Kwamamaza

U Rwanda rwerekanye uko ruhagaze ku guteza imbere ihame ry’uburinganire

Yanditswe kuya 30-09-2016 saa 21:44' na Ntakirutimana Deus


U Rwanda n’ibihugu bigize umuryango wa Afurika y’Iburasirazuba (EAC) biri kwerekana uko biharanira ihame ry’uburinganire, ibipimo bizaherwaho mu kunoza umushinga w’itegeko rigamije uburinganire n’iterambere urimo gusuzumwa n’abadepite ba EALA.

U Rwanda rwagaragarije abagize Umushinga Uharanira Iterambere ry’Abagore muri EAC no mu bihugu byo mu karere(EASSI) na sosiyete sivile, ubushakashatsi bw’ibanze bw’uko ibipimo bigaragaza ihame ry’uburinganire mu Rwanda bihagaze ku wa Gatanu tariki ya 30 Nzeri 2016.

Ibyo bipimo byerekana ko u Rwanda ruhagaze neza muri rusange, ariko hari aho rugisabwa gushyira imbaraga.

Bimwe mu byagaragajwe

Mu nzego z’ubutabera, mu Rukiko rw’Ikirenga abagore ni 43%, mu nkiko nkuru ni 30.8% nk’uko byagaragajwe na raporo yakozwe muri 2014.

Abagore bari mu Nteko Ishinga Amategeko bihariye 64 %, mu gihe muri Guverinoma bari kuri 39%.Ba Guverineri uyu munsi bagize 60% mu gihe muri 2014 bari 40%. Ba Meya bari ku 10%, ababungirije bashinzwe ubukungu bari 17%, abashinzwe imibereho myiza ni 84%, ba gitifu b’uturere ni 7%, abagize njyanama z’uturere bari kuri 43% mu gihe abari mu mirimo ya leta muri rusange abagore ari 45%.

Abagore basaga miliyoni 3.5 biyandikishije gutora, mu gihe abagabo basagaga miliyoni 2.9, muri rusange abagore bagize 54% by’abatora nk’uko bigaragazwa na raporo ya 2016.

Raporo yo muri 2016 igaragaza ko muri ba Minisitiri,abagore ari 9 muri 12 bangana na 43%, abanyamabanga ba leta abagore ni 2 muri 6 bangana na 25%.

Uburezi

Raporo y’Uburezi yo muri 2015 igaragaza ko abakobwa bangana na11.1% bari barataye amashuri abanza, abahungu ari 9.6%. Mu yisumbuye abakobwa ni 7.2%, abahungu ari 4.5%. Mu barezi, abagore 53.8%, bigisha mu mashuri abanza, mu yisumbuye ni 27%.

Abagore kandi usanga mu mashuri makuru na za kaminuza bakunda kwiga amasomo y’imibanire ari benshi kuko muri 2015 bari 53.9%, abiga ubwubatsi buhanitse(Engineering) ari 18.6%.

Abari mu nzego z’ubukungu zifata ibyemezo ni 14% mu gihe abagabo ari 86%. By’umwihariko hagaragaramo umugore umwe; Dr Monique Nsanzabaganwa wungirije Guverineri mukuru wa Banki y’igihugu.Abagore bagafite ni 11.9%, mu gihe abagabo ari 25.5%,abagore batagafite ni 2.8%, abagabo ni 4%.

Mu butumwa bw’amahoro mu mahanga, raporo ya Loni yakozwe muri 2014 igaragaza ko abagore bari 16%, ni ukuvuga abapolisi bari muri ubwo butumwa, imibare y’abasirikare ntiyabashije kuboneka.

Abagore 6.8 babarurwa mu bice byasigajwe inyuma n’amateka, mu gihe abagabo ari 7%.

U Rwanda rwashimwe

Umuyobozi wa gahunda za EASSI, Christine Nankubuge Ndawula yavuze ko u Rwanda rwateye imbere mu kwimakaza ihame ry’uburinganire mu nzego z’ubuyobozi, ariko akomoza ku hagisabwa imbaraga,mu nzego zifata ibyemezo, ubucuruzi, ndetse ko umubare munini wabo usanga ugikora ubuhinzi.

Agereranya u Rwanda n’akarere yavuze ko rwateye intambwe mu bijyanye no kugabanya umubare w’abagore bapfa babyara.

Akarere kandi ngo kugarijwe n’abagore badafite uburenganzira ku butaka bwabo kubera umuco ukibasubiza inyuma, ariko ngo u Rwanda rwo rwateye intambwe.

Umuyobozi w’Impuzamiryango Pro-Femmes Twese Hamwe yakoze ubwo bushakashatsi, Kanakuze Jeanne D’Arc yavuze ko u Rwanda ruhagaze neza kandi ko gutanga iyo raporo birufitiye inyungu zikomeye.

Ati “ Tubifitemo inyungu nyinshi kuko turimo kugaragaza ibyo u Rwanda rwagezeho bikamenyekana. Turimo no kwigisha n’abandi mu gihe u Rwanda ruvugwa ko ari rwo rwa mbere kwinjiza ihame ry’uburinganire mu buzima bw’abaturage n’ubw’ubuyobozi bw’igihugu, ni byiza ko n’abaturanyi bacu bagana muri uwo murongo kuko byanze bikunze iyo bitabaye gutyo bitugiraho ingaruka.”

Kanakuze avuga ko hari aho iryo hame ritarubahirizwa nko mu nzego z’ibanze no muri guverinoma, ariko ngo hari byinshi byagiye bikorwa kandi na leta ikaba ifite ubushake.

Muri rusange iyo raporo yagaragaje ko hari intambwe igenda iterwa kuko hari ubushake bw’ubuyobozi ariko n’abaturage bamaze kumenya ibyo kwimakaza ihame ry’uburinganire.

Itegeko Nshinga ry’u Rwanda rigena ko nibura mu nzego zifata ibyemezo, umubare w’abagore utagomba kujya munsi ya 30%.

U Rwanda rwatangiye kumvwa kuri iyi raporo, hazakurikiraho ibindi bihugu bigize EAC, ibivuyemo bizahurizwa hamwe, bishyikrizwe abayobozi b’ibihugu bya EAC n’abadepite ba EALA bazabyifashisha mu mushinga w’itegeko bari kwigaho ku ihame ry’uburinganire n’iterambere.

Kanakuze Jeanne d'Arc, Umuyobozi w'Impuzamiryango Pro-Femme Twese Hamwe
Umwe mu bagize Pro-Femme amurika ubushakashatsi
Ibipimo 30 ni byo byagendeweho muri ubu bushakashatsi
Abitabiriye imurika ry'ubu bushakashatsi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved