U Rwanda rwiteguye kwakira impunzi z’Abanyarwanda ibihumbi 12

Yanditswe na Jean Pierre Tuyisenge
Kuya 18 Gicurasi 2017 saa 08:10
Yasuwe :
0 0

Minisiteri ishinzwe gukumira ibiza no gucyura impunzi (Midimar), yatangaje ko Abanyarwanda basaga ibihimbi 12 bagifatwa nk’impunzi aho bari, bitezweho gutahuka hagati ya Kamena 2017 na Nyakanga umwaka utaha mu rwego rwo gushyira mu bikorwa amasezerano agenga ikurwaho ry’ubuhunzi ku Banyarwanda bahunze mbere ya 1998.

Ubwo ku wa Gatatu tariki 17 Gicurasi 2017, iyi minisiteri yagezaga kuri Komisiyo y’Ingengo y’Imari n’Umutungo by’igihugu mu Nteko Ishinga Amategeko, imbanzirizamushinga y’ingengo y’imari ikeneye mu mwaka wa 2017/2018, Minisitiri Mukantabana Seraphine, yavuze ko itariki 31 Ukuboza 2017 ariyo ntarengwa ku Banyarwanda bakiri hanze bahunze mbere ya 1998.

Yavuze ko ibyo bishobora kuzatuma habaho umubare munini w’Abanyarwanda batahuka mu mwaka w’ingengo y’imari utangira muri Nyakanga uyu mwaka ukazarangira muri Kamena 2018.

Yagize ati "Bitewe n’uko itariki 31 Ukuboza ari yo ifatwa nk’iya nyuma, bashobora kuyikurikiza bagataha ari benshi. Twasabye Minisiteri y’Imari n’Igenamigambi gushyira amafaranga ahagije ku ruhande azadufasha kwakira no gutuza buri munyarwanda uzagaruka mu rugo.”

Ishami ry’Umuryango w’Abibumbye ryita ku mpunzi (UNHCR), ryakoranye na za guverinoma zo mu bihugu bitandukanye kugira ngo Impunzi z’Abanyarwanda zicyurwe mu gihugu.

Inama yabaye ku wa 30 Nzeri 2016 ku biro bya UNHCR i Genève mu Busuwisi, yemeje ko ku wa 31 Ukuboza 2017, hazahagarikwa burundu ubufasha ubwo ari bwo bwose bwagenerwaga impunzi z’Abanyarwanda zizaba zikiri mu buhungiro.

Kugeza ubu impunzi z’abanyarwanda zikiri mu buhungiro zigera ku bihumbi 245 ziri mu bihugu birenga 20 hirya no hino ku Isi, umubare munini wazo ukaba uba muri Repubulika Iharanira Demokarasi ya Congo.

Kuva mu 2002 Leta y’u Rwanda na HCR byagiye bihamagarira amahanga kohereza impunzi z’abanyarwanda mu gihugu cyabo ndetse na bo bakangurirwa gutaha kuko ibyo bari bahunze byarangiye.

Hashize imyaka ine kandi hafashwe umwanzuro ko sitati y’ubuhunzi ku banyarwanda
bari hirya no hino ku Isi ikurwaho, ibyemezo bitagiye bikurikizwa uko bikwiye ndetse n’itariki zikomeza kwimurwa kugeza hemejwe 31 Ukuboza 2017.

Ubusanzwe mu mwaka w’ingengo y’imari ya 2016-2017, Midimar yari yateganyije kwakira Abanyarwanda basaga 20,000 bagashyirwa mu buzima busanzwe, gusa abagera ku 4800 nibo bonyine batahutse. Kugeza ubu iteganya kwakira abandi 12000.

Mukantabana yagize ati " Turateganya uwo mubare, gusa ushobora kwiyongera cyangwa ukagabanuka kuko bataha ku bushake. Gusa icyo twizeye ni uko Guverinoma y’u Rwanda yiteguye kwakira uwo ari we wese uzifuza gutaha mu rwamubyaye. "

Midimar yasabye Inteko Ishinga Amategeko kwemeza miliyoni 42 Frw azafasha mu kwakira impunzi mu mwaka w’ingengo y’imari utaha.

HCR yo ivuga ko yemeye gutanga impamba ku mpunzi zishaka gutahuka mu rwego rwo gushyira mu bikorwa gahunda yayo yo gucyura impunzi.

Impunzi z'abanyarwanda ibihumbi 12 byitezwe ko zizatahuka kugeza muri Kamena 2018/Ifoto: Internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244