U Rwanda rwerekaniye amahirwe y’ishoramari ahazatorerwa umuyobozi wa OIF

Yanditswe na Evariste Nsengimana
Kuya 8 Ukwakira 2018 saa 11:40
Yasuwe :
0 0

Abashoramari, abatuye n’abagenda Umujyi wa Erevan muri Arménie, barimo kwerekwa amahirwe y’ishoramari ari mu Rwanda.

Ku wa 11-12 Ukwakira 2018, i Erevan, hazabera inama y’abakuru b’ibihugu na za Guverinoma bigize Umuryango uhuza ibihugu bikoresha ururimi rw’Igifaransa (OIF), izatorerwamo Umunyamabanga Mukuru w’uyu muryango.

Minisitiri w’Ububanyi n’amahanga w’u Rwanda, Louise Mushikiwabo ahataniye n’Umunya-Canada Michaëlle Jean.

Ahazabera amatora, guhera tariki 7 Ukwakira hatangijwe imurikabikorwa ku bintu bitandukanye birimo imico y’ibihugu bivuga ururimi ry’Igifaransa, aho u Rwanda rwamuritse amahirwe y’ishoramari rufite.

Umuyobozi ushinzwe gusesengura imitangire ya serivisi mu kigo cy’igihugu cy’Iterambere, RDB, Joyeuse Uwingeneye, yasobanuye amahirwe y’ishoramari ari mu Rwanda.

Yabwiye ibiro ntaramakuru bya Arménie, ArmenPress, ko u Rwanda rukomeje gushyiraho uburyo bwo koroshya ishoramari.

Ati “RDB nk’ikigo cya Guverinoma, turi hano ngo tugaragaze amahirwe y’ishoramari ari mu Rwanda n’icyo abantu bakora bageze mu mu gihugu cyacu.”

Yagaragaje ko ‘u Rwanda ari urwa kabiri muri Afurika mu bihugu byoroshya ishoramari, rufite politiki yo guha visa buri wese urujemo, rukoroshya kandi rugashishikariza uburyo bw’ishoramari.’

Raporo ya Banki y’Isi ya ‘Doing Business 2017’, yerekanye ko u Rwanda ari cyo gihugu cyakoze amavugurura menshi yorohereza abashoramari kurusha ibindi muri Afurika mu myaka 15 ishize.

Yerekanye ko rwongeye kuba igihugu cya kabiri muri Afurika yo munsi y’Ubutayu bwa Sahara cyorohereza abashoramari, rukaza ku mwanya wa 41 ku Isi.

Mu 2016 rwagize amanota 70.19% naho 2017 rugira 73.4%, rukurikiye Mauritius yagize 77.5% yari yagize 75.45% mu 2016.

U Rwanda kandi rworoheje uburyo bwo kurengera abashoramari boroheje, bahabwa uburenganzira bwo kurenganurwa mu gihe bapfukiranwe, ndetse irushaho guca akarengane mu manza z’ubucuruzi.

Arménie igiye kwakira inama mpuzamahanga ya 17 ya OIF, yinjiye muri uyu muryango mu 2008.

OIF yashinzwe mu 1970. Ifite ibihugu binyamuryango 84 birimo 26 by’indorerezi, byose hamwe bituwe n’abaturage basaga miliyoni 900 barimo miliyoni 274 bavuga Igifaransa.

Muri Arménie ahagiye kubera inama ya OIF harabera imurikabikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza