U Rwanda rwateye utwatsi gahunda ya EAC yo gutwarira ibinyabiziga ibumoso

Yanditswe na Kanamugire Emmanuel
Kuya 28 Ugushyingo 2016 saa 07:59
Yasuwe :
0 0

Ibihugu bitandatu bigize umuryango wa Afurika y’Iburasirazuba (EAC), birasa nibyananiwe kumvikana ku cyifuzo cyo guhuza ibijyanye n’ikoreshwa ry’imihanda cyane cyane uruhande rwo gutwariramo ibinyabiziga.

Muri uyu muryango ibijyanye no gutwara ibinyabiziga ntibivugwaho rumwe kuko u Rwanda n’u Burundi bitwarira mu ruhande rw’iburyo mu gihe ibindi bihugu nka Tanzania, Uganda, Kenya na Sudani y’Epfo bitwarira mu ruhande rw’ibumoso.

Byari byasabwe ko u Rwanda n’u Burundi nabyo byahindura uburyo bwo gutwara ibinyabiziga ariko inyigo yakozwe n’itsinda ryo muri Kaminuza ya Dar es Salaam kuri icyo cyifuzo igaragaza ibindi.

Nkuko Daily News yabyanditse, Umuyobozi ushinzwe ubukungu muri Minisiteri ishinzwe ibikorwa by’Umuryango wa Afurika y’Iburasirazuba ya Kenya, Peter Njoroge, mu mpera z’icyumweru gishize yatangaje ko iyo nyigo yerekanye ko u Rwanda n’u Burundi byateye utwatsi kiriya cyifuzo.

Yagize ati “Twasabye agashami gashinzwe iby’ubufatanye mu nganda ka Kaminuza ya Dar es Salaam ngo gakore inyigo ku guhuza uburyo bw’ikoreshwa ry’imihanda mu bihugu bigize EAC, harimo n’uruhande rwo gutwariraho ibinyabiziga.”

Yakomeje avuga ko iyo nyigo yerekanye ko kuba ibihugu byose byatwarira ibinyabiziga mu ruhande rumwe bidashoboka kuko guhindura ubwari busanzwe byasaba amafaranga menshi ibihugu byahindura kandi bigasaba kuvugurura ibikorwa remezo by’ubwikorezi.

Mu Rwanda cyangwa mu Burundi abashaka guhindura uburyo bwo gutwariramo imodoka byabasaba amadolari ya Amerika arenze 500.

U Rwanda rwari rwagaragaje ubushake mu guhindura uburyo bwo gutwaramo ibinyabiziga ariko inyigo yaje kwerekana ko bitari mu byo rukeneye byihutirwa.

Tanzania, Kenya na Uganda bitwarira ibinyabiziga ibumoso, nk’umurage basigiwe n’Abongereza babakolonije. Ni mu gihe u Rwanda n’u Burundi nabo bakomeje uw’Abafaransa wo gutwarira iburyo.

Abatwara ibinyabiziga mu bihugu bigize umuryango wa EAC bavuga ko nk’iyo bavuye nko mu Rwanda bakajya Tanzania bisanga batwarira imodoka mu kuboko kutariko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza