U Rwanda rwatorewe kujya mu kanama k’ubuyobozi bwa UNDP

Yanditswe na Mukaneza M.Ange
Kuya 19 Mata 2018 saa 01:06
Yasuwe :
0 0

U Rwanda rwatorewe kujya mu Kanama y’ubuyobozi bw’Ishami ry’Umuryango w’Abibumbye rishinzwe gutsura amajyambere (UNDP), muri manda y’imyaka itatu izatangira muri Mutarama 2019.

Ku wa 16 Mata 2018 nibwo u Rwanda rwatorewe kwinjira muri aka kanama, amatora yabereye mu nama yahuje Akanama gashinzwe imari n’imibereho rusange, ECOSOC.

Akanama kayobora UNDP kashyizweho n’umwanzuro wa 48/162 wafatiwe mu nama rusange ya Loni yo ku wa 20 Ukuboza 1993.

Gafite inshingano zo guhuza ubufasha hagati ya za guverinoma no kugenzura ibikorwa bya UNDP, Ikigega cy’Umuryango w’Abibumbye cyita ku Baturage, UNFPA ndetse n’Ibiro by’Umuryango w’Abibumbye bishinzwe imishinga inyuranye, UNOPS.

Mu bindi gashinzwe harimo gushyira mu bikorwa imyanzuro iba yafatiwe mu nama rusange; gukurikirana ibikorwa n’amabwiriza aba yatanzwe n’Akanama gashinzwe imari n’imibereho rusange; gukurikirana uburyo inkunga iba yagenewe imishinga itandukanye ikoreshwa, ndetse no kureba ko gahunda zose zijyanye n’inshingano UNDP yahawe n’Umuryango w’Abibumbye zishyirwa mu bikorwa.

Kanashinzwe kugenzura impinduka zazanywe na gahunda zitandukanye za UNDP; kwemeza imishinga mishya; kwemeza ingengo y’imari; gukora raporo no kugaragaza ahakwiye kongerwa imbaraga.

Nka kimwe mu bihugu bikagize, u Rwanda ruzaba rubonye umwanya mwiza wo guharanira ko gahunda zitegurwa na UNDP ziba zihuye neza n’ibikenewe mu bihugu zizakorerwamo.

Iki kandi ni kimwe mu by’ingenzi bikorwa n’intumwa z’ihoraho z’u Rwanda mu Muryango w’Abibumbye, mu guharanira ko rugira ijambo muri gahunda zirebana n’iterambere mpuzamahanga.

Akanama k’ubuyobozi bwa UNDP kagizwe n’abahagarariye ibihugu 35 bigenda bisimburana. Uretse u Rwanda, ku mugabane wa Afurika hanatowe Botswana, Afurika y’Epfo, Gambia na Cameroon.

Akanama gashinzwe imari n’imibereho rusange niko katorewemo u Rwanda kujya mu kanama k’ubuyobozi bwa UNDP

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza