Kwamamaza

U Rwanda rwihanganishije Israel nyuma y’urupfu rwa Shimon Peres

Yanditswe kuya 28-09-2016 saa 09:05' na Rabbi Malo Umucunguzi


Guverinoma y’u Rwanda yihanganishije Israel nyuma y’urupfu rwa Shimon Peres wigeze kuba Perezida w’iki gihugu, witabye Imana ku myaka 93.

Mu byumweru bibiri bishize nibwo Peres yagize ikibazo cy’amaraso mu bwonko ahita ajyanwa mu bitaro igitaraganya, ubuzima bwe bwongera kuzanzamuka kugeza kuri uyu wa Kabiri ubwo yongeye kumererwa nabi kugeza ubwo ashizemo umwuka.

Minisitiri w’Ububanyi n’Amahanga w’u Rwanda akaba n’Umuvugizi wa Guverinoma, Louise Mushikiwabo, yifashishije Twitter yavuze ko “twifatanyije na Israel, imiryango n’inshuti nyinshi za Shimon Peres”

Ati “Ni umuntu ukomeye wakoreye igihugu utabarutse!”

Yagize uruhare rukomeye mu masezerano ya Oslo, ya mbere yabayeho hagati y’ibihugu byombi, Israel na Palestine, yagombaga “gutuma ibi bihugu bibana mu mahoro.”

U Rwanda rwihanganishije Israel ku bw'urupfu rwa Peres

Imyaka irenga 50 muri politiki

Peres yasezeye muri politiki mu 2014 nyuma ya manda ye y’imyaka irindwi nka Perezida. Yari muri politiki ya Israel hafi imyaka 50, akaba yaragize imyanya inyuranye irimo Minisitiri w’Ingabo mu 1976 ubwo Abanyapalestine bayobyaga indege ikayoberezwa muri Uganda, nyuma aba Minisitiri w’Intebe na Perezida.

Yahanganye na Minisitiri w’Intebe wa Israel Yitzhak Rabin ku buyobozi bw’Ishyaka ry’Abakozi hagati ya 1980 na 1990, ndetse aza kubera Rabin Minisitiri w’Ububanyi n’Amahanga.

Muri uwo mwanya Peres yanonosoye amasezerano y’amahoro ya Oslo, yanamuhesheje igikombe cy’amahoro cyitiriwe Nobel hamwe na Perezida wa Palestine, Yasser Arafat na Yitzhak Rabin wari Minisitiri w’Intebe, mu 1994.

Perezida wa Leta Zunze Ubumwe za Amerika Bill Clinton yigeze kumuvugaho ati "Ntewe ishema nawe rwose mu buzima bwanjye nk’umuntu utekereza bihambaye kandi akarota ibintu bikomeye ndetse agateganya n’uburyo bufatika bwo kugera ku nzozi ze.”

Nyuma y’iyicwa rya Rabin mu 1995, Peres yabaye Minisitiri w’Intebe, asaba ko hahita hakorwa amatora, gusa hatangiye kubaho ibitero by’abiyahuzi bya Palestine, bituma Peres ubutegetsi bwe bushegeshwa ndetse bimugiraho ingaruka aho yatsinzwe amatora.

Peres yakoze amateka

Nka Perezida wa cyenda wa Israel, mu 2007 yavugiye mu Nteko Ishinga Amategeko ya Turikiya, aba Perezida wa Mbere wa Israel uvugiye mu nteko y’igihugu gifite abayoboke benshi b’idini ya Islam.

Yasabye ibiganiro by’amahoro mu 2011 hamwe na Palestine, ndetse aburira Leta Zunze Ubumwe za Amerika kutemera Palestine nk’igihugu cyigenga bitandukanye n’amasezerano y’amahoro, mu 2012 ashyikirizwa na Perezida Obama Umudali w’Ubwigenge.

Nyuma yo kurangiza manda ye mu 2014, Peres yagumye mu mirimo inyuranye cyane ijyanye n’ibiganiro by’amahoro mu Burasirazuba bwo Hagati.

Yubakiweho Israel y’ubu

Peres yavutse mu 1923 muri Wisniew muri Pologne, ubu hitwa Vishnyeva ndetse haherereye muri Belarus. Yimukiye muri Palestine mu 1923, ari naho hatangirira inkuru ye mu mateka ya Israel.

Mu ntambara y’ubwigenge bwa Israel mu 1948, Peres niwe wari ushinzwe kugurira intwaro ingabo za Israel, nyuma aza gukurira ingabo zo mu mazi ndetse atanga umusanzu wo kubaka ibijyanye n’indege muri Israel, aho yagiranye amasezerano n’u Bufaransa bukabaha indege z’intambara.

Mu 1950 yatangije ibijyanye no gutunganya ingufu za ‘nucleaire’ kugeza n’ubu ikaba igikorera mu ibanga rikomeye, ibintu yajyaga asanisha “n’uruganda rw’ubudozi”.

Peres yinjiye muri politiki byeruye mu 1959 mu ishyaka rya Mapai ryaje guhinduka ishyaka ry’abakozi, Labor Party.

Yabaye Minisitiri w’Intebe inshuro eshatu ariko ntiyigeze atsinda amatora. Yabaye Minisitiri w’Intebe bwa Mbere ubwo mu 1977 Yitzhak Rabin yeguraga nyuma yo gutahurwaho ko yari afite konti mu mabanki yo mu mahanga. Yongeye kuba Minsitiri w’Intebe muri guverinoma y’ubumwe hamwe na mu 1984, yongera kugirwa Minisitiri w’Intebe nyuma y’iyicwa rya Rabin mu 1995.

Perezida Obama ni umwe mu bavuze ko yababajwe n’urupfu rwa Peres, ati “Hari abantu bake dusangiye iyi Isi bahindura amateka ya muntu, bidatewe n’imyanya bafite ahubwo kuko bafite ubushobozi burenze ubwo dutekereza bagatuma natwe twumva ko hari byinshi twakora. Inshuti yanjye Peres ari muri abo bantu.

Bill Clinton wigeze kuyobora Amerika yagize ati “Nzakumbura cyane Shimon Peres, inshuti ikomeye kandi izi uburyo bwo kuvuga. Ubuzima bwe bwabaye umugisha ku bantu bose baharanira amahoro.”

Incamake ku buzima bwa Shimon Peres


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved