennye.

Mu Rwanda Perezida wa Repubulika ashinzwe kurinda Itegeko Nshinga no kubumbatira ubumwe bw’Abanyarwanda, akishingira ko leta ikomeza kubaho, ubwigenge n’ubusugire bw’Igihugu akanubahiriza amasezerano mpuzamahanga.

Ibyo bimuha ububasha bwinshi budafitwe n’undi uwo ariwe wese mu gihugu uretse uwabuhabwa by’agateganyo mu buryo bukurikije amategeko icyo gihe bene uwo nawe yaba yitwa Perezida w’Agateganyo.

Ububasha bwo gushyira umukono ku mategeko

Ingingo ya 106 y’Itegeko Nshinga rya Repubulika y’u Rwanda igenera Perezida ububasha bwo gushyira umukono ku mategeko, ikanamuha ubwo kuba yarisubirishamo mu gihe yaba abona ritanoze. Gusa ibi abyemerewe mu gihe kitarenze iminsi 30 ritowe uhereye ku munsi ryamugerejweho.

Icyakora, mbere yo kurishyiraho umukono Perezida wa Repubulika ashobora gusaba Inteko Ishinga Amategeko kurisubiramo.

Ububasha bwo gukoresha referendumu

Ingingo ya 107 mu itegeko riruta andi riha Umukuru w’Igihugu ububasha bwo gukoresha referendumu. Ivuga ko “Perezida wa Repubulika, amaze kugisha inama Urukiko rw’Ikirenga, ashobora gukoresha referendumu ku kibazo kirebana n’inyungu rusange z’Igihugu, ku Itegeko Nshinga, ku mushinga w’Itegeko Nshinga, ku itegeko cyangwa ku mushinga w’itegeko, hakurikijwe ibiteganywa n’iri Tegeko Nshinga cyangwa andi mategeko.”

Iyo Itegeko Nshinga, umushinga w’Itegeko Nshinga, itegeko cyangwa umushinga w’itegeko byemejwe n’itora rya referendumu, Perezida wa Repubulika arishyiraho umukono mu gihe kitarenze iminsi umunani uhereye umunsi ibyavuye muri iryo tora byatangarijwe.

Ububasha bwe mu byerekeranye n’intambara, ibihe by’amage n’ibihe by’imidugararo

Perezida wa Repubulika ni Umugaba w’Ikirenga w’Ingabo z’u Rwanda. Niwe utangiza intambara, niwe ushyira umukono ku masezerano yo guhagarika no kurangiza intambara.

Ni nawe utangiza ibihe by’amage cyangwa ibihe by’imidugararo mu buryo buteganywa n’Itegeko Nshinga n’andi mategeko.

Ububasha bwo gutanga imbabazi

Perezida wa Repubulika ahabwa n’Itegeko Nshinga ububasha bwo gutanga imbabazi ku bahamwe n’ibyaha runaka, gusa ikamuha uburenganzira bwo kubikora mu buryo buteganywa n’andi mategeko, nk’igitabo cy’amategeko ahana ibyaha mu Rwanda.

Ingingo ya 109 mu Itegeko Nshinga igira iti “Perezida wa Repubulika afite ububasha bwo gutanga imbabazi mu buryo buteganywa n’amategeko kandi amaze kubigishamo inama Urukiko rw’Ikirenga.”

Ububasha bwo guhagararira Igihugu

Perezida wa Repubulika niwe wenyine ufite ububasha bwo guhagararira igihugu, undi wese niwe abikomoraho nk’aho ashobora kohereza ambasaderi mu gihugu runaka cyangwa guha uburenganzira umuntu agahagarira igihugu mu gikorwa iki n’iki.

Ingingo ya 111 mu Itegeko Nshinga igira iti “Perezida wa Repubulika ahagararira u Rwanda mu mibanire yarwo n’amahanga; ashobora kandi kugena umuhagararira.”

“Perezida wa Repubulika aha ububasha abahagararira u Rwanda mu bihugu by’amahanga n’intumwa zidasanzwe muri ibyo bihugu. Abaje guhagararira ibihugu byabo mu Rwanda n’intumwa zidasanzwe z’amahanga bamushyikiriza inyandiko zibibahera uburenganzira.”

Mu bundi bubasha bw’Umukuru w’Igihugu harimo gushyiraho amateka ya Perezida, ndetse no gushyiraho ifaranga ry’Igihugu mu buryo buteganywa n’amategeko.
Muri rusange, ububasha bwa Perezida wa Repubulika nta mupaka bugira, kuko abuhabwa n’Itegeko Nshinga kandi icyo yakora kinyuranyije na ryo agihanirwa n’amategeko nk’uko n’indahiro ye ibishimangira.

Perezida wa Repubulika, Paul Kagame

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved