U Rwanda rwungutse ibitaro bya mbere bifasha abafite ubumuga bikanakora insimburangingo

Yanditswe na Evariste Nsengimana
Kuya 3 Nyakanga 2018 saa 07:34
Yasuwe :
0 0

Guverinoma y’u Rwanda yungutse ibitaro bya mbere bizajya bifasha bikanavura Abanyarwanda bafite ubumuga bw’ingingo, bikanakora insimburangingo n’inyunganirangingo z’abafite ubumuga butandukanye.

Ibi bitaro byafunguwe kuri uyu wa Kabiri tariki 3 Nyakanga 2018 mu Karere ka Nyanza mu Murenge wa Mukingo, ahahoze ikigo cyita ku bafite ubumuga cya ‘HVP Gatagara’.

Umwe mu bafite ubumuga yatewe n’Imbasa, wafashijwe n’ikigo cya Gatagara guhera mu 1973, Nyirangabe Sawiya, yavuze ko kuba gihinduwe ibitaro, bizagira akamaro ababigana.

Yagize ati “Kuba iyi HVP Gatagara ibaye ibitaro byemewe na Leta, bizafasha barumuna bacu cyangwa n’abandi bazaza nyuma y’aha kuvurwa, ndetse turizera ko kigiye guhabwa abaganga b’inzobere n’ibikoresho bya kijyambere mu kubaga, hanyuma ubukana bw’ubumuga bugahashwa muri iki gihugu.”

“Turashima cyane uko twabaye muri iki kigo, twe tuhita ku gasozi k’amizero twahereweho icyizere, tureka kwitwa amazina mabi twahabwaga mu miryango yacu n’ahandi.”

Umuyobozi w’ibitaro bya HVP Gatagara, Frère Kizito Misago, yavuze ko bifite ubushobozi bwo gukurikirana abarwayi bacumbikiwe basaga 130, ariko ko hakiri ikibazo cy’abaganga b’inzobere mu kuvura no kwita ku bafite ubumuga.

Ubu bifite abaganga bane gusa barimo umwe w’inzobere n’undi uri kwiga muri Tanzania.

Umushumba wa Diyoseze ya Kabgayi, Musenyeri Mbonyintege Smaragde, yashimiye inzego zitandukanye zagiye zifasha ikigo cya HVP Gatagara kigakomeza kwita ku bafite ubumuga bw’ingingo, kugeza uyu munsi ubwo kigizwe ibitaro byihariye ku kuvura ubwo bumuga.

Minisitiri w’ubuzima, Dr. Diane Gashumba, yavuze ko Leta y’u Rwanda ishyize imbere gahunda zo kurwanya ivangura iryo ariryo ryose, ririmo n’irikorerwa abafite ubumuga nk’uko byakorwaga mbere, kandi ko ibyo bitaro bizanafasha abamugajwe na Jenoside.

Yakomeje agira ati "Igihugu cyacu gifite umwihariko, n’ibindi bihugu birimo abafite ubumuga ariko kubera n’amateka twagize ya Jenoside yakorewe Abatutsi, dufite abantu benshi bafite ubumuga. Dufite Ingabo z’igihugu zatakaje ingingo zazo kugira ngo ziturokore, n’abandi batari zo ariko bagize ubumuga babutewe n’abicanyi.”

Yavuze ko hari abafatanyabikorwa bo mu Bubiligi bagiye gufatanya na Leta kugira ngo ibyo bitaro bige bikorera insimburangingo n’inyunganirangingo mu Rwanda.

Yakomeje agira ati “Baje gufatanya na Minisiteri y’Ubuzima kugira ngo ibyo bikoresho batabashaga kwikorera aha, baguraga hanze bibahenze, bibashe kujya bikorerwa aha, bihenduke, buri munyarwanda wese ubikeneye abigireho uruhare, ariko icyiza ni uko bino bitaro bikorana na mituelle ku buryo ibiciro by’ibikoresho biri hasi ariko nibikorerwa hano mu Rwanda, ibiciro bizajya hasi.”

Dr. Gashumba yavuze kandi ko Minisiteri y’Ubuzima ifatanyije n’abandi bafatanyabikorwa bazakomeza gutera inkunga ibyo bitaro, kugira ngo birusheho gutanga serivisi nziza no kwakira umubare munini w’abafite ubumuga bw’ingingo.

Ikigo cya HVP Gatagara cyashinzwe mu 1958 n’umupadiri w’Umubiligi witwa Padiri Joseph Julien Adrien Fraipont waje kwitwa Ndagijimana. Gitanga ubufasha bwo kuvura abafite ubumuga, kubaha insimbura n’inyunganirangingo no kubafasha kwiga.

Kigenda cyagurwa ku bufatanye bw’Abafureri b’urukundo, kugeza ubwo mu 2017, Minisiteri y’Ubuzima yacyemereye gukora nk’ibitaro bwa mbere mu Rwanda, byihariye ku buvuzi bw’ingingo no gukora insimbura n’inyunganirangingo.

Mu Rwanda habarurwa amashami ya HVP Gatagara asaga atandatu arimo iriri i Huye, mu Ruhango, i Gikondo, i Ndera, i Rwamagana zifashirizwamo abana basaga 1650.

Ku mwaka zikora insimburangingo zisaga 110 n’inyunganirangingo zisaga 1150, ariko ubuyobozi bwabyo bukavuga ko buhendwa no kugura mu mahanga ibikoresho byo kuzikora kuko butanga ari hagati ya miliyoni 80-100Frw ku mwaka, buzigura mu Busuwisi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza