U Rwanda rwazamutse imyanya 10 mu bipimo by’amahoro mu 2018

Yanditswe na Rabbi Malo Umucunguzi
Kuya 7 Kamena 2018 saa 09:53
Yasuwe :
1 0

Raporo y’Ikigo gishyira ahagaragara ibijyanye n’igipimo cy’amahoro ya 2018 Global Peace Index 2017, yashyize u Rwanda ku mwanya wa 103 mu bijyanye no kwimakaza amahoro, ruvuye ku mwanya wa 113 rwari rwashyizweho mu 2017.

Iyi raporo ngarukamwaka ikorwa n’ikigo Institute for Economics and Peace (IEP) cyo muri Australia, ireba ibihugu 163 ku rwego bigezeho mu amahoro, uruhare afite mu bukungu bwabyo n’uburyo hashyirwa imbaraga mu kuyasigasira.

Iyo raporo igira iti “GPI ya 2018 yagaragaje ko urwego rw’amahoro ku Isi rwasubiye inyuma kuri 0.27% mu mwaka ushize, uba umwaka wa kane wo gusubira inyuma. Ibihugu 92 byasubiye inyuma mu gihe 71 byateye imbere.”

“Iyi raporo ya 2018 igaragaza ko Isi yagize umwuka mubi, amakimbirane n’intambara byavutse mu myaka icumi ishize ariko bitarabonerwa umuti, by’umwihariko mu Burasirazuba bwo hagati, bigatuma amahoro akomeza kubura.”

Iyi raporo igaragaza ko u Rwanda ruza ku mwanya wa 103 mu gihe mu mwaka ushize rwari ku mwanya wa 113 mu bihugu 163 byakorewemo ubu bushakashatsi. Mu mwaka ushize rwazamutseho imyanya 15, ubu rwazamutse indi myanya 10.

Iceland ikomeza kuza ku isonga mu bihugu bitekanye ku Isi guhera mu mwaka wa 2008. Ikurikirwa na Nouvelle-Zélande, Autriche, Portugal na Danemark.

Ku mwanya wa nyuma haza Syria, umwanya yihariye mu myaka itanu ishize. Ibanzirizwa na Afghanistan ya 162, Sudani y’Epfo ya 161, Iraq ya 160, Somalia ya 159, Yemen ya 158, Libya ya 157, Repubulika Iharanira Demokarasi ya Congo ya 156 na Repubulika ya Afurika yo Hagati ya 155.

Mu bihugu byo mu karere bigaragara muri iyi raporo, Uganda iri ku mwanya wa 107, Kenya ni iya 123, u Burundi ni ubwa 134 mu gihe Tanzania iri imbere cyane ku mwanya wa 51.

Ibihugu byo muri Afurika biza mu myanya myiza ni Botswana ya 29, Sierra Leone ya 35, Madagascar ya 38, Ghana ya 41, Naminbia ya 43 na Malawi ya 44.

Mu bihugu bikomeye ku Isi, nka Leta Zunze Ubumwe za Amerika iri ku mwanya wa 121, u Bwongereza buri ku mwanya wa 57, u Bufaransa ni ubwa 61, u Buhinde ni ubwa 136 naho u Burusiya ni ubwa 154 naho u Budage ni ubwa 17.

U Rwanda rwazamutse imyanya 10 mu bipimo by’amahoro mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza