U Rwanda rwifatanyije n’ibindi bihugu kwizihiza umunsi Mpuzamahanga w’Iposita

Yanditswe na Jean Pierre Tuyisenge
Kuya 9 Ukwakira 2016 saa 08:32
Yasuwe :
0 0

U Rwanda rwifatanyije n’ibindi bihugu mu kwizihiza umunsi mpuzamahanga w’iposita ufite intego yo kubwira abantu akamaro k’iposita mu bikorwa byabo by’ubucuruzi, mu buzima bwabo bwa buri munsi no mu iterambere ry’igihugu muri rusange.

Ni umunsi mukuru kandi ugamije gutera imbaraga ibihugu biri mu ihuriro ry’Iposita ku Isi (UPU) birimo n’u Rwanda bigakora ibikorwa bigamije kumenyekanisha akamaro kayo muri gahunda zose.

Uyu munsi wizihijwe ku wa 9 Ukwakira 2016, hazirikanwa insanganyamatsiko igira iti “ Guha Serivisi Sosiyete nshya: tuziha n’abari kure”.

Ubuyobozi bw’Iposita butangaza ko no ku rwego mpuzamahanga intego nyamukuru yakomeje kuba umukiliya. Ibi ngo ni byo byatumye yubaka umuhora w’itumanaho ku isi yose, bigatuma Iposita itanga Serivisi z’indashyikirwa zinogeye umukiliya .

Umuyobozi Mukuru w’ihuriro ry’Iposita ku rwego mpuzamahanga Bishar Abdirahman Hussein, yashimangiye ku kizere cy’Umukiliya kuko ngo ari we bashingiraho ibikorwa byabo batanga Serivisi haba ku rwego rw’igihugu cyangwa mpuzamahanga

Yongeyeho ati “ Ibi bigaragaza uburyo ibyo umukiliya akeneye birushaho kugenda bihinduka bitewe n’itumanaho rishingiye ku ikoranabuhanga rirushaho kwiyongera, bituma havuka abakiliya bakenera serivisi aho bari hose n’igihe cyose. Gusa ibi ntibizahagarika Serivisi z’Iposita ahubwo tubikuramo andi mahirwe.”

Ubwo yagarukaga ku kamaro k’Umunsi mpuzamahanga w’Iposita, Umuyobozi Mukuru wayo mu Rwanda, Célestin Kayitare, yagize ati “Uyu munsi uduha igihe cyo gutekereza uburyo twarushaho guteza imbere serivisi zacu no guhanga udushya mu rwego rwo kongera ibyo twinjiza atari kuri twe gusa, ahubwo n’iterambere ry’Igihugu muri rusange”.

Kwizihiza uyu munsi mpuzamahanga ku itariki ya 9 Ukwakira, ngo byibutsa umunsi hashingiwe Ihuriro Mpuzamahanga ry’Iposita ku Isi ku wa 9 Ukwakira 1874, mu nama ya mbere yabereye i Berne mu Buholandi. kuri iyi tariki buri mwaka, hatumirwa ibihugu biri muri uwo muryango n’abandi bafatanyabikorwa bagahura bakaganira ku ruhare iposita igira mu iterambere ry’ibihugu.

Tariki ya 9 Ukwakira yiswe umunsi mpuzamahanga w’iposita muri Kongere y’ibihugu byo mu Ihuriro ry’Iposita yabereye i Tokyo mu Buyapani mu mwaka wa 1969.

Kayitare Célestin uyobora Iposita y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza