Kwamamaza

U Rwanda rwohereje abandi banyeshuri kwiga ikoranabuhanga mu Buyapani

Yanditswe kuya 30-08-2016 saa 07:00' na Tombola Felicie


Abanyarwanda 10 bagiye kwerekeza mu Buyapani kwiga icyiciro cya gatatu cya Kaminuza mu rwego rwo kurushaho kwiyungura ubumenyi mu ikoranabuhanga, imwe mu nkingi u Rwanda rushingiyeho mu kubaka iterambere rirambye ry’abenegihugu.

Mu muhango wo kohereza ku nshuro ya gatatu abanyeshuri bagiye kwiga icyiciro cya gatatu cya Kaminuza (Master’s Program) muri gahunda yiswe ABE (African Business Education Initiative for Youth) igamije guteza Afurika imbere mu kugira abakozi b’abahanga bashoboye, abagiye kugenda basabwe kugerageza kumenya ibyo u Rwanda rukeneye bakabyibandaho mu masomo yabo bakazaza babishyira mu bikorwa.

Uwari uhagarariye Minisitiri w’Urubyiruko, Ikoranabuhanga n’Isakazabumenyi, Emmanuel Habumuremyi, yasabye abanyeshuri kwiga bashishikaye, bakazana ubumenyi kuko u Rwanda ari igihugu kigamije iterambere rishingiye ku bumenyi kandi bari mu bazabigiramo uruhare.

Ati “Ntabwo u Rwanda ruzaba igihugu gifite iterambere rishingiye ku bumenyi tutibanda ku ikoranabuhanga. Muzarebere ku iterambere bagezeho, mugeraranye n’iryo u Rwanda rukeneye mubyige mubizane. Muzi aho u Rwanda rwavuye, aho ruri n’aho rwifuza kugera. Aho igihugu kigeze ni ukubera abantu bitanga bakagikorera, namwe mugende mwige muzagarukane ubumenyi bwo gutuma rukomeza gutera imbere.”

Yakomeje avuga ko ikoranabuhanga rigenda rizana udushya buri munsi akaba ariyo mpamvu u Rwanda rukomeza kujyana n’ibindi bihugu mu iterambere ngo rudasigara inyuma.

Ati “Ikoranabuhanga rigenda rizana udushya buri munsi, kuba u Rwanda ruhagaze neza mu ikoranabuhanga ntabwo byatunanira gukomeza kwiyongerera ubumenyi muri ryo.”

Ambasaderi w’Ubuyapani mu Rwanda, Takayuki Miyashita yasabye abagiye kwiga kuzazana ubumenyi buhindura ibihugu byabo kuko ni wo mugambi wa Leta ye yo kwemerera abanyafurika kwiga muri Kaminuza zo mu Buyapani ku buntu.

Ati “Twizeye ko muzazana impinduka mu gihugu cyanyu nyuma yo kurangiza kwiga, u Rwanda rugakomeza kugira isura nziza.”

Gwiza Bonhomme Maryse, umwe mu bagiye guhaha ubumenyi yatangaje ko bazaza bagakemura ibibazo bihari mu ikoranabuhanga.

Ati “Nitumara kubona ubumenyi burushijeho ubwo twari dufite ,tuzaza gukemura ibibazo bikiboneka mu ikoranabuhanga kugira ngo igihugu cyacu gitere imbere."

Aba banyarwanda 10 bagiye kwiga ni icyiciro cya gatatu aho bagiye basangayo abandi 16 bagiye mu byiciro bibiri bishize.

ABE Initiative ni gahunda y’imyaka itanu aho izasozwa abagera ku 1000 bo mu bihugu 54 bya Afurika bize muri Kaminuza zitandukanyezo mu Buyapani bikaba umusemburo w’Iterambere ku bihugu byabo ndetse no kubaka ubufatanye mu iterambere hagati ya Afurika n’u Buyapani.

Binyuze mu muryango w’Iterambere w’Abayapani JICA,abasabye kwiga bakoreshejwe ibizami byaba ibyo kwandika no kuvuga hatoranywamo icumi bujuje ibisabwa.

Abagiye kwiga bazamara imyaka ibiri n’igice biteganyijwe ko bazasoza amasomo yabo no kwimenyereza ibyo bize muri 2018.

Abanyeshuri n'abayobozi mu ifoto rusange
Emmanuel Habumuremyi, umujyanama wa Minisitiri w'Urubyiruko n'Ikoranabuhanga yasabye abagiye kwiga gushaka ibyateza igihugu imbere
Ambasaderi w'u Buyapani mu Rwanda, Takayuki Miyashita
Gwiza Bonhomme Maryse wavuze mu izina rya bagenzi be yavuze ko ubumenyi bazabona bazabukoresha mu guteza imbere ikoranabuhanga mu Rwanda
Abagiye kwiga, JICA yabageneye impano
Abanyeshuri bahabwa impanuro zikwiye kubaranga mu gihe bazaba bari mu masomo
Abayobozi ku ruhande rw'u Buyapani n'u Rwanda bitabiriye iki gikorwa
Mu banyeshuri 10 bagiye kwiga harimo umukobwa umwe

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved